Ka cikhati leci, a vaIzrayeli vo tala va wa sangulile kambe ku khozela zvifananiso. Hikwalaho, Jehovha i no tsika vaFilistiya va fumela tiko gabye. Kanilezvi, ku wa hi ni vaIzrayeli vo kari va nga randza Jehovha. A mun’we wa kona ku wa hi Manowa. Yena ni sati wakwe va wa nga hi na vana. Ka siku go kari, Jehovha i no rumela ngilozi ka sati wakwe zvonake yi ya chikela yiku: ‘U ta pswala n’wana wa mufana. A n’wana loye i ta tlhatlhisa Izrayeli ka vaFilistiya. I tava muNazira’. Wa zvi tiva ku a vaNazira ku wa hi vamani? Va wa hi malandza yo hlawuleka ya Jehovha. A vaNazira va wa nga vhumelelwi ku tsemeta misisi.

Hi ku famba ka cikhati, a n’wana wa Manowa i no pswaliwa zvonake a mu chula ku hi Samsoni. A cikhati leci Samsoni a nga kula, Jehovha i no mu nyika ntamu. I wa zvi kota ku daya nghala hi mandla, na a nga hi na nchumu. Ka khati go kari, Samsoni i no daya 30 wa vaFilistiya yece. A vaFilistiya va no mu zonda zvonake va sangula ku lavetela tindlela ta ku mu daya. Ka wusiku go kari Samsoni na a etlele le Gaza, a vaFilistiya va noya laha nyangweni ya dhoropa va ya rindzela kasi va mu daya ni mixo ya kona. Kanilezvi, laha cikari ka wusiku, Samsoni i no vhuka aya laha nyangweni ya dhoropa, a ya kunula livati le’ya hombe laha khurisini. I no pinga livati hi makatla a famba nayo kala le hehla ka citsunga ci nga hi kusuhani ni Hebroni!

Hi ndzhako ka cikhati, a vaFilistiya va noya ka Dhelila a cigango ca Samsoni, va yaku: ‘Loku u hi byela a ku hikuyini Samsoni a nga ni ntamu wa hombe nguvhu, hi ta ku nyika a mali yo tala nguvhu. Hi lava ku mu khoma hi mu vhalela paxweni’. Dhelila i no vhumela, hakuva i wa lava mali leyo. Kusanguleni, Samsoni i no ala ku mu byela ku hikuyini a nga hi ni ntamu wa hombe. Kanilezvi Dhelila i no mu kurumetela kala aza a vhumela ku mu byela leci ci nga mu maha ava ni ntamu wa hombe. I no byela Dhelila aku: ‘Mina a ndzi se tshuka ndzi tsemeta misisi hakuva ndzi muNazira. Loku a misisi ya mina yi tsemiwa, ndzi nga ta hava ni ntamu’. Samsoni i mahile cihoxo ca hombe hi ku mu byela lezvo, a hi zvona?

 Dhelila i no tekela ku byela vaFilistiya aku: ‘Mina ndza zvi tiva ku hikuyini a nga ni ntamu wa hombe’! Dhelila i no etlelisa Samsoni laha madzolweni yakwe zvonake a vitanisa munhu a ta mu tsema misisi. Dhelila a tlakusa gezu aku: ‘Samsoni, a vaFilistiya hi lava’! Samsoni i no vhuka. Ka cikhati leco, i wa nga ha hi na ntamu. A vaFilistiya va no mu khoma, va mu bhoxa matihlo va ya mu vhalela paxweni.

Ka siku go kari, a vaFilistiya vo tala nguvhu va no tlhangana lomu tempeleni ya nungungulu wabye Dhagoni zvonake va wula lezvi hi gezu ga hombe: ‘A nungungulu wa hina i hi vhunile ku khoma Samsoni! Mu humeseni handle Samsoni hi hlakana hi yena’. Va no mu yimisa cikari ka timhandze timbiri ta tempeli va sangula ku mu poyilela ni ku mu hleka. Samsoni i no vitana Jehovha hi gezu go tlakuka aku: ‘O Jehovha, ndzi kombela u tlhela u ndzi nyika ntamu khati gin’we basi’. Ka cikhati leco, a misisi ya Samsoni yi wa kulile yi leha kambe. I no chovha timhandze ta tempeli hi ntamu wakwe wontlhe. A tempeli yontlhe yi no khungumuka yiwa, yi daya vanhu vontlhe va nga hi lomu tempeleni, aku patsa na Samsoni.