Ben-Hadhadhe a hosi ya Siriya, yi wa tshama hi ku dhumela vaIzrayeli. Kanilezvi, contlhe cikhati muphrofeti Elixa i wa byela hosi ya Izrayeli lezvaku yi fihlala kasi yi nga dawi. Hikwalaho, Ben-Hadhadhe i no zvi wona zvi hi chukwana ku khoma Elixa a famba naye. Ben-Hadhadhe i no tiva lezvaku Elixa i le dhoropeni ga Dhotani. Hikwalaho, i no rumela masochwa ya Siriya kasi ma ya khoma Elixa.

A vaSiriya va noya le Dhotani ni wusiku. Ni mixo ya kona, a mutiri wa Elixa i no huma lahandle zvonake a wona lezvaku lomu matlhelweni ka dhoropa ku wa hi ni masochwa yo tala. I no chava nguvhu zvonake a keta aku: ‘Elixa hi ta kuyini’? Elixa aku: ‘Lava va nga na hina va tele nguvhu ku hundza lava va nga na vona.’ Ka cikhati leco, Jehovha i no vhulula mahlo ya mutiri wa Elixa a wona lezvaku a zvitsunga lezvi zvi nga hi lomu matlhelweni ka dhoropa, zvi wa tele hi mahaxi ni tikareta ta yimpi ti vhurako ndzilo.

A cikhati leci a masochwa ya Siriya ma nga zama ku khoma Elixa, i no maha mukombelo, aku: ‘Jehovha, va vhale mahlo va nga woni’. Hambu lezvi a masochwa lawo ma nga kari ma wona, ma no lahleka hi  citshuketi, na nga ha ku tivi lomu ma nga hi kona. Elixa i no byela masochwa lawo aku: ‘Mu lahlekile. A hi gona dhoropa legi mu gi lavako. A hi fambeni ndzi mu heleketa ka wanuna loyi mu mu lavako’. Va no famba na Elixa kala le Samariya, lomu yi nga tshama kona a hosi ya Izrayeli.

Hi ndzhako ka cikhati, a vaSiriya va no ku tiva lomu va nga hi kona. A hosi ya Izrayeli yi no wutisa Elixa yiku: ‘Ndzi va daya ke?’ Xana Elixa i gi wonile gi hi lungelo ga ku va nyikela va dawa, kota lezvi va nga lava ku mu xanisa? Ahihi. Elixa i te: ‘U nga va dayi. Va nyike zvakuga, u gumesa u va tsika va famba’. Hikwalaho, a hosi yi no va mahela festa ya hombe, yi gumesa yi va tsika va tlhela kaya kabye.