Josiya i sangulile ku fuma le tikweni ga Judha na a hi ni 8 wa malembe. Masikwini lawo, a vanhu va wa maha zvilo zvo tala zva wudhimoni va tlhela va khozela zvifananiso. Laha Josiya a nga hi ni 16 wa malembe, i no zama ku gondza ndlela ya yi nene ya ku khozela Jehovha. A cikhati leci a nga tlhanganisa 20 wa malembe, i no sangula ku khungumulela zvifananiso ni maalati lomu tikweni gontlhe. Laha a nga hi ni 26 wa malembe, i no longisela ku vhuxa a tempeli ya Jehovha.

Mupristi wa hombe Hilkiya, i no kuma bhuku ga Nayo wa Jehovha lomu tempeleni. A bhuku lego, kuzvilava hi galegi gi nga tsaliwa hi Mosi. Xafani, a matsalani wa hosi, i nota ni bhuku lego ga Nayo a ta sangula ku lera hi gezu ga hombe mahlweni ka Josiya. A cikhati leci Josiya a nga kari a ingisela, i no pola lezvaku ku wa hundza malembe yo tala a vanhu na va tsikile ku ingisa Jehovha. Hosi Josiya i no byela Hilkiya aku: ‘Jehovha i hi kwatile nguvhu. Famba u ya wulawula naye. I ta hi byela lezvi hi faneleko ku maha’. Jehovha i no hlamula hi ku tirisa muphrofeti Huldha, aku: ‘A vanhu va lomu Judha va ndzi tsikile. Va ta tsayisiwa. Kanilezvi, ndzi nga ta va tsayisa zvezvi Josiya a fumako, hakuva i ti koramisile mahlweni ka mina’.

Loku Josiya a zvi zwile, i noya tempeleni a ya vitana vanhu vontlhe va ka Judha vata. I no gumesa a lera Nayo wa Jehovha hi gezu ga hombe kasi a vanhu vontlhe va wuzwa. Josiya ni vanhu vontlhe va no tsumbisa ku va ta ingisa Jehovha hi timbilu tabye tontlhe.

Makunu ku wa hundza malembe yo tala a vanhu va ka Judha na va nga mahi Pasika. Kanilezvi, a cikhati leci Josiya a nga lera lomu ka Nayo lezvaku a Pasika gi wa fanele ku mahiwa lembe ni lembe, i no byela vanhu vontlhe aku: ‘Hi ta maha Pasika ya Jehovha’. Josiya i no sangula ku longisela zvilo zvo tala kasi a maha hi zvona minyikelo, a tlhela a longisela vanhu kasi va yimbelela tisimu le tempeleni. A vanhu va noga Pasika, va gumesa va maha Mubuzo wa Zvibaba zvi nga Hiko na Comelo, lowu wu nga mbheta 7 wa masiku. Kusukela masikwini ya Samuweli, ku wa nga se mahiwa Pasika go fana ni lego. Hakunene Josiya i wa randza Nayo wa Nungungulu. Zva ku tsakisa ku gondza xungetano hi Jehovha?