A vaIzrayeli va wa hi ciwuleni hi cipimo ca 40 wa malembe. Va wa hlulile madhoropa yo tala nguvhu. Ka cikhati leco, va wa gwimbile matenda yabye lomu mikoveni ya Mowabhi hi tlhelo ga mutsuwuka-gambo wa Congo wa Jordhani. Ci wa chikela cikhati ca ku va nghena Tikweni ga Citsumbiso. Bhalake a hosi ya Mowabhi, i wa chava lezvaku a vaIzrayeli va ta teka tiko gakwe. Hikwalaho, i no vitana wanuna wa ku hi Bhalami ata Mowabhi kasi a ta rukatela vaIzrayeli, ku nga ku wulawula zvilo zva kubiha kasi zvi va humelela.

Kanilezvi Jehovha i no byela Bhalami aku: ‘U nga rukateli vaIzrayeli’. Hikwalaho Bhalami i no ala kuya Mowabhi. Hosi Bhalake i no mu vitana hi khati ga wumbiri a tlhela a tsumbisa ku mu nyika ni cihi a nga ci lava. Hambulezvo, Bhalami a nga vhumelangi kambe. Nungungulu i no gumesa a mu byela lezvi: ‘U nga famba. Kanilezvi, famba u ya wula lezvi ndzi to ku byela basi’.

Bhalami i no khilela mbongola yakwe aya Mowabhi. I wa lava kuya rukatela vaIzrayeli, hambu lezvi Jehovha a nga mu byelile ku a nga va rukateli. A cikhati leci a nga famba, ku no woneka a ngilozi ya Jehovha makhati manharu laha ndleleni. A mbongola ya Bhalami yi wa yi wona a ngilozi, kanilezvi Bhalami i wa nga yi woni. Ka khati go sangula, a mbongola yi no jika yi ya lomu masin’wini. Ka khati ga wumbiri, yi no ti manya laha ka muru wa maribye, Bhalami a manyiwa nenge. Hi kugumesa, a mbongola yi no barama laha cikari ka ndlela. Ka makhati wontlhe lawa ya manharu, Bhalami i waba mbongola yakwe hi nhonga.

Ka khati ga wunharu, Jehovha i no maha mbongola yi wulawula. A mbongola yi no wutisa Bhalami yiku: ‘Hikuyini u tshamako hi ku ndzi bungutela’? Bhalami aku: ‘U no ndzi maha ku khwatsi ndzi cipumbu. Loku ndzi wa hi ni cipadha, na ndzi ku dele’. A mbongola yiku: ‘Ku hundza malembe yo tala na u ndzi khilela. Ndza tshuka ndzi ku maha lezvi ke’?

Jehovha i no gumesa a maha lezvaku Bhalami a wona ngilozi. A ngilozi yiku: ‘Jehovha i ku byelile lezvaku u nga rukateli vaIzrayeli’. Bhalami aku:  ‘Ndzi phazamile. Ndza ha tlhela kaya’. Kanilezvi a ngilozi yi no mu byela lezvi: ‘U nga famba le Mowabhi. Kanilezvi, famba u ya wula lezvi Jehovha a ku byelako basi’.

Xana Bhalami i gondzile cokari? Ahihi. Loku a chikele, Bhalami i no zama ku rukatela vaIzrayeli makhati manharu. Kanilezvi, ka makhati wontlhe lawo, Jehovha i no maha lezvaku a va katekisa. Hi kugumesa, a vaIzrayeli va no dhumela tiko ga Mowabhi, Bhalami a dawa. Na zvi nga vangi chukwana loku Bhalami i wa no tekela ku ingisa Jehovha?