Jehoxafati a hosi ya Judha, i no khungumula maalati ya Bhaali ni zvifananiso lomu tikweni gontlhe. I wa lava lezvaku a vanhu va tiva milayo ya Jehovha. Hikwalaho, i no ruma tihosana ni vaLevhi lezvaku va gondzisa milayo ya Jehovha lomu tikweni gontlhe ga Judha.

A matiko ma nga gamekene ni tiko ga Judha, ma wa chava ku va vhukela hakuva ma wa zvi tiva lezvaku Jehovha wa lwela vanhu vakwe. A vanhu va matiko lawo va wa tlhela vata ni zvilo zva zvi nene va ta nyika Jehoxafati. Kanilezvi a vaMowabhi, vaAmoni ni van’wani vanhu va le tikweni ga Seyire va nota lezvaku va talwa ni tiko ga Judha. Jehoxafati i wa zvi tiva lezvaku ku wa laveka ku Jehovha a mu vhuna. Hikwalaho, i no ramba vanhu vontlhe — vavanuna, vavasati ni vanana — lezvaku vata le Jerusalema. I no yima mahlweni kabye a maha mukombelo, aku: ‘O Jehovha, ha zvi tiva ku loku u nga hi vhuni a hi nge hluli. Hikwalaho, hi kombela ku u hi byela lezvi hi faneleko ku maha’.

Jehovha i no hlamula mukombelo wakwe, aku: ‘U nga chavi. Ndzi ta mu vhuna. Nyimani muku tse, mu wona lezvi ndzi to mu ponisisa zvona’. Zvini a nga maha Jehovha kasi a va ponisa?

Loku gi cile ni mixo, Jehoxafati i no hlawula vayimbeleli a va byela lezvaku va ranga le phambeni ka masochwa, va famba. Va no suka le Jerusalema vaya ka wutshamu legi va nga wa talwa kona, gi vitaniwako ku i Tekowa.

Laha a vayimbeleli va nga kari va dhumisa Jehovha hi ku yimbelela tisimu hi magezu ya hombe ni kutsaka, Jehovha i wo lwela vaJudha. I no maha lezvaku a vaAmoni ni vaMowabhi va nga ha zwanani zvonake va sangula ku dayana. Va no dayana vontlhe, ku kala ne ni mun’we wa ku pona. Kanilezvi, Jehovha i vhikele vaJudha vontlhe, masochwa ni vapristi. A vanhu va matiko man’wani lawa ma nga gamekene ni Judha va no zvizwa lezvi Jehovha a nga zvi mahile. Va wa zvi tiva kambe lezvaku Jehovha i wa ha vhikela vanhu vakwe. Xana Jehovha i va vhikelisa kuyini a vanhu vakwe? Hi tindlela to tala. A nga lavi ku vhuniwa hi vanhu kasi a maha lezvo.