Andzhako ka loku Dhavhidha a dele Goliyate, Hosi Sawule i no mu hlawula lezvaku a rangela masochwa yakwe. Dhavhidha i no hlula tiyimpi to tala a tlhela ava munhu wo tiveka nguvhu. Ka makhati wontlhe lawa Dhavhidha a nga wuya hi yimpini, a vavasati va wa kina ni ku yimbelela vaku: ‘Sawule i dele 1000. Kanilezvi Dhavhidha i dele 10 000’! Sawule i no sangula ku zonda Dhavhidha, a zama ku mu daya.

Dhavhidha i wa zvi kota kuba khwatsi a civhiyolana. Ka siku go kari Dhavhidha na a kari a mu chayela civhiyolana cakwe hosi Sawule, i no hoxela tlhari gakwe kasi ku daya Dhavhidha. Dhavhidha i no tekela ku vhika, a tlhari gi ya bhoxa khurisi. Loku lezvo zvi hundzile, Sawule i no simama ku hlota tindlela ta ku daya Dhavhidha. Dhavhidha i no gumesa a tsutsuma a ya fihlala ciwuleni.

Sawule i no teka 3000 wa masochwa va famba va hlota Dhavhidha. Zvi no ya kotlana ni ku a nghena kwalomu ka nkele walowu Dhavhidha ni vavanuna vakwe va nga fihlele ka wona. A vavanuna va Dhavhidha va no mu hlevela vaku:  ‘Hi loyi Sawule u mu kumile. Tekela ku mu daya’. Dhavhidha i no xiyelela a ya tsema choka ya bhaji ga hosi Sawule. Hambulezvo, Sawule a nga zvi zwangi. Dhavhidha i no gumesa a tizwa nandzu hi lezvi a nga kala ku kombisa cichavo hi a totilweko wa Jehovha. A nga vhumelangi ku a vavanuna vakwe va daya Sawule. Loku Sawule a humile, Dhavhidha i no mu angula na a hi le kule, a mu byela lezvaku loku i wa no zvi lava na a mu dayile a cikhati leci a nga tsema bhaji gakwe. Xana Sawule i cicile lezvi a nga mu wonisa zvona Dhavhidha?

Ahihi, a nga cicangi. I no simama ku lavetela Dhavhidha kasi a mu daya. Ka wusiku go kari, Dhavhidha ni zukulu wakwe Abhixayi va no ya nghena lomu Sawule a nga etlele kona. Na Abneri, a nga hi guardha ga Sawule, yenawu i wa etlele. Abhixayi i no byela Dhavhidha aku: ‘Hi loyi Sawule! Ndza ha tekela ku mu daya’. Dhavhidha aku: ‘Jehovha hi yena a to xuxa a mhaka ya mina na Sawule. Wena a hi teke a tlhari gakwe ni botori ga mati basi hi famba’.

Dhavhidha i noya le hehla ka citsunga ci nga hi kusuhani ni laha Sawule a nga etlele kona, zvonake a ya banguleka aku: ‘Abneri, hikuyini u nga kala ku vhikela a hosi ya wena? Gi kwihi a tlhari ga Sawule ni botori gakwe ke?’ Sawule i no tekela ku zvizwa ku hi Dhavhidha a wulawulako, a gumesa aku: ‘Ndza zvi wona ku na u ndzi dele. Hambulezvo, a wu ndzi dayangi. Hakunene, u ta maha hosi ya Izrayeli’. Sawule i no tlhela ndlwini yakwe ya wuhosi. Hambulezvo, Dhavhidha i wa nga zondiwi hi vontlhe laha kaya ka Sawule.