Jehovha i no byela Mosi aku: ‘Kandziha uta leno citsungeni. Ndzi lava ku tsala milayo ya mina laha ka maribye ndzi ku nyika’. Mosi i no kwela le hehla ka citsunga a ya tshama seyo 40 wa masiku ni 40 wa wusiku. A cikhati leci a nga hi seyo, Jehovha i no tsala milayo ya lisima laha ka maribye a nyika Mosi. A milayo leyo yi vitaniwa ku Milayo ya Khume.

Loku ku hundzile cikhati co kari, a vaIzrayeli va no alakanya lezvaku Mosi i va siyile voce. Va byela Aroni vaku: ‘Hi lava munhu wa ku hi rangela. Hi mahele nungungulu’! Aroni aku: ‘Ndzi nyikeni ndzalama ya n’wina’. I no nyekisa ndzalama leyo a gumesa a maha cifananiso ca cihon’wana. A vanhu vaku: ‘A cihon’wana leci hi yena Nungungulu wa hina a nga hi humesa le Gibhite’! Va no sangula ku khozela cihon’wana leco ca ndzalama va tlhela va maha festa. Lezvo zvi wa hi zvi nene ke? Ahihi. Hakuva va wa tsumbisile ku khozela Jehovha basi. Makunu zvezvi, va wo tsika ku maha lezvi va nga tsumbisa.

 Jehovha i no wona lezvi zvi nga kari zvi maheka, a byela Mosi aku: ‘Chika u va yela. Va tsikile ku ndzi ingisa. Vo khozela nungungulu wa mawunwa’. Mosi i no chika hi le citsungeni, na a welele maribye mambiri.

A cikhati leci Mosi a nga kari a chikela kusuhani ni matenda, i nozwa vanhu na va yimbelela. A gumesa a va wona na va kina ni ku khizamela cifananiso ca cihon’wana. Mosi i no zangara nguvhu. A tsikeleta maribye mambiri lawa a nga welele mawa lahasi ma pandzeka. A tekela ku fayetela cifananiso a gumesa a wutisa Aroni aku: ‘Kasi va ku kucetelisile kuyini a kuza u maha nchumu lowu wo biha ke’? Aroni aku: ‘U nga zangari. Wa gi tiva tshamela ga vanhu lava. Va wa lava nungungulu, ndzi se nyekisa ndzalama yabye lomu ndzilweni ku se huma cihon’wana leci’! Aroni i wa nga faneli ku maha lezvo. Mosi i no tlhela le hehla ka citsunga a ya khongotela Jehovha kasi a va rivalela.

Jehovha i no rivalela lava va nga ti yimisele ku mu ingisa. Lezvo zvi komba ku zva lisima a ku ingisa Jehovha ni lava a va tirisako kasi ku hi rangela.