A cikhati leci Jezebheli a nga zvizwa lezvi a vaphrofeti va Bhaali va nga mahiwa, i no zangara nguvhu. I no rumela mahungu ka Elija, aku: ‘A mandziko, wenawu u tafa a ku fana ni vaphrofeti va Bhaali’. Elija i no chava nguvhu a tsutsuma aya ciwuleni. I no maha mukombelo aku: ‘Jehovha, ndzi karele. A ndza ha lavi nchumu. I chukwana ndzifa basi’. Elija i no gumesa a etlela lahasi ka sinya, hi ku karala.

Ku nota ngilozi yi ta mu vhuxa, yiku: ‘Vhuka uga’. A cikhati leci a nga vhuka, i no wona pawa laha ka maribye yo hisa ni jaru ya mati. I noga, anwa a tlhela a etlela kambe. A ngilozi yi nota yi ta mu vhuxa kambe yiku: ‘Gana, u fela ku kuma ntamu wa ku famba’. Hikwalaho, Elija i no vhuka aga kambe, zvonake a famba hi 40 wa masiku, wusiku ni mumu, kala a chikela Citsungeni ca Horebhe. Loku a chikele, i no nghena lomu ha nkele a etlela. Kanilezvi, Jehovha i no wulawula naye, aku: ‘Elija, zvini u mahako laha’? Elija aku: ‘A vaIzrayeli va tsikile ku maha lezvi va nga ku tsumbisa. Va khungumulile maalati ya wena va tlhela va daya vaphrofeti va wena. Zvezvi va lava ku daya na minawu’.

Jehovha aku: ‘Huma u ya yima laha citsungeni’. A kusangula, ku noba moya wa hombe wu hundza hi laha a nga yimile kona. Hi kulandzela, ku no tsekatseka misava, ku vhura ndzilo. Hi kugumesa, Elija i nozwa gezu gi nga zwalela hasi. Elija i no ti vhala nghohe hi bhaji a yima lahandle ka nkele. Jehovha a mu wutisa ku hikuyini a nga suka a tsutsuma. Elija aku: ‘Ndzi no sala ndzoce’. Kanilezvi, Jehovha i no mu byela lezvi: ‘A wu wece. Ku na ni 7000 wa vaIzrayeli lava va ha ndzi khozelako. Famba u ya yimisa Elixa kota muphrofeti kasi a ku vhaleta’. Elija i no tekela ku famba a ya maha lezvi Jehovha a nga mu byela. U zvi wonisa kuyini, Jehovha i ta ku vhuna na wenawu loku u maha lezvi a lavako ku u maha ke? Ina, i ta ku vhuna futsi. A hi woni zvokari zvi nga maheka a cikhati leci ku nga kala ku ngani vhula.