Vamakabye va hina vo randzeka:

Kota vakhozeli va Jehovha, hontlheni ha yi randza nguvhu a Mhaka yakwe — a Bhibhiliya. Hina Timboni ta Jehovha ha tsumba lezvaku a Bhibhiliya gi na ni matimu ya lisine, wurangeli go tsumbeka wutomini ga siku ni siku, ni cikombiso co tsakisa ca lezvaku Jehovha wa va randza vanhu vontlhe. (Lisimu 119:105; Luka 1:3; 1 Johani 4:19) Hi xalala nguvhu hi ku vhuna van’wani lezvaku va tiva lisine la lisima li nga lomu ka Mhaka ya Nungungulu. Hi cigelo leco, hina Hubye yi Fumako, hi tsaka nguvhu hi ku humesa a bhuku legi gi nga ni hloko ya maha: “Gondza ka matimu ya Bhibhiliya.” Ha ha mu byela zvitsongwani hi bhuku legi.

A zvipandze zvo tala zva bhuku legi zvi mahelwe ku vhuna vanana. Hambulezvo, zvi nga ha tirisiwa kasi ku vhuna vanhu va hombe kambe lava va lavako ku gondza zvin’wani xungetano hi Bhibhiliya. Kota lezvi a Bhibhiliya gi nga bhuku gi mahelweko ku vhuna vanhu vontlhe, handle ko kanakana hontlheni hi ta vhuneka hi ku vhuxeta lezvi gi hi gondzisako, niku lezvo zvi nga hi vhuna ku kuma litsako la lisine.

A bhuku legi gi hi hlawutela matimu ya vanhu — kusukela kuvangiweni ka vona zviya mahlweni — na gi tirisa mahungu ma nga lomu ka Bhibhiliya. Ku mahilwe zvontlhe zvi kotekako kasi a bhuku legi gi tlhamusela matimu ya Bhibhiliya hi ndlela yo olova ni yo zwisiseka khwatsi. Ahandle ka lezvo, hi zamile ku ma xaxameta hi kuya hi cikhati leci ma nga maheka hi cona — hi laha zvi kotekileko hi kona.

Hambulezvo, a bhuku legi a gi gumelwi laha ka ku hlawutela matimu ya Bhibhiliya basi. A mahungu ya gona ni mifota ya kona zvi longiselwe hi ndlela yi mahako lezvaku a matimu ya Bhibhiliya ma hanya ni ku komba lezvi lava hi wulawulako hi vona va nga ti zwisa zvona.

A bhuku legi gi hi vhuna ku wona lezvaku a Bhibhiliya i bhuku gi wulawulako hi vanhu — lava va nga ingisa Jehovha ni lava va nga kala ku mu ingisa. Gi hi kuca ku gondza cokari kambe ka matimu yabye. (Va Le Roma  15:4; 1 Va Le Korinte 10:6) A bhuku legi gi avanyisilwe hi 14 wa zvipandze. Laha ci sangulako kona a cipandze cin’we ni cin’wani, ku na ni mitlhamuselo yitsongwani ya lezvi hi nga gondzako ka cipandze leco.

Loku u hi mupswali, u nga lera cigondzo co kari ni n’wana wa wena zvonake mu bhula hi mifota ya cigondzo leco. Hi kulandzela, mu nga lera mavhesi ya Bhibhiliya lawa a cigondzo leco ci seketelwako ka wona. Vhuna n’wana wa wena lezvaku a zwisisa lezvi a mavhesi lawo a nga lera lomu ka Bhibhiliya ma zwananisako zvona ni lezvi a zvi gondzako ka cigondzo leco. A mahela legi gi nga vhuna loku u kari u vhuna munhu wa hombe kambe lezvaku a kuma masemanyana ya lezvi a Bhibhiliya gi wulawulako hi zvona.

Hi rindzela ku a bhuku legi gi vhuna vanhu vontlhe va timbilu ti nene — vanana ni vahombe — lezvaku va gondza zvokari lomu ka Mhaka ya Nungungulu va tlhela va zvi tirisa wutomini gabye. Loku va maha lezvo, vonawu va ta khozela Jehovha kota zviro zva ngango wakwe wo randzeka.