Loku a hlomela hi laha janeleni ga yindlu yakwe ya wuhosi le Jezreyeli, Hosi Ahabhi i wa wona simu ga mauvha ga wanuna wa ku hi Nabhote. Ahabhi i wa gi navela simu lego. I no bhula na Nabhote lezvaku a mu xavisela. Kanilezvi, Nabhote a nga vhumelangi ku mu xavisela hakuva a Nayo wa Jehovha wu wa beletela ku xavisa tshomba yo fana ni leyo. Xana Ahabhi i tsakile hi lezvi Nabhote a nga kari a maha zva zvi nene? Ahihi. Ahabhi i no zangara nguvhu laha ka kuza a tsandzeka ni ku huma lomu ndlwini a nga etlela kona, a tlhela a ala ni kuga.

A sati wakwe Jezebheli i wa hi munhu wo biha nguvhu. I no byela Ahabhi aku: ‘Phela wena u hosi ya Izrayeli. U na ni fanelo ya ku kuma ni cihi u ci lavako. U nga karateki, ndzi ta ku vhuna; u ta gi kuma a simu legiya’. Jezebheli i no tsala mapapilo maya ka madhota ya dhoropa, a ma byela lezvaku ma lumbeta Nabhote maku i rukatele Nungungulu, ma gumesa ma mu gandla hi maribye kala afa. A madhota ma no maha lezvi Jezebheli a nga ma byela, a gumesa a byela Ahabhi aku: ‘Nabhote i file. A simu ga mauvha ga wena makunu’.

Nabhote a hi yena yece a nga dawa hi Jezebheli na a nga hi na nandzu. I dele van’wani vanhu vo tala va nga randza Jehovha. Jezebheli i wa khozela zvifananiso a tlhela a maha zvilo zvin’wani zvo biha. Zvontlhe a zvilo zvo biha lezvi Jezebheli a nga zvi maha, Jehovha i wa zvi wona. I wa ta mu maha yini?

Loku Ahabhi a file, a n’wana wakwe Jehoramu i no sangula ku fuma. Jehovha i no rumela wanuna wa ku hi Jehu kasi a ya tsayisa Jezebheli ni maxaka yakwe.

Jehu i no khilela kareta yakwe aya Jezreyeli lomu a nga tshama kona Jezebheli. Jehoramu i nota hi kareta a khinga Jehu, zvonake a mu wutisa lezvi: ‘Ku na ni kurula cikari ka hina’? Jehu aku: ‘Loku mamani wa wena Jezebheli a ha maha zvilo zva kubiha,  hi nga tava ni kurula’. Jehoramu i no jikisa a kareta yakwe a zama ku tsutsuma. Kanilezvi, Jehu i no mu daya hi paxa.

Jehu i no gumesa aya ndlwini ya wuhosi ka Jezebheli. Loku Jezebheli a zwile ku Jehu wata, i no ti pendetela nghohe, a longisela misisi yakwe zvonake a nyima hi laha janeleni gakwe a mu rindzela. A cikhati leci Jehu a nga chikela, Jezebheli i no mu losa hi losela go biha. Jehu i no banguleka a byela vatiri va Jezebheli va nga hi kusuhani naye aku: ‘Mu hoxeni lahasi!’ Va no mu nikinya hi laha janeleni a yawa le handle afa.

Andzhako ka lezvo, Jehu i no daya vana va Ahabhi va 70 a tlhela a fuvisa wukhozeli ga Bhaali, a basisa tiko. Wa zvi wona ku Jehovha wa zvi tiva zvontlhe, niku i tsayisa lava va mahako zva kubiha hi cikhati ca kona ke?