Jehovha i katekisile Solomoni hi ku mu nyika wutlhari ga hombe ni thomo ga ku aka tempeli. Hambulezvo, i no gumesa a fularela Jehovha hi kutsongwani-kutsongwani. Loku u hi mupswali, vhuna n’wana wa wena a ku zwisisa lezvi a vakhozeli va zvifananiso va nga mu kucetelisa zvona Solomoni lezvaku a fularela Jehovha. A mufumo wu no avanyiswa zvonake a tihosi to biha ti hambukisa vanhu va tsika ku ingisa Jehovha va sangula ku khozela zvifananiso. Ka cikhati leco, a vaphrofeti vo tsumbeka va Jehovha va no xanisiwa va tlhela va dawa. A vanhu va nga hi le mufun’weni wa le n’walungu va wa maha zvilo zvo biha nguvhu hi kota ya ku kucetelwa hi Jezebheli, a sati wa hosi. Leco ci vile cikhati co biha nguvhu matin’wini ya vaIzrayeli. Hambulezvo, ku wa ha hi ni vaIzrayeli vo tala va nga kari va ingisa Jehovha. A vokari va kona, ku wa hi Hosi Jehoxafati na muphrofeti Elija.