Jonatani, a n’wana wa Hosi Sawule loyi wa nhondzo, i wa hi musochwa wo tiya hlana. Dhavhidha i wulile lezvaku Jonatani i wa tsutsuma ku hundza gama niku i wa hi ni ntamu wa ku pala ni nghala. Ka siku go kari, Jonatani i no wona masochwa ya vaFilistiya laha citsungeni. I no byela loyi a nga tira ku welela matlhari yakwe aku: ‘Hi ta kandziha hi yalwa navo ntsena loku Jehovha a hi komba ku hi ngalwa navo. Loku a vaFilistiya va hi vitana, hi ta zvi tiva lezvaku hi fanele kulwa’. A vaFilistiya va no banguleka vaku: ‘Ngonani hi talwa’! Hikwalaho, a vavanuna lavo va vambiri va no kandziha va ya citsungeni va yalwa va hlula a 20 wa masochwa ya vaFilistiya.

Kota lezvi Jonatani a nga hi n’wana wa nhondzo wa Sawule, hi yena a nga hi ni fanelo ya ku vhaleta Sawule kota hosi. Kanilezvi, Jonatani i wa zvi tiva lezvaku Jehovha i hlawulile Dhavhidha kasi a vhaleta Sawule kota hosi ya Izrayeli. Hambulezvo, a nga vangi ni ciluse hi Dhavhidha. Jonatani na Dhavhidha va no maha vanghana va hombe nguvhu. Va no tsumbisana ku va  ta vhikelana va tlhela va lwelana. Jonatani i no nyikela bhaji gakwe, cipadha, wura ni bhandi gakwe ka Dhavhidha a kombisa lezvaku va wa hi vanghana.

A cikhati leci Dhavhidha a nga tsutsuma Sawule, Jonatani i noya mu tiyisa aku: ‘Tiya hlana uva ni ntamu. Jehovha i ku hlawulile lezvaku uva hosi. Hambu papayi wa zvi tiva lezvo’. Wenawu wa zvi lava kuva ni munghana wa mu nene wo fana na Jonatani?

Hi makhati yo tala, Jonatani i no veka wutomi gakwe mhangweni kasi ku vhuna munghana wakwe. Jonatani i wa zvi tiva lezvaku Hosi Sawule i wa lava ku daya Dhavhidha. Hikwalaho, i no byela papayi wakwe aku: ‘U tava ni ciwonho loku u daya Dhavhidha; a nga ku wonhelangi nchumu’. Sawule i no zangarela Jonatani.

Hi ku famba ka cikhati, Sawule na Jonatani va nofa yimpini hi siku gin’we. Andzhako ka loku Jonatani a file, Dhavhidha i no lavetela Mefibhoxete, a n’wana wa Jonatani. A cikhati leci a nga mu kuma, i no mu byela lezvi: ‘Kota lezvi a papayi wa wena a nga hi munghana wa mina, ndzi ta ku hlayisa wutomini ga wena gontlhe. U ta tshama ndlwini ya mina ya wuhosi, hi tlhela higa zvin’we mezeni ya mina’. Dhavhidha a nga tshukangi a rivala munghana wakwe Jonatani.