Ka lava va randzako Jehovha Nungungulu ni Mhaka yakwe, a Bhibhiliya:

Jesu i wulile lezvi: “Mu ta tiva lisine, ni lisine li ta mu tlhatlhisa.” (Johani 8:32) Ehleketa hi lezvi u nga ti zwisa zvona a cikhati u nga tiva a lisine la Bhibhiliya! Zvi ku tsakisile nguvhu a ku tiva ku hambu lezvi hi hanyako ka tiko go tala hi mawunwa, zva koteka ku li kuma a lisine. — 2 Timote 3:1.

Jehovha i lava ku hi tiva a lisine niku kota lezvi hi randzako van’wani, hinawu hi lava ku va byela a lisine lelo. Kanilezvi a ku tirela Nungungulu a hi lezvo basi. Hi fanele ku maha zvontlhe hi zvi kotako kasi ku hanya hi ndlela yi kombako ku hi maKristu, hakuva ha ma randza nguvhu a matshinya ya milayo ya Jehovha. Jesu i kombile ndlela ya lisima nguvhu leyi hi nga kombako hi yona lezvaku ha mu randza Nungungulu. I te: “Loku mu hlayisa a milayo ya mina mu ta tshama lirandzweni la mina, khwatsi hi lezvi minawu ndzi hlayisako a milayo ya Papayi ndzi tshama lirandzweni lakwe.” — Johani 15:10.

Jesu wa mu randza nguvhu a Papayi wakwe. I maha zvontlhe lezvi a Papayi wakwe a mu rumako ku maha. Loku hi pimanyisa Jesu ka mahanyela ya hina, Jehovha i ta hi randza niku hi tava ni litsako la lisine. Jesu i te: “Loku mu tiva a timhaka leti, mu katekile loku mu ti maha.” — Johani 13:17.

Hi xuva ku a bhuku legi gi ku gondzisa ku hanya hi lisine la lomu ka Bhibhiliya gi tlhela gi ku vhuna ku maha munghana wa Nungungulu. Hi khongelela lezvaku uya u mu randza nguvhu Nungungulu u tlhela u simama “lirandzweni la Nungungulu, . . . [leli li] yisako wutomini ga pindzukelwa.” — Judha 21.