Hambu loku u maha zontlhe zi kotekako kasi ku hlayisa litsako wukatini ni ngangweni, ka tshuka ku humelela zilo lezi zi nga ha mu yivelako litsako. (Mutshawuteli 9:11) Hi liranzo, Nungungulu wa hi seketela loku hi kumana ni zikarato. Loku u tirisa a matshinya ya milayo ya Mitsalo lawa ma lanzelako, wena ni ngango wa wena mu ta zi kota ku yimisana nazo, hambu loku zi no karatisa kuyini.

LEZI A BIBLIA GI WULAKO: “Vekani hehla ka yena kontlhe a kukarateka ka nwina, hakuva wa mu khatalela.” (1 Pedro 5:7) Xontlhe xikhati alakanya lezaku Nungungulu a nga na nanzu hi kota ya minzhingo ya nwina. (Jakobe 1:13) A xikhati lexi u yako u tshinela ka yena, i ta ku vuna hi laha zi kotekako hi kona. (Isaya 41:10) “Chululani timbilu ta nwina mahlweni kakwe.”—Tisimu 62:8

U ta tlhela u chavelelwa loku u lera ni ku gonza a Biblia siku ni siku. Loku u maha lezo, u ta wona lezi Jehova a hi ‘chavelelisako zona kuxanisekeni ka hina kontlhe.’ (2 Va Le Korinte 1:3, 4; Va Le Roma 15:4) Yena i tsumbisa ku ku nyika “kurula ka Nungungulu, loku ku nga hiko na kupimiwa.”—Va Le Filipi 4:6, 7, 13.

LEZI U NGA MAHAKO:

• Khongelela a xivuno xa Jehova kasi u zi kota ku rula ni ku pimisa hi kufaneleko

• Hlola a tindlela tontlhe u ti alakanyelako kasi ku tlhatlha a xikarato lexo zonake u hlawula a ya chukwana ka wena

LEZI A BIBLIA GI WULAKO: “A mbilu ya munhu a tlharihileko ya kuma wutivi; ni ndleve ya tlhari yi hlota wutivi.” (Mavingu 18:15) Ti karatele ku tiva zontlhe zi patsekako mhakeni leyo. Pola a zilaveko za munwe ni munwani laha ngangweni. Bhula navo. Va ingisele.—Mavingu 20:5.

Ahati loku kufa a ranzekako wa wena? U nga chavi ku kombisa kubayiseka ka wena. Alakanya lezaku hambu ‘Jesu i rilile.’ (Johani 11:35; Mutshawuteli 3:4) Za lisima kambe a ku humula ni ku etlela khwatsi. (Mutshawuteli 4:6) Lezo zi ta ku vevukisela a ku yimisana ni xikarato xa wena.

LEZI U NGA MAHAKO:

• Na ku nga se humelela mhango, tolovela ku bhula ni ngango wa wena. A xikhati lexi ku humelelako zikarato, zi ta va olovela ku bhula na wena

• Bhula ni vanwani zi kotekako ku ngha va yimisene ni mhaka leyo

LEZI A BIBLIA GI WULAKO: “A liranzo la munghana la su tsoma xontlhe xikhati, ni nakulobye i pswalelwe ku vunetela kuxanisekeni.” (Mavingu 17:17) A vanghana va wena va xuva ku ku vuna, kanilezi za koteka ku ngha va nga zi tivi ku va ta maha yini. U nga chavi ku va byela a zilaveko za wena. (Mavingu 12:25) A xinwani, lava xivuno xa moya ka lava va zwisisako a Biblia. A wurangeli legi va to ku nyika gi seketelwako ka Biblia gi ta ku vuna.—Jakobe 5:14.

U ta kuma xivuno lexi u xi lavako loku u ti toloveta ni vanhu lava hakunene va kholwako ka Nungungulu na va tsumba a zitsumbiso zakwe. U ta tlhela u chavelelwa nguvu loku u vuna vanwani vanhu va lavako kutiyiswa. Xumayela vanwani xungetano hi kukholwa ka wena ka Jehova ni zitsumbiso zakwe. Tshama na u khomekile hi ku vuna lava va nga zikaratweni, niku u nga ti hambanyisi ni lava va ku ranzako ni ku ku khatalela.—Mavingu 18:1; 1 Va Le Korinte 15:58.

LEZI U NGA MAHAKO:

• Bhula ni munghana wa hombe u tlhela u mu tsika a ku vuna

• Wula zikarato za wena hi kukongoma u tlhela u nga mu fihleli a zilaveko za wena