A cikhati leci a zvipiyawu zva vaIzrayeli zvi nga ya hlola dhoropa ga Jeriko, zvi yile zvi ya tshama ndlwini ya wasati wa ku hi Rahabi. A hosi ya Jeriko yi no zvi tiva zvonake yi rumela masochwa maya kaya ka Rahabi. Rahabi i no fihla zvipiyawu lezvo zva zvimbiri le hehla ka yindlu yakwe zvonake a byela masochwa lezvaku ma ya zvi lavetela ka tlhelo gin’wani. I no byela zvipiyawu aku: ‘Ndzi ta mu vhuna hakuva ndza zvi tiva lezvaku Jehovha i na n’wina niku mu ta hlula tiko legi. Ndzi kombela ku mu ndzi tsumbisa lezvaku mu ta ponisa mina ni maxaka ya mina’.

A zvipiyawu zvi no byela Rahabi zviku: ‘Ha ku tsumbisa lezvaku lava va tova lomu ndlwini ka wena, vontlhe va ta pona’. Va tlhela vaku: ‘Boha lingoti lo pswhuka laha janeleni ga wena. Loku u maha lezvo, a maxaka ya wena ma nga ta dawa’.

Rahabi i no chisa zvipiyawu hi lingoti hi laha janeleni gakwe. A zvipiyawu zvi noya zvitsungeni zvi ya fihlala hi masiku manharu na zvi nga se tlhela ka Joxuwa. A vaIzrayeli va no gumesa va tsemakanya Congo wa Jordhani zvonake va ti longisela ku teka tiko ga Jeriko.  Jeriko give gona dhoropa go sangula va nga gi hlula. Jehovha i no va byela lezvaku va rendzelekela dhoropa khati gin’we hi siku hi 6 wa masiku. Ka siku ga wu 7, va gi rendzelekele 7 wa makhati. A vapristi va no gumesa vaba mipundzu zvonake a masochwa ma banguleka hi laha ma nga zvi kota hi kona. A makhurisi ya dhoropa ma no khungumuka mawa maku hohlo! Kanilezvi, a yindlu ya Rahabi a yi wangi, hambu lezvi yi nga hi laha khurisini. Rahabi ni maxaka yakwe va ponisilwe hakuva yena i wa tsumba Jehovha.