Ka cikhati leci ku nga hi ni ndlala na ku ngani vhula kambe, Jehovha i no byela Elija aku: ‘Famba le Zarefate. U ta ya nyikiwa zvakuga hi wasati wa noni’. A cikhati leci Elija a nga chikela laha nyangweni ya dhoropa, i no wona wasati wa noni wa cisiwana na rolela tihunyi. I no mu kombela mati ya kunwa. Laha a nga famba ku yakha mati, Elija i no mu vitana, aku: ‘Ndzi kombela ku u ndzi wuyela ni cipawana’. Kanilezvi, a wasati loye aku: ‘A ndzi na pawa ya ku ku nyika. Ndzova ni mapa matsongwani ni zvifurana kasi ndzi maha zva ku hi dambuleta mina ni n’wana wa mina basi’. Elija aku: ‘Jehovha i tsumbisile lezvaku loku u ndzi mahela cipawana ndziga, a mapa ya wena ni mafura zvi nga ta mbhela kala kuna vhula’.

A wasati loye i no famba kaya kakwe a ya mu mahela pawa a muphrofeti wa Jehovha. A wasati loye zvin’we ni n’wana wakwe, va nova ni zvakuga masiku wontlhe kala kuna vhula. Jehovha i mahile lezvi a nga tsumbisile. A mapa ni mafura a zvi mbhelangi lomu ka timbita ta wasati loye, zvi wa tshama na zvi tele.

 Hi ndzhako ka cikhati, ku no maheka nchumu wo bayisa. A mufanyana wa wasati loye i no babya a gumesa afa. I no khongotela Elija lezvaku a mu vhuna. Elija i no teka n’wanana a famba naye ka kwarutu yo kari le hehla ka yindlu ya wasati loye. I no mu etlelisa laha mubhedhini, a maha mukombelo aku: ‘Jehovha, ndzi kombela ku u vhuxa n’wanana loyi a hanya’. Wa zvi tiva a ku hikuyini wu nga hi nchumu wo hlamalisa a ku Jehovha a vhuxa n’wanana loye? Hi ku ka cikhati leco, zvi wa nga se tshuka zvi zwala ku ku vhuxilwe munhu a nga file. Niku a wasati loyi ni n’wana wakwe va wa nga hi vaIzrayeli.

Kanilezvi, a mufanyana loyi a nga file i no vhuka, a sangula ku hefemula. Elija i no byela noni leyo aku: ‘Wa mu wona! A n’wana wa wena i vhukile, wa hanya’. I no tsaka nguvhu, a byela Elija aku: ‘Hakunene wena u munhu wa Nungungulu. Lezvo ndzi zvi tiva hi ku wena u wula lezvi Jehovha a ku rumako ku wula, niku zva maheka’.