Ka cikhati leco, a Mufumo wa Asiriya wu wa hlulile a mufumo wa Izrayeli wa 10 wa tixaka. Makunu Senakeribhe a hosi ya Asiriya, i wa lava ku teka mufumo wa Judha wa tixaka timbiri. I no sangula ku teka madhoropa ya Judha hi gin’we gin’we. Kanilezvi, a dhoropa legi a nga gi lava nguvhu hi legi ga Jerusalema. Senakeribhe i wa nga zvi tivi lezvaku Jerusalema gi wa vhikelwa hi Jehovha.

Hezekiya hosi ya Judha, i no mu nyika mali yo tala Senakeribhe kasi a nga dhumeli Jerusalema. Hambu lezvi Senakeribhe a nga teka mali, i simamile ku rumela masochwa yakwe ya ntamu lezvaku ma ya dhumela Jerusalema. A vanhu lomu dhoropeni va no sangula ku chava hakuva a vaAsiriya va wa hi kusuhani ni ku nghena. Hezekiya i no va byela lezvi: ‘Mu nga chavi. A vaAsiriya va na ni ntamu futsi, kanilezvi Jehovha i ta hi nyika ntamu wa ku hundza vona’.

Senakeribhe i no ruma Rabxeka lezvaku a ya poyilela vanhu va Jerusalema. Rabxeka i no ya yima lahandle ka dhoropa a banguleka, aku: ‘Jehovha a nga ta zvi kota ku mu vhuna. Mu nga vhumeli ku kalavelwa hi Hezekiya. A ku na nungungulu a nga ni ntamu wa ku mu vhikela ka hina’.

Hezekiya i no wutisa Jehovha lezvi a nga fanele ku maha. Jehovha i no hlamula aku: ‘U nga chavi lezvi Rabxeka a wulako. Senakeribhe a nga ta teka Jerusalema’. Hi kulandzela, Senakeribhe i no rumela mapapilo yo kari ka Hezekiya. A mapapilo lawo ma waku: ‘Tekela ku ndzi nyika dhoropa. Jehovha a nga ta zvi kota ku ku ponisa.’ Hezekiya i no maha mukombelo aku: ‘Jehovha hi kombela ku u hi ponisa, kasi vontlhe va fela ku zvi tiva lezvaku hi wena wece Nungungulu wa lisine’. Jehovha aku: ‘A hosi ya Asiriya yi nga ta nghena lomu Jerusalema. Ndzi ta vhikela a dhoropa ga mina’.

Senakeribhe i wa ti byela lezvaku ku wo kiyela cikhati ci tsongwani kasi a teka Jerusalema a gi fumela. Ne i wa nga kanakani. Kanilezvi ka wusiku galego, Jehovha i no rumela ngilozi  yiya le handle ka dhoropa — laha a masochwa ya Senakeribhe ma nga gwimbile kona a matenda yabye — yi ya daya 185 000 wa masochwa! Ku no dawa masochwa ya Hosi Senakeribhe lawa ya ntamu ka wontlhe, a salisa zvezvi. I wa nga ha hi na cin’wani co maha. I wa hlulilwe futsi. A se tlhela kaya. Jehovha i no vhikela Hezekiya ni Jerusalema, kota lezvi a nga tsumbisile. Loku wenawu u wa hi le Jerusalema, na u mu tsumbile Jehovha ke?