Hi kufamba ka cikhati, a vaIzrayeli va no tlhela va mu fularela kambe Jehovha va sangula ku khozela vanungungulu va mawunwa. Hi cipimo ca 7 wa malembe, a vaMidhiyani va wa yiva zvifuyo zva vaIzrayeli va tlhela va hahlulela masimu yabye. Kasi va nga dawi hi vaMidhiyani, a vaIzrayeli va wa fihlala lomu ka makhele le zvitsungeni. Va no sangula ku kombela Jehovha lezvaku a va ponisa. Jehovha i no rumela ngilozi ka jaha ga ku hi Gidheyoni yi yaku: ‘Jehovha i ku hlawulile lezvaku uva musochwa wa ntamu nguvhu’. Gidheyoni a yi wutisa aku: ‘Ndzi nga va ponisisa kuyini a vaIzrayeli? Phela mina a ndzi wa nchumu’.

Gidheyoni i wa ta zvi tivisa kuyini ku Jehovha i langile yena? I no veka nguwo lahandle a byela Jehovha aku: ‘Loku gica ni mixo a nguwo na yi tsakamile hi hunguva, kanilezvi lahasi na ku womile, ndzi ta zvi tiva lezvaku u ndzi langile kasi ku ponisa Izrayeli’. Ni mixo ya kona, a nguwo yi wa tsakamile, lahasi ku wa womile! Kanilezvi Gidheyoni i no kombela lezvaku ka mixo yi nga landzela, a kuma nguwo na yi womile, ku tsakama lahasi. A cikhati leci zvi nga maheka lezvo, Gidheyoni i no tekela ku kholwa lezvaku Jehovha i langile yena. I no tlhanganisa masochwa yakwe kasi va yalwa ni vaMidhiyani.

 Jehovha i no byela Gidheyoni aku: ‘Ndzi ta va vhuna a vaIzrayeli lezvaku va hlula. Kanilezvi, kota lezvi u nga ni vavanuna vo tala nguvhu, mu nga tshuka mu alakanya lezvaku mu hlulile hi ntamu wa n’wina. Hikwalaho, byela vontlhe lava va chavako lezvaku va tlhela’. Ku no tlhela 22 000 wa vavanuna, ku sala 10 000 wa vona. Jehovha aku: ‘A vavanuna lavo va ha tele. Famba navo le cicongwaneni u ya va byela vanwa mati. Loyi a tonwa mati na a cuwukisela kasi ku ti wonela valala, sala ni yaloye’. Ku no sala 300 wa vavanuna basi; hi vona va nganwa mati na va ti wonela. Jehovha i no tsumbisa lezvaku a vavanuna lavo va vatsongwani va wa ta hlula a 135 000 wa masochwa ya vaMidhiyani.

Ni wusiku ga kona, Jehovha i no byela Gidheyoni aku: ‘Ci chikele cikhati ca ku ya hlasela vaMidhiyani’! Gidheyoni i no teka mipundzu ni timbita ti nga fihletele zvihlahle kutani min’wenge ya ndzilo a nyika vavanuna vakwe. A va byela lezvi: ‘Ndzi cuwukiseleni, mu gumesa mu maha lezvi ndzi to maha’. Gidheyoni i noba mpundzu, a faya mbita yakwe, a tlakusa cihlahle ca ndzilo, a wula lezvi hi gezu ga hombe: ‘Supadho ya Jehovha ni ya Gidheyoni’! Vontlhe vavanuna la’va 300 vonawu va no maha zvezvo. A vaMidhiyani va no chava nguvhu va tsutsuma va hangalaka matlhelweni wontlhe; va sangula ku dayana hi kuchava. Ka khati legi kambe, Jehovha i no vhuna vaIzrayeli ku hlula valala vabye.