A cikhati leci Sawule a ngafa, Dhavhidha i no maha hosi. Ka cikhati leco, i wa hi ni 30 wa malembe. Loku ku hundzile malembe yo kari na a kari a fuma, i no maha ciwonho ca hombe nguvhu. Ka wusiku go kari na a hi lehehla ka yindlu yakwe ya wuhosi, i no wona wasati wo saseka nguvhu. I no tiva lezvaku a vito gakwe hi Bhatexebha niku i wa hi sati wa musochwa wa ku hi Uriya. Dhavhidha i no vitanisa Bhatexebha le ndlwini yakwe. I no ta etlela naye zvonake Bhatexebha a xura nyimba. Dhavhidha i no zama ku fihla lezvi a nga zvi mahile. I no byela murangeli wa masochwa yakwe lezvaku a rangisa Uriya le phambeni ka masochwa loku valwa, va gumesa va hlehla kasi Uriya a dawa hi valala. Andzhako ka ku Uriya a delwe, Dhavhidha i no teka Bhatexebha a maha sati wakwe.

Hambulezvo, Jehovha i zvi wonile zvontlhe a zvilo zva kubiha lezvi Dhavhidha a nga maha. Zvini lezvi Jehovha a nga maha? I no ruma muphrofeti Natani lezvaku aya ka Dhavhidha. Loku a chikele, i no mu hlawutela lezvi: ‘Ku wa hi ni wanuna wo kari wa ku ganya a nga hi ni tiyivhu to tala, ni mun’wani wa cisiwana a nga hi ni ciyivhana cin’we basi a nga ci randza nguvhu. Loyi wa ku ganya i no mu tekela ciyivhana caleci ca cin’we a nga hi naco loyi wa cisiwana’. Dhavhidha i no zangara nguvhu aku: ‘A wanuna loye wo ganya i ringanelwa hi ku dawa basi’! Natani i no gumesa a byela Dhavhidha aku: ‘A wanuna loye hi wena’! Dhavhidha i no bayiseka nguvhu, a gumesa a vhumela ciwonho cakwe ka Natani aku: ‘Ndzi mu wonhele Jehovha.’ Dhavhidha ni maxaka yakwe va no xaniseka nguvhu hi kota ya ciwonho leco. Jehovha i no tsayisa Dhavhidha. Kanilezvi, i mu tsikile a hanya hakuva i wa hi munhu wo tsumbeka ni ku ti koramisa.

Dhavhidha i wa lava ku mu akela tempeli Jehovha. Hambulezvo Jehovha i no hlawula n’wana wa kona Solomoni lezvaku a mu akela. Dhavhidha i no sangula ku longisela zvontlhe zvi nga laveka kasi Solomoni a aka, a gumesa aku: ‘A tempeli ya Jehovha yi fanele kuva yo saseka ni yo hlamalisa nguvhu. Solomoni wa ha hi  n’wanana nguvhu, kanilezvi ndzi ta mu vhuna ku longisela lezvi zvi lavekako’. Dhavhidha i no humesa mali yo tala nguvhu a nyikela kasi yi seketela ntiro wa ku aka tempeli, a tlhela a lava vanhu va zvi kotako khwatsi ku tira. I no hlengeletela ndzalama, silivha ni tisinya ta hombe ta tisedhare ti ngata hi tikweni ga Sidhoni. A  cikhati leci Dhavhidha a nga hi kusuhani ni kufa, i no mu nyika phepha Solomoni ga lezvi a tempeli yi nga fanele ku akiswa zvona. I no mu byela lezvi: ‘Jehovha i ndzi rumile lezvaku ndzi tsala timhaka leti kasi ndzi ku nyika. Jehovha i ta ku vhuna. U nga chavi. Tiya u sangula ku aka’.