Muhuweleli-kulori a ranzekako:

TI WONE na u hi xiro xa ngango wa Beteli wa le Brooklyn hi Wazihlanu ni mixo, 2 ka Outubro wa 1914. U tshamile laha u tshamako kona wontlhe masiku lezaku u ingisela wukhozeli ga ni mixo, u rinzela a kuchikela ka makabye C. T. Russell. Hi xitshuketi, a livati la lomu mu nga kona lo vululeka zonake ku nghena makabye Russell. Kota tolovelo wakwe, yena i nyimanyana a cisela a ngango wa Beteli hi ku wula lezi, “Gi cile nwentlheni.” Kanilezi, wutshanwini ga ku tekela ku ya tshama ka xitulo xakwe xi nga le tihlokweni ta meza, iba mandla a guma a maha a xitiviso lexi xo tsakisa nguvu: “A Xikhati xa Vamatiko xi mbhelile; a tihosi tabye ti vile ni xikhati xa tona!” A wu zi koti ku ti khoma hi kutsaka — u wa sina u xi rinzele xikhati lexi kusukela kale! Wena ni ziro zinwani za ngango wa Beteli, mu amukela a mahungu lawo yo tsakisa hi kuba mandla yo vuma nguvu.

 Ka hunza makume yo tala ya malembe cima makabye Russell a nga maha a xitiviso lexo xo tsakisa nguvu. Zini lezi a Mufumo wu mahileko kusukela xikhatini lexo? Zi tele nguvu! Hi ku tirisa a lulamiselo ga Mufumo, Jehova i kari a basisa ni ku gonzisa a vanhu vakwe hi kutsongwani-kutsongwani — lava va nga hi mazana matsongwani ntsena hi 1914 kanilezi va engetelekileko va maha a ku hunza ntlhanu wa timiliyoni ni timbiri ni khihlanya inyamutlha. Xana wena wutsumbu u vunekisile kuyini hi gonziselelo leyo?

Zi tolovelekile inyamutlha a kuzwa vamakabye va hina na va wula lezi, “a kareta ya Jehova ya le tilweni ya tsutsuma!” Kanilezi hi lisine la kona, kusukela 1914 a kareta ya le tilweni, leyi yi yimelako a hlengeletano yi nga wonekiko ya Jehova, yi kari yi tsutsuma nguvu, kota lezi a xigonzo xa wukheta xa bhuku legi xi to zi kombisa. Na va lava lezaku a mahungu yo saseka ma xumayelwa misaveni yontlhe, a vahuweleli va Mufumo vata na va tirisa a tindlela tiswa to hambanahambana, a ku patsa ni maphepha-hungu, timarxa, zithombe, makartawu ya wukustumunyu, magramafoni, radiyu, hambu ni Internet.

Kota lezi Jehova a katekisako a ntiro wa hina, zalezi ha zi kota ku humesa a mabhuku yo tsakisa ma seketelwako ka Biblia hi tirimi to hunza 670 hi tlhela hi ma nyikela ka mani na mani mahala. A vatiri va kutikarata va vunetela a kuakiwa ka tiSalawu ta Mufumo, tiSalawu ta Mitlhangano ya Hombe, ni tihofisa ta maravi, matikweni yo ganya ni ka lawa ma nga wusiwaneni. Niku loku ku humelela a timhango ta ntumbuluko, a vamakabye va hina va liranzo va tsutsumela seyo kasi ku ya vuna lava va nga ka wutshamu legi gi welweko hi mhango, va kombisa lezaku hakunene va “pswalelwe ku vunetela kuxanisekeni.” — Mav. 17:17.

Zikhati zinwani, a varangeli va wukhongeli ni vanwani va hi kanetako va hi ‘tsimbeketa, vaku: I nawo,’ kanilezi za tiyisa kukholwa a ku wona lezi a mizamo yabye ya hava, zikhati zo tala, yi vunisileko zona nguvu a “ku fambisa a ivangeli.” — Tis. 94:20; Fil. 1:12.

Wudzunzo ga hombe nguvu ka hina a ku hlengela na nwina, ‘malanza-kulori.’ Tiyisekani lezaku ha mu ranza nguvu. Hi khongelela lezaku lezi zi nga lomu ka bhuku legi zi mu vuna a ku nyika lisima a tshomba ya nwina ya moya a ku hunza kale. — Mat. 24:45.

Hi mu navelela makatekwa yo tala, hi hina

Vamakabye va nwina,

Hubye yi Fumako ya Timboni ta Jehova