Hontlheni hi lava mali kasi ku wundla mingango ya hina. (Mavingu 30:8) Niku ‘a mali i nzhuti,’ ya vikela. (Mutshawuteli 7:12) Kota patswa wa vatekani, zi nga ha mu karatela ku wulawula hi mali, kanilezi mu nga tsiki mali yi vanga zikarato wukatini ga nwina. (Va Le Efesusi 4:32) A patswa wa vatekani wu fanele ku tsumbana wu tlhela wu tirisana timhakeni ta timali.

LEZI A BIBLIA GI WULAKO: “Hi wihi wa nwina, loyi a lavako ku aka likhokhola, a nga rangiko hi ku tshama a hlayela ntsengo, aku kutani i nawo lowu a ta nga mbhetisa ha wona ke?” (Luka 14:28) Za lisima a ku tshama zinwe hasi mu alakanyela a matirisela ya mali. (Amosi 3:3) Tivani lezi zi nga xilaveko ka nwina mu tlhela mu tiva a mali leyi mu zi kotako ku yi tirisa ka zona. (Mavingu 31:16) A kuva ni mali ya ku xava nchumu a zi wuli ku xikolokolo u fanele ku wu xava. Zamani ku potsa mangava. Tirisani mali leyi mu nga nayo ntsena.—Mavingu 21:5; 22:7.

LEZI MU NGA MAHAKO:

• Loku mu salelwa hi mali kumbheleni ka hweti, bohani zinwe lezi mu to yi tirisisa zona

• Loku yi nga eneli ku tatisa a zilaveko za nwina za hweti, mahani makungo yo tiya ya ku hungula a zilaveko. Hi xikombiso, mu nga ha xava zo bhika le bazarini wutshanwini ga ku zi xava na zi phutselwe tilojeni to dura

LEZI A BIBLIA GI WULAKO: “Chela kota hi zilo zi nene, na ku nga hi mahlweni ka Hosi ntsena, kanilezi ni mahlweni ka vanhu.” (2 Va Le Korinte 8:21) Mu byele lisine lontlhe munghana wa wena wa wukati xungetano hi mali leyi u holako ni leyi u yi tirisako.

Khati ni khati u lavako ku tirisa mali yo tala, ranga hi ku wulawula ni munghana wa wena. (Mavingu 13:10) A ku bhulisana hi timali zi ta mu vuna a ku hlayisa kurula wukatini ga nwina. Wona a muholo wa wena kota mali ya ngango wontlhe, na ku nga hi ya wena wece.—1 Timote 5:8.

LEZI MU NGA MAHAKO:

• Zwananani ka mali leyi a munwe ni munwani wa nwina a zi kotako ku yi tirisa na a nga wutisangi munwani

• Mu nga rinzeli kala ku humelela xikarato lezaku mu wulawula hi mali