A cikhati leci Solomoni a nga khozela Jehovha, le Izrayeli ku wa hi ni kurula. Kanilezvi, Solomoni i no teka vasati vo tala va matiko man’wani. A vavasati lavo va wa khozela zvifananiso. Solomoni i no sangula ku cica hi kutsongwani- -kutsongwani, yenawu a sangula ku khozela zvifananiso. Jehovha i no zangara, a byela Solomoni aku: ‘Izrayeli i ta susiwa lixakeni la wena a tlhela a avanyisiwa hi zvipandze zvimbiri. Ndzi ta nyikela cipandze ca hombe ka mun’we wa malandza ya wena, niku a lixaka la wena li ta fumela cipandze leci ca citsongwani basi’.

Jehovha i gumesile a maha lezvaku a ciboho cakwe ci woneka khwatsi hi ndlela yin’wani. I zvi kombisile a cikhati leci Jerobhowamu, a nandza ga Solomoni, a nga kari a famba zvonake a kumana na muphrofeti Ahija laha ruweni. Ahija i no handzula a nguwo yakwe yi huma 12 wa zvipandze a gumesa a byela Jerobhowamu aku: ‘Jehovha i ta susa mufumo wa Izrayeli lixakeni la Solomoni a wu avanyisa hi zvipandze zvimbiri. Teka zvipandze lezvi zva 10 hakuva u ta fumela 10 wa tixaka’. Hosi Solomoni i no zvi tiva lezvo zvonake a zama ku daya Jerobhowamu! Hikwalaho, Jerobhowamu i no tsutsuma aya Gibhite. Hi kufamba ka cikhati, Solomoni i nofa zvonake a n’wana wakwe Rehobhowamu a maha hosi. Ka cikhati leco, Jerobhowamu i no wona ku zvi wa ringana ku a tlhela Izrayeli, i wa nga ta ha dawa.

 A madhota ya Izrayeli ma no byela Rehobhowamu maku: ‘Loku a vanhu u va hlayisa khwatsi, va ta ku ingisa’. Kanilezvi, a majaha yo kari ma nga hi vanghana va Rehobhowamu, ma no mu byela lezvi: ‘Wena sa va xanise, u tlhela u va nyika mitiro ya kubindza nguvhu’! Rehobhowamu i no maha lezvi a vanghana vakwe va nga mu byela. I no xanisa vanhu; lava va 10 wa tixaka ta ka Izrayeli va no gumesa va tsika ku mu ingisa. Va no yimisa Jerobhowamu kota hosi ya 10 wa tixaka. A cipandze leco, ci gumesile ci tiviwa kota mufumo wa ka Izrayeli. A cipandze leci cin’wani ca tixaka timbiri, ci no tiviwa kota mufumo wa ka Judha. A tixaka leto, ti no ingisa Rehobhowamu. A 12 wa tixaka ta Izrayeli ti wa avanyisilwe makunu.

Jerobhowamu i wa nga lavi lezvaku a vanhu vakwe vaya le Jerusalema va ya khozela, lomu ku nga fumelwa hi Rehobhowamu. Wa zvi tiva ku hikuyini? Jerobhowamu i wa chava lezvaku va nga mu tsika, va seketela Rehobhowamu. Hikwalaho, i no maha zvifananiso zvimbiri zva zvihon’wana hi ndzalama a gumesa a byela vanhu vakwe aku: ‘Le Jerusalema kule nguvhu. Mu nga khozela kwalaha’. A vanhu va no sangula ku khozela zvihon’wana lezvo zva ndzalama va rivala Jehovha.