Le mufun’weni wa Izrayeli wa 10 wa tixaka ku fumile tihosi to biha. Kanilezvi Ahabhi ive yin’we ya leti to biha nguvhu. I no tekana ni wasati wo biha a nga khozela Bhaali. A vito gakwe ku wa hi Jezebheli. A vanhu vo tala lomu Izrayeli va wa khozela Bhaali hi kota ya Ahabhi na Jezebheli. Ahabhi na Jezebheli va no tlhela va daya vaphrofeti va Jehovha. Zvini a nga maha Jehovha? I no ruma muphrofeti Elija ka Ahabhi kasi a ya mu byela mahungu yo kari.

Elija i no byela Hosi Ahabhi aku lomu Izrayeli ku nga ta hana vhula hi kota ya wubihi gakwe. Lomu tikweni ku no tshama ku nga mili nchumu hi malembe manharu ni kuhundza. A vanhu va xaniseka hi ndlala. Jehovha i no gumesa a ruma Elija a tlhela ka Ahabhi. Hosi Ahabhi i no byela Elija aku: ‘Hi wena u hi vangelako zvikarato! Zvontlhe lezvi i nandzu wa wena’. Elija a hlamula aku: ‘A hi mina ndzi nga vhalela vhula. Hi wena u nga yi vhalela hi ku khozela Bhaali. Hi ta maha zvokari kasi hi tiva loyi a nga Nungungulu wa lisine. Tlhanganyisa vanhu ni vaphrofeti va Bhaali le Citsungeni ca Karmeli’.

A vanhu va no tlhangana le citsungeni. Elija aku: ‘Zvi tiveni khwatsi lezvi mu faneleko ku maha. Loku Jehovha a hi Nungungulu wa lisine, mu landzeleni. Loku ku hi Bhaali, landzelani yena. Hi ta maha lezvi: A vaphrofeti va Bhaali lava va 450, va ta longisela munyikelo kasi ku nyika nungungulu wabye, va gumesa va mu vitana. Minawu ndzi ta longisela wa mina ndzi vitana Jehovha. Loyi a to hlamula hi ku rumela ndzilo, hi yena a nga Nungungulu wa lisine’. A vanhu va no vhumela.

A vaphrofeti va Bhaali va no longisela munyikelo. Va no vitana a nungungulu wabye kusukela ni mixo kala ni gambo, vaku: ‘O Bhaali, hi hlamule!’ Lezvi Bhaali a nga kala a nga hlamuli, Elija i no va hleka, aku: ‘Bangulekani nguvhu va sa. Kuzvilava Bhaali i etlele, i lava ku vhuxiwa’! Ku no chikela cikhati ca ni gambo a vaphrofeti va Bhaali na va ha vitana. Kanilezvi, a va zangi va hlamuliwa.

Elija i no teka munyikelo wakwe a wu veka laha alatini, a wu chetela mati ma tala, a gumesa a maha mukombelo aku: ‘O Jehovha, ndza ku kombela. Komba a vanhu lava lezvaku hi wena Nungungulu wa lisine’. Jehovha i no rumela ndzilo hi le tilweni hi cihatla, wu ta hisa munyikelo wontlhe. A vanhu va no banguleka vaku: ‘Jehovha hi yena Nungungulu wa lisine’! Elija aku: ‘Dayani vaphrofeti vontlhe va Bhaali. Ku nga poni  ni mun’we’! Ka siku lego ku delwe 450 wa vaphrofeti va Bhaali.

A cikhati leci ku nga woneka refu gitsongwani le bimbini, Elija i no byela Ahabhi aku: ‘Kuta cingulo ca hombe. Nghena lomu kareteni ya wena u famba kaya’. A tilo gi no sangula ku phuma hi marefu, kuba moya, ku sangula kuna vhula ya hombe. A cimumu ci mbhela makunu. Ahabhi i no tsutsumisa a kareta yakwe hi laha a nga zvi kota hi kona. Elija i no tsutsuma nguvhu a siya ni tikareta hi ku vhuniwa hi Jehovha! Zvi lava ku wula ku a zvikarato zva Elija zvi wa mbhelile ke? A hi zvi woneni.