Jehovha i wa yimisile valamuli kasi ku rangela vaIzrayeli. Kanilezvi, ka cikhati leci va wa lava hosi. Va no byela Samuweli vaku: ‘A matiko wontlhe ma na ni tihosi. Hinawu hi lava hosi’. Samuweli i zvi wonile na zvi bihile. Hikwalaho, i no khongela ka Jehovha hi mhaka leyo. Jehovha a mu byela lezvi: ‘A vanhu a va ali wena. Va ala mina. Va byele lezvaku va nga yi kuma hosi, kanilezvi yi ta lava zvotala ka vona’. Hambu lezvi va nga byeliwa lezvo, a vanhu va te: ‘A hi na mhaka ni lezvo. Hina ho lava hosi’!

Jehovha i no byela Samuweli lezvaku a wanuna wa ku hi Sawule i wa ta maha hosi yo sangula ya Izrayeli. A cikhati leci Sawule a nga ya vhuxela Samuweli le Rama, Samuweli i no yimisa Sawule kota hosi hi ku chulula mafura laha hlokweni yakwe.

Hi ndzhako ka cikhati, Samuweli i no vitana vaIzrayeli vontlhe lezvaku a ta va komba hosi yabye ya yiswa. Kanilezvi, va wa nga mu kumi Sawule. Wa zvi tiva ku hikuyini? I wa no fihlala lomu ka zvibya. A cikhati leci va nga mu kuma, va no mu humesa lahandle va mu yimisa cikari ka vanhu. Sawule i wa lehile ku hundza vontlhe, niku i wa sasekile nguvhu. Samuweli aku: ‘Loyi a hlawulilweko hi Jehovha hi loyi, mu woneni’. A cikhati leci a vanhu va nga wona hosi yabye, va no tsaka nguvhu.

Kusanguleni Hosi Sawule i wa ingisa Samuweli a tlhela a ingisa Jehovha kambe. Kanilezvi i no gumesa a cica. Hi cikombiso, Sawule i wa nga hi na fanelo ya ku nyikela miphahlo. Kanilezvi ka siku go kari, Samuweli i no byela Sawule lezvaku a mu rindzela kala a chikela. Hambulezvo, Samuweli a nga hatlisangi a chikela. Hikwalaho, Sawule i no sala a nyikela miphahlo. Zvini lezvi Samuweli a nga maha? I no byela Sawule aku: ‘A wu mu ingisangi Jehovha’. Xana Sawule i gondzile cokari hi cihoxo cakwe?

Hi ndzhako ka cikhati, Sawule i no ya a yalwa ni vaAmaleki. Samuweli i no mu byela lezvaku i fanele ku daya vontlhe ku nga sali ni mun’we. Kanilezvi Sawule i no siya Hosi Agagi, a nga mu dayi.  Jehovha i no byela Samuweli aku: ‘Sawule i ndzi tsikile, a nga ndzi ingisi’. Samuweli i no swireka nguvhu, a byela Sawule aku: ‘Kota lezvi u nga tsika ku ingisa Jehovha, i ta hlawula hosi yin’wani’. A cikhati leci Samuweli a nga jika a tlhela, Sawule i no khoma bhaji ga Samuweli gi handzuka. Samuweli aku: ‘A ku fana ni bhaji legi gi nga handzuka, Jehovha i ku tekele wuhosi’. Jehovha i wa ta teka wuhosi lego a gi nyikela ka mun’wani munhu, loyi a nga wa ta mu randza a tlhela a mu ingisa.