XIPANZE 5
Ndlela yo hlayisa kurula ni maxaka ya wena
“Ambalani a . . . wunene, ni kutikoramisa,ni kurula, ni lihlaza-mbilu.”
A wukati gi vanga a ngango wuswa. Hambu lezi u to simama u ranza ni ku kombisa xichawo a vapswali va wena, kusukela zezi a munghana wa wena wa wukati hi yena munhu wa lisima ka vontlhe va nga kona misaveni. A mhaka leyi yi nga ha karatela a maxaka yo kari ku yi zwisisa. Kanilezi a matshinya ya milayo ya Biblia ma nga ku vuna a ku tiva ku ringanisela, lezaku u hlayisa kurula ni maxaka ya wena a xikhati lexi u ti karatelako ku aka a ngango wa wena wa wuswa.
1 NGHA UVA NI MAWONELA MA FANELEKO HI MAXAKA
LEZI A BIBLIA GI WULAKO: “Chava a raru wa wena ni nyine wa wena.” (Va Le Efesusi 6:2) Na ku nga khataliseki a tanga ya wena, u fanele ku simama u kombisa xichawo a vapswali va wena. Alakanya lezaku a munghana wa wena wa wukati yenawu, kota n’wana, i fanele ku khatalela a vapswali vakwe. “A liranzo a li na xiluse,” hikwalaho u nga tshuki u alakanya ku a kuzwanana ka munghana wa wena ni maxaka yakwe ka ku tekela wutshamu legi gi ku faneleko.
LEZI U NGA MAHAKO:
-
Potsa ku wula magezu yo kota, “A maxaka ya wena ma tshama hi ku nzi chepeta” kutani “Mamani wa wena a nga tshuki a tsaka hi lezi nzi mahako”
-
Zama ku wona zilo hi wonela ga munghana wa wena wa wukati
2 TIYISA WOKO LOKU ZI LAVEKA
LEZI A BIBLIA GI WULAKO: “A wanuna i ta siya a raru wakwe ni nyine wakwe a namarela ka sati wakwe; vona va tava nyama yinwe.” (Genesisi 2:24) A xikhati lexi u nghenelako wukati, a vapswali va wena va nga ha alakanya lezaku va ha fanele ku ku wonelela, niku va nga ha lava ku ti nghenisela nguvu wukatini ga wena a ku hunza lezi zi lavekako.
Zi le ka wena ni munghana wa wena a ku va vekela mimbhingano mu tlhela mu va tivisa a mhaka leyo hi liranzo. Ma zi kota ku va byela hi kukongoma na mu nga va khunguvanyisi. (Mavingu 15:1) A kutikoramisa, kurula, ni lihlaza-mbilu zi ta mu vuna a ku aka a kuzwanana ku nene ni maxaka ya nwina mu tlhela mu simama a ku “timiselana hi liranzo.”
LEZI U NGA MAHAKO:
-
Loku u karateka hi lezi a maxaka ma ti ngheniselako nguvu wutomini ga nwina, zi bhule ni munghana wa wena wa wukati na mu hi kuruleni
-
Zwananani ka lezi mu to yi lulamisisa zona a mhaka leyo
