1, 2. Xana Jesu mukongomisi wo tlhariha hi ndlela muni?

TI WONE na u kombakombiwa a doropa go hlamalisa ni go saseka nguvu hi munhu a gi tivako khwatsi. Wena ni lava u nga navo mo gonza kuya ka doropa lego, hikwalaho mu tsumba mu tlhela mu lanzela zontlhe lezi mu byeliwako hi mukongomisi loye. A zinwani zikhati, mu ti wutisa ku xana lezi mu kalako mu nga se zi wona zi nga ngha zi tshamisile kuyini. Loku mu wutisa zilo lezo a mukongomisi wa nwina, yena i ala ku mu hlamula kala xi chikela a xikhati xa kona, nguvunguvu loku mu hi kusuhani ni ku chikela matshanwini lawo. Hi kufamba ka xikhati, uya u hlamala nguvu a wutlhari ga mukongomisi loye hakuva i mu byela lezi mu faneleko ku zi tiva hi xikhati xi faneleko.

² A maKristu ya lisine ma ka xiyimo xo fana ni lexo. Hi mbilu yontlhe, hi gonza xungetano hi doropa go hlamalisa ka wontlhe, “a muti lowu wu nga ni ziseketelo” za lisine, wu nga Mufumo wa Nungungulu. (Maheb. 11:10) A xikhati lexi a nga hi laha misaveni, Jesu wutsumbu i vunile a valanzeli vakwe lezaku vava ni wutivi go eta hi Mufumo. Xana yena i hlamulile a ziwutiso zabye zontlhe a tlhela a va byela zilo zontlhe xungetano hi Mufumo hi khati ginwe? Ahihi. Yena i te ngalo: “Nza ha hi ni timhaka tinyingi a ku kanela ka nwina, kanilezi ti nga mu tsanza makunu.” (Joh. 16:12) Kota mukongomisi wo tlhariha nguvu ka vontlhe, Jesu cima a nga tatangi a vapizani vakwe hi wutivi legi va nga kala va nga longangi a ku gi zwisisa.

3, 4. a) Xana Jesu i simamisa kuyini ku gonzisa vanhu vo tsumbeka xungetano hi Mufumo wa Nungungulu? b) Zini hi to zi kambisisa ka xipimo lexi?

³ Jesu i wulile a magezu lawa ma nga tsaliwa ka Johani 16:12 ka wusiku gakwe go gumesa laha misaveni. Xana Jesu i wa ta simamisa kuyini a ku gonzisa vanhu vo tsumbeka xungetano hi Mufumo anzhako ka kufa kakwe? Yena i tiyisile a vapostoli vakwe hi magezu lawa: A “Moya wa zinene, i ta mu rangela zineneni zontlhe.” * (Joh. 16:13) Hi nga ha alakanyela a moya wa ku basa kota mukongomisi wa lihlaza-mbilu. A moya lowo i ndlela leyi Jesu a yi tirisako kasi ku gonzisa a valanzeli vakwe zontlhe lezi va faneleko ku zi tiva xungetano hi Mufumo wa Nungungulu — hi xikhati xi faneleko.

⁴ A hi woneni lezi a moya wa ku basa wa Jehova wu tako na wu vunisa zona a maKristu yo tsumbeka lezaku ma kuma wutivi go eta  xungetano hi Mufumo lowo. A kuranga, hi ta wulawula hi kuzwisisa ka hina xungetano hi xikhati lexi a Mufumo wa Nungungulu wu nga sangula hi xona ku fuma. Hi ta tlhela hi wulawula hi ku hi vamani a varangeli ni vafumelwi va Mufumo ni lomu va rinzelako ku wu tirela kona xikhatini xi tako. Hi kugumesa, hi ta wona lezi a valanzeli va Kristu va ma kumisileko zona a mazwisisela ma nene xungetano hi kutsumbeka Mufunweni.

5, 6. a) Mawonela muni ya hava lawa a Zigonzani za Biblia zi nga hi nawo xungetano hi kuyimiswa ka Mufumo ni xikhati xa kutshovela? b) Hikuyini a mawonela lawo ya hava ma nga kala ku vuxa kukanakana ka lezaku Jesu i wa kongomisa a valanzeli vakwe?

⁵ Kota lezi hi zi wonileko ka Xipimo 2 xa bhuku legi, hi makume ya malembe a Zigonzani za Biblia zi wa khanyisa lezaku a lembe ga 1914 gi wa tava lembe ga lisima kutatisekeni ka wuprofeti ga Biblia. Hambulezo, xikhatini lexo va wa kholwa lezaku a kuvakona ka Kristu ku wa sangulile hi 1874, niku i wa sangulile ku fuma le tilweni hi 1878, ni lezaku a Mufumo wu wa nga ta yimiswa hi kumbheleleko na a nga se chikela Outubro wa 1914. A kutshovela ku wa ta maheka kusukela 1874 kala 1914 niku ku wa ta gumesa hi kutekiwa ka vatotilweko vaya tilweni. Xana a mawonela ya hava yo fana ni lawa ma vangile kukanakana ka lezaku Jesu i wa kongomisa a vatsumbekileko lavo hi moya wa ku basa ke?

⁶ Ne ni kutsongwani! Tlhela u ehleketa hi mufananiso wa hina wa le kusanguleni. Xana a kuxuva ku tiva zo tala ka vaenzi lavayani hi va kumbukileko ni ziwutiso zabye, za vuxa kukanakana xungetano hi kutsumbeka ka mukongomisi wabye? Ahihi! Hi kufanana, hambu lezi zikhati zinwani a vanhu va Nungungulu va zamako ku tiva zilo xungetano hi kungo ga Nungungulu na xi nga se chikela a xikhati xa lezaku a moya wa ku basa wu va kongomisa lisineni lelo, zi te dlunya lezaku Jesu wa va rangela. Hikwalaho, a vatsumbekileko va komba lezaku va ti yimisele ku lulamisiwa ni ku cica mawonela yabye hi kutikoramisa. — Jak. 4:6.

7. A vanhu va Nungungulu va katekisilwe hi wutivi muni ga moya?

⁷ Ka malembe ya nzhako ka 1919, a vanhu va Nungungulu va katekisilwe hi wutivi ga moya gi ngaya gi anza. (Gonza Tisimu 97:11.) Hi 1925, ku humesilwe a nzima ya lisima nguvu ka The Watch Tower, yi nga hi ni hloko ya mhaka “Kuyimiswa ka Tiko.” Yi tlhamusele hi kudlunyatekileko, hi kuya hi Mitsalo, lezaku a Mufumo wa wuMessia wu wa yimisilwe hi 1914, kota kutatiseka ka xiprofeto xa wasati wa le tilweni wa Nungungulu loyi a belekako mufana, hi kuya hi Kuvululelwa xipimo 12. * A nzima leyo yi tlhelile yi komba lezaku a kuxaniswa ni zikarato za vanhu va Jehova masikwini lawo ya yimpi zi wa hi xikombiso xa laha kubaseni xa lezaku Satani i wa hoxilwe hi le tilweni, “na a zangarile nguvu, hakuva wa zi tiva lezaku a xikhati lexi xi mu saleleko xi tsongwanyani.” — Kuv. 12:12.

8, 9. a) Xana a lisima la Mufumo wa Nungungulu li sangulile ku zwisisiwa hi ndlela muni? b) Ziwutiso muni hi to zi kambisisa?

⁸ Xana a Mufumo ngwa lisima ku ya chikela kwihi? Hi 1928, The Watch Tower i lo sangula ku komba lezaku a Mufumo ngwa lisima nguvu ku hunza a kuponisiwa ka munhu hi ku tirisa a nzhiho. Hakunene, hi ku tirisa a Mufumo wa wuMessia Jehova i ta basisa a vito gakwe, a lwela wuhosi gakwe, ni ku tatisa a makungo yakwe xungetano hi vanhu.

 ⁹ Hi vamani va to fuma zinwe na Kristu Mufunweni? Hi vamani va tova vafumelwi va laha misaveni va Mufumo lowo? Niku i ntiro muni lowu a valanzeli va Kristu va faneleko ku ngha va wu maha?

10. Hi malembe yo tala, zini lezi a vanhu va Nungungulu va tako na va zi zwisisa xungetano hi lava va 144.000?

¹⁰ Ka makume ya malembe ya mahlweni ka 1914, a maKristu ya lisine ma wa sina ma zi zwisisa lezaku a valanzeli vo tsumbeka va Kristu va 144.000 va ta fuma zinwe na Kristu le tilweni. * A Zigonzani lezo za Biblia zi wonile lezaku a hlayo leyo yi wa hi ya xiviri niku yi sangulile ku hlengeletwa ka zana ga malembe go sangula Nguveni ya Hina.

11. Xana lava va tova ziro za muswika wa Kristu va simamile kuva ni kuzwisisa ko eta hi ntiro lowu va nyikilweko ku maha laha misaveni hi ndlela muni?

¹¹ Kanilezi, xana a ziro lezo zi nga wa ta wumba a muswika wa Kristu zi wa ta maha yini na za ha hi misaveni? Zona zi wonile lezaku Jesu i wa khanyisile a ntiro wa kuxumayela a tlhela a wu yelanisa ni xikhati xa kutshovela. (Mat. 9:37; Joh. 4:35) Kota lezi hi zi wonileko ka Xipimo 2, hi xikhati xo kari va wa alakanya lezaku a xikhati xa kutshovela xi wa ta teka 40 wa malembe, xi gumesa hi kutekiwa ka vatotilweko vaya tilweni. Hambulezo, kota lezi a ntiro wu simamileko anzhako ka 40 wa malembe, ku wa laveka mazwisisela maswa. Zalezi ha zi tiva ku ngalo hi lisine a xikhati xa kutshovela — yi nga nguva ya ku hambanyisa a mavele ni nyasavari, ku nga ku hambanyisa a maKristu yo tsumbeka ma totilweko ni maKristu ya mawunwa — xi sangulile hi 1914. Xi wa chikele a xikhati xa ku hlengeleta a misalela ya ntlawa lowo wu yako tilweni!

12, 13. Xana a mifananiso ya Jesu ya khume ga vanhwana ni titalenta yi tatisekisa kuyini masikwini yo gumesa?

¹² Kusukela 1919 kuya mahlweni, Kristu i simama ku kongomisa a nanza gi tsumbekileko ni go tlhariha lezaku gi khanyisa a ntiro wa kuxumayela. Ka zana ga malembe go sangula, yena i wa mahile zo fana ni lezo. (Mat. 28:19, 20) I tlhelile a komba a matshamela lawa a valanzeli vakwe va totilweko va faneleko kuva nawo kasi ku maha ntiro wa kuxumayela. Hi ndlela muni? Ka mufananiso wakwe wa khume ga vanhwana, yena i kombile lezaku a vatotilweko va fanele ku tshama na va rinzele, na va khindlimukile hi tlhelo ga moya, lezaku va zi kota ku tatisa a kungo gabye ga hombe ga ku ya hlengela mubuzweni wa hombe wa muchado le tilweni, a xikhati lexi Kristu a to chada ni “muswika” wakwe a wumbiwako hi 144.000 wa vanhu. (Kuv. 21:2) Niku, ka mufananiso wakwe wa titalenta,  Jesu i gonzisile lezaku a malanza yakwe ma totilweko ma fanele ku ti karatela ku maha a ntiro wa kuxumayela lowu yena a ma nyikileko. — Mat. 25:1-30.

¹³ Ka zana ga malembe legi ga ha hi ku hunzako, a vatotilweko va kombisile a moya wa kurinzela ni wa kutikarata. Handle ko kanakana, a kurinzela kabye ku ta chachazelwa! Kanilezi, xana a ntiro wa hombe wa kutshovela wu wa ta gumelwa ntsena kuhlengeletweni ka misalela ya vafumeli-kulobye va Kristu va 144.000 ke?

14, 15. A bhuku The Finished Mystery gi wulawulile hi mitlawa muni ya mune yo hambana?

¹⁴ Hi xikhati xo leha, a vavanuna ni vavasati vo tsumbeka vata na va xuva nguvu ku tiva zo tala xungetano hi “xidlemo xa tsanza-vahlayi” lexi xi kumbukiwako ka Kuvululelwa 7:9-14. Hikwalaho, a hi faneli ku hlamala hi lezi mahlweni ka kuva Kristu a tlhamusele a ku hi vamani va wumbako a ntlawa lowu wa hombe, ku nga kari ku wuliwa zo tala hi lisine lo dlunyateka leli nyamutlha hi li ranzako.

¹⁵ Hi 1917, a bhuku The Finished Mystery (A Fihlakalo wu Tatisekileko) gi wulile lezaku “ku na ni tixaka timbiri ta kuponiswa ka le Tilweni, ni tixaka timbiri ta kuponiswa ka laha misaveni.” Hi vamani va nga lumba a tixaka leti ta mune ti nga hi ni kutsumba ko hambana? A lixaka lo sangula li wa hi la lava va 144.000, va nga wa ta fuma na Kristu. A la wumbiri li wa hi xidlemo xa tsanza-vahlayi. Xikhatini lexo, ku wa alakanyiwa lezaku a xidlemo lexi xi wa wumbiwa hi lava va nga ti wula maKristu va nga haya tichechini ta wuKristu ga mawunwa. Va wa hi ni kukholwa ko kari kanilezi ku wa nga tiyangi hi kumbhelela. Hikwalaho, va wa ta nyikiwa zitshamu za lahasi le tilweni. Kanilezi laha misaveni ku wa ta hanya a ntlawa wa wunharu wa “valulamileko va kale” — vo kota Abrahama, Mosi, ni vanwani — lava va nga wa tava varangeli va ntlawa wa wumune, ku nga vanhu va tiko laha va yileko.

16. Kuwonekela muni ka moya ku tileko hi 1923 ni 1932?

¹⁶ Xana a moya wa ku basa wu va kongomisisile kuyini a valanzeli va Kristu lisineni lo zwisiseka leli inyamutlha hi li ranzako? A kuwonekela loko ka moya ku humelele hi kutsongwani-kutsongwani. Kusanguleni ka 1923, The Watch Tower i wulawulile hi ntlawa lowu wu nga hiko na kutsumba ka kuya tilweni, kanilezi wu to hanya misaveni na wu fumelwa hi Kristu. Hi 1932, The Watchtower i wulawulile hi Jehonadaba, loyi a nga ti nyikela ka a totilweko wa Nungungulu Jehu, a Hosi ya Israeli, lezaku a mu seketela yimpini yakwe ya ku fuvisa a wukhozeli ga mawunwa. (2 Tih. 10:15-17) A nzima leyo yi te ngalo, masikwini ya hina ku na ni ntlawa wa vanhu vo fana na Jehonadaba, yi engeta yiku Jehova i ta ponisa a ntlawa lowo “yimpini ya Har–Magedoni” lezaku wu hanya kwalaha misaveni.

17. a) Kuwonekela muni ka hombe ka moya ku ngave kona hi 1935? b) Xana a mazwisisela maswa xungetano hi xidlemo xa tsanza-vahlayi ma ma khumbisile kuyini a maKristu yo tsumbeka? (Wona a kwadru “A vanyingi va te hefu hi kutsaka.”)

¹⁷ Hi 1935 ku tile kuwonekela ka hombe ka moya. Ka gotsovanyano lowu wu mahilweko le Washington, D.C., a xidlemo xa tsanza-vahlayi xi tlhamuselwe kota ntlawa wa laha misaveni, wu nga walowu wu kumbukilweko hi Jesu mufananisweni wakwe wa tiyivu  ni timbuti. (Mat. 25:33-40) A xidlemo xa tsanza-vahlayi xi maha xipanze xa “tiyivu tinwani,” leti Jesu a ngaku: “Na tona kambe nzi fanele ku ti neha.” (Joh. 10:16) A xikhati lexi a mukaneli, J. F. Rutherford, a ngaku: “Hi kombela lezaku vontlhe lava va nga ni kutsumba ka ku hanya kala kupinzuka misaveni va suka va yima,” a ku hunza khihlanya ga lava va nga hi kona gotsovanyanweni va lo suka va yima! Yena i te ngalo: “Hi nga wonani a xidlemo xa tsanza-vahlayi!” A votala va khumbekile nguvu hi lezi makunu va nga zwisisa a kutsumba kabye ka wumanziko.

18. Xana a valanzeli va Kristu va ti tsitsiritisile kuyini ntirweni wa kuxumayela, niku zini va zi bhinzuleko?

¹⁸ Kusukela xikhatini lexo, Kristu i kongomisa a vanhu vakwe lezaku va hlengeleta a ziro za xidlemo xa tsanza-vahlayi lexi xi to pona kuxanisekeni ka hombe. A kusanguleni, zi wa ku khwatsi a xidlemo lexo xi wa nga ta tshuka xi tsanza vahlayi. Makabye Rutherford i zile a wula lezi: “Ko khwatsi a ‘xidlemo xa tsanza-vahlayi’ xi nga tava xa hombe nguvu.” Kanilezi, inyamutlha ha zi tiva lezi Jehova a wu katekisisako zona a ntiro wa kutshovela kusukela xikhatini lexo! Na va kongomisiwa hi Jesu zinwe ni moya wa ku basa, a vatotilweko ni vanghana vabye va “tiyivu tinwani” va wumba “ntlhambi munwe” lowu wu tirako zinwe na wu rangelwa hi “murisi munwe” — kota lezi a zi profetileko.

19. Xana hina hi nga hlengelisa kuyini kuengeteleni ka xidlemo xa tsanza-vahlayi?

¹⁹ A kutala ka vanhu vo tsumbeka va ta hanya kala kupinzuka paradiseni kwalaha misaveni, na va fumelwa hi Kristu zinwe ni tihosi-kulobye ta 144.000. Xana a zi tsakisi ku ehleketa hi lezi Kristu a rangelisako zona vanhu va Nungungulu lezaku va zwisisa a kutsumba kabye ka wumanziko ku seketelwako Mitsalweni ke? Hakunene, hi na ni lungelo ga hombe ga ku tivisa a kutsumba ka hina ka lava hi va kumako ntirweni wa kuxumayela! Hikwalaho a hi ti tsitsiriteni hi laha hi zi kotako hi kona lezaku a xidlemo lexi xa tsanza-vahlayi xi simama xi anza, xi kanyuluka hi gezu ga hombe xi dumisa a vito ga Jehova! — Gonza Luka 10:2.

20. Mafambisela muni ma wumbako a hlengeletano ya Satani, niku xana wona ma khumbisa kuyini a kutsumbeka ka muKristu?

²⁰ Khwatsi hi lezi a vanhu va Nungungulu va nga simama ku gonza xungetano hi Mufumo, va wa fanele ku zwisisa khwatsi kambe lezi zi wulako zona a ku tsumbeka mufunweni wa le tilweni. Mhakeni leyi, hi 1922, The Watch Tower i wulile lezaku ku na ni tihlengeletano timbiri, ya Jehova ni ya Satani; leyi ya Satani yi wumbiwa hi mafambisela ya mabhinzu, ya wukhongeli, ni ya wupolitika. Lava va tsumbekileko ka Mufumo wa Nungungulu lowu wu fumelwako hi Kristu a va faneli ku onha a kutsumbeka kabye hi ku ti nghenisela ni ka gihi fambisela ga hlengeletano ya Satani. (2 Kor. 6:17) Zi wula yini lezo?

21. a) A nanza gi tsumbekileko gi va tlharihisisa kuyini a vanhu va Nungungulu xungetano hi ku ti nghenisela mafambiseleni ya mabhinzu ke? b) Hi 1963, zini lezi The Watchtower a zi wulileko xungetano hi “Babuloni loyi wa hombe”?

²¹ Hi kukhanzakanya, a zakuga za moya zi tako hi ka nanza go tsumbeka zita na zi paluxa a wukanganyisi legi gi nga kona mafambiseleni ya mabhinzu, zi tlhela zi tlharihisa a vanhu va Nungungulu lezaku va nga ti ngheniseli kuhlongoliseni ka titshomba loku ku vuvumisiwako nguvu inyamutlha. (Mat. 6:24) Hi kufanana, a mabhuku ya hina mata na ma dlunyatisa khwatsi a matshamela ya xipanze xa wukhongeli xa hlengeletano ya Satani. Hi 1963,  The Watchtower i zi dlunyatisile lezaku “Babuloni wa Hombe” a nga yimeli ntsena a wuKristu ga mawunwa kanilezi i yimela kambe a Mufumo wa misava yontlhe wa wukhongeli ga mawunwa. Hikwalaho, kota lezi hi to zi wona khwatsi ka Xipimo 10 xa bhuku legi, a vanhu va Nungungulu va matiko wontlhe ni midawuko yo hambanahambana va vunilwe ku ‘huma ka yena,’ va ti basisa ka manyala wontlhe ya wukhongeli ga mawunwa. — Kuv. 18:2, 4.

22. Xikhatini xa Yimpi yo Sangula ya Misava, xana a vanhu vo tala va Nungungulu va wa gi zwisisa kuyini a wusungukati ga Va le Roma 13:1?

²² Kanilezi, ahati a xipanze xa wupolitika xa hlengeletano ya Satani? Xana a maKristu ya lisine ma fanele ku ti nghenisela tiyimpini ni kulwisaneni ka matiko? Xikhatini xa Yimpi yo Sangula ya Misava, a Zigonzani za Biblia zi wa zwisisa lezaku a valanzeli va Kristu a va faneli ku daya vanhu-kulobye. (Mat. 26:52) Kanilezi, a votala va wa alakanya lezaku a wusungukati ga ku “ingisa a mufumo” legi gi kumekako ka Va Le Roma 13:1, gi wa wula lezaku va fanele kuya wusochweni, va boha tinguwo ta wusochwa, va tlhela va khoma zibhamu; kanilezi loku va kombeliwa a ku duwula a nala, va wa fanele ku duwula moyeni.

23, 24. Xikhatini xa Yimpi ya Wumbiri ya Misava hi wa mu zwisisa kuyini Va le Roma 13:1, niku xana a valanzeli va Kristu va kongomisilwe ka mazwisisela muni ma chukwatisilweko?

²³ Laha a Yimpi ya Wumbiri ya Misava yi nga kari yi sangula ku xakatsa hi 1939, The Watchtower i kambisisile hi kuetileko a mhaka ya ku nga ti ngheniseli tiyimpini. A nzima leyo yi zi dlunyatisile lezaku a maKristu a ma faneli ku hlengela tiyimpini tontlhe ni kulwisaneni ka matiko ma fumelwako hi Satani. Kuve wurangeli gi chikeleko hi xikhati xi faneleko! Hi ndlela leyo, a valanzeli va Kristu va lo vikelwa nanzweni wa nkhata lowu a matiko ma ngave nawo yimpini leyo. Kanilezi, kusukela 1929, a mabhuku ya hina ma wa tlhamusela lezaku a vafumeli lava va wuliwako ka Va Le Roma  13:1 a hi vafumeli va misava, kanilezi hi Jehova na Jesu. Ku wa ha hi ni xilaveko xo zwisisa zinwani mhakeni leyi.

²⁴ A moya wa ku basa wu kongomisile a valanzeli va Kristu ka wutivi lego hi 1962, loku ku tlhamuselwe Va Le Roma 13:1-7 ka tinzima ta The Watchtower wa 15 ka Novembro ni 1 ka Dezembro. Hi magumo, a vanhu va Nungungulu va zwisisile lezaku a kuingisa kabye a mufumo ka gumelwa kota lezi Jesu a zi wulileko magezwini yakwe yo tiveka nguvu: “Tlhelisani ka Kesari, lezi zi nga za Kesari, ni ka Nungungulu lezi zi nga za Nungungulu.” (Luka 20:25) Inyamutlha a maKristu ya lisine ma zi zwisisa lezaku a mufumo ku wuliwa mifumo ya tiko legi ni lezaku ma fanele ku yi ingisa. Kanilezi a kuingisa kabye ku na ni mbhingano. Loku a vafumeli va hi kombela lezaku hi nga ingisi Jehova Nungungulu, hi hlamula ku fana ni vapostoli va kale lava va ngaku: “Hi fanele ku ingisa Nungungulu ku hunza ku ingisa vanhu.” (Miti. 5:29) Ka Zipimo 13 ni 14 za bhuku legi, hi ta gonza zo tala xungetano hi lezi a vanhu va Nungungulu va gi ingisisako zona a tshinya ga nayo ga wuKristu ga ku nga ti ngheniseli ka za wupolitika.

25. Hikuyini u tsakelako a wukongomisi ga moya wa ku basa kuzwisiseni ka wena a Mufumo wa Nungungulu?

²⁵ Ehleketa hi zontlhe lezi a valanzeli va Kristu va gonzileko xungetano hi Mufumo wa Nungungulu ka zana ga malembe legi ga ha hi ku hunzako. Hi tivile a xikhati lexi a Mufumo wa Nungungulu wu nga yimiswa hi xona le tilweni ni lisima la wona. Hi na ni kuzwisisa ko dlunyateka xungetano hi tixaka timbiri ta kutsumba loku ku nyikilweko a vanhu vo tsumbeka, ku nga kutsumba ka ku ya hanya tilweni ni ka laha misaveni. Niku ha zi tiva lezi hi nga kombisisako zona a kutsumbeka Mufunweni wa Nungungulu na hi ringanisela kuingiseni ka hina a mifumo ya misava. Ti wutise lezi, ‘Xana mina na nzi li tivile a lisine leli la lisima loku Jesu i wa nga rangelangi a nanza gi tsumbekileko laha misaveni lezaku gi li zwisisa ni ku li gonzisa ke?’ Hakunene, makatekwa ya hombe nguvu a ku kongomisiwa hi Kristu ni moya wa ku basa!