Joxuwa i rangele vanhu va Jehovha hi malembe yo tala a gumesa afa na a hi ni 110 wa malembe. Ka malembe wontlhe lawa a nga kari a hanya, a vaIzrayeli va wa khozela Jehovha. Kanilezvi a cikhati leci a ngafa, a vaIzrayeli va no sangula ku khozela zvifananiso, a ku fana ni lezvi va nga maha vaKhanani. Kota lezvi a vaIzrayeli va nga kala va nga ha mu ingisi Jehovha, i no tsika a hosi ya Khanani ya ku hi Jabhina, yi va xanisa. A vaIzrayeli va no khongotela Jehovha lezvaku a va vhuna. Hikwalaho, Jehovha i no va nyika murangeli muswa. A vito gakwe hi Bharake. Bharake i wa ta vhuna vanhu lezvaku va tlhela va sangula ku tirela Jehovha kambe.

Ku no rumelwa muphrofeti Dhebhora aya ka Bharake a ya mu byela mahungu ya Jehovha, aku: ‘Teka 10 000 wa vavanuna mu ya le cicongwaneni ca Kixoni, u yalwa kona na Sisera a hosana ya masochwa ya Jabhina, u va hlula’. Bharake a byela Dhebhora aku: ‘Ndzi ta famba loku u vhumela ku famba na mina’. Dhebhora aku: ‘Ndzi ta famba na wena. Kanilezvi, tiva lezvaku a hi wena u to daya Sisera. Jehovha i te Sisera i ta dawa hi wasati’.

Dhebhora i no vhuna vaIzrayeli, a famba na Bharake ni masochwa yakwe le citsungeni ca Tabhora kasi ma ya ti longisela kulwa. A cikhati leci Sisera a nga zvizwa, i no tlhanganyisa tikareta takwe ta yimpi ni masochwa yakwe le  nkoveni. Dhebhora a byela Bharake aku: ‘Hi nyamutlha Jehovha a to ku vhuna ku hlula’. Bharake ni vavanuna vakwe va 10 000 va no relela hi le citsungeni va ya kumana ni masochwa ya ntamu ya Sisera.

Jehovha i no maha lezvaku a cicongwana ca Kixoni ci tala hi mati. A marodha ya tikareta ta Sisera ma no ti kelela lomu ka madhaka, ti tsandzeka ku famba. Sisera i no huma lomu ka kareta yakwe a tsutsuma. Bharake ni masochwa yakwe va no hlula masochwa ya Sisera. Kanilezvi, Sisera i ponile laho. I no tsutsuma a ya fihlala ka tenda ga wasati wa ku hi Jayeli. Jayeli i no mu nyika leti anwa a tlhela a mu fenengeta hi nkumba. A musochwa loye wa ntamu a nga karele, i no kuma wurongo a etlela. Jayeli a gumesa a xiyelela, a mu tshinelela a belela cikhongwani ca tenda laha hlokweni ya Sisera, afa.

Bharake i no chikela laha ka Jayeli na a famba a lavetela Sisera. Jayeli i no huma hi lomu tendeni gakwe aku: ‘Nghena. Hi loyi a wanuna loyi u mu lavako’. Bharake i no nghena lomu tendeni zvonake a wona Sisera na a file. Bharake na Dhebhora va no dhumisa Jehovha hi ku yimbelela tisimu hi kota ya lezvi a nga vhuna vaIzrayeli ku hlula valala vabye. A vaIzrayeli va no hanya hi kurula ndzeni ka 40 wa malembe ma nga landzela.