CIGONDZO 01

A Bhibhiliya gi nga ku vhunisa kuyini wutomini ga wena?

BISA

Hontlheni ha ti wutisa ku hikuyini hi xanisekako, hikuyini hi fako, hi tlhela hi ti wutisa ku a wutomi gi ta tshamisa kuyini cikhatini ci tako. Ha karateka kambe hi zvilo zva siku ni siku zvo kota ku ndzi ta ti hlayisisa kuyini kutani ku ndzi nga li kumisa kuyini litsako laha ngangweni. A vanhu vo tala va polile lezvaku a Bhibhiliya ga hlamula zviwutiso zva lisima xungetano hi wutomi, gi tlhela gi nyika wusungukati gi vhunako wutomini ga siku ni siku. I kona u mu tivako u alakanyako ku a nga vhuneka hi ku gondza Bhibhiliya?

1. Hi zvihi a zviwutiso zvo kari lezvi a Bhibhiliya gi hlamulako?

A Bhibhiliya ga hlamula zviwutiso lezvi zva lisima: A wutomi gi sangulisile kuyini? Hi hanyela yini? Hikuyini a vanhu va xanisekako? Zvini zvi humelelako loku munhu afa? A vanhu vontlhe va lava kurula, makunu hikuyini ku nga ni tiyimpi? A misava leyi yi ta tshuka yi lova ke? A Bhibhiliya ga nyika mihlamulo ya zviwutiso lezvo, niku a vanhu vo tala va polile lezvaku a mihlamulo ya kona ya zwisiseka.

2. A Bhibhiliya gi nga hi vhunisa kuyini a ku kuma litsako wutomini ga siku ni siku?

A Bhibhiliya ga hi nyika wusungukati ga gi nene. Hi cikombiso, gi gondzisa mingango lezvi yi nga mahako kasi yi tsaka. Gi tlhela gi hi byela lezvi hi nga ku hlulisako zvona kukarateka, ni lezvi hi nga mahako kasi hi tsaka hi ntiro wa hina. Ka mabhulo ya hina, u ta tiva lezvi a Bhibhiliya gi gondzisako xungetano hi timhaka leti ni tin’wani. U ta wona lezvaku “a Mitsalo yontlhe [yi nga lomu ka Bhibhiliya] . . . ya vhuna”. — 2 Timote 3:16.

A bhuku legi a gi vhaleti Bhibhiliya. Kanilezvi gi ku kuca ku u hlola hi wece lezvi a Bhibhiliya gi gondzisako. Hikwalaho, hi ku kuca lezvaku u lera yontlhe mitsalo yi wuyako ka bhuku legi, u tlhela u yi fananisa ni lezvi u gondzako.

GONDZA ZVI ETA

U ta tiva lezvi a Bhibhiliya gi vhunisako zvona vanhu, ni lezvi u nga mahako kasi zvi ku tsakisa ku gi lera u tlhela u tiva ku hikuyini zvi nga zvi nene a ku vhuniwa hi van’wani kasi ku gi zwisisa.

3. A Bhibhiliya gi nga hi komba ndlela

A Bhibhiliya gi fana ni foki gi wonako khwatsi. Gi nga hi vhuna ku maha zviboho zva zvinene, gi tlhela gi hi komba lezvi zvi to maheka cikhatini ci tako.

Lerani Lisimu 119:105, mu gumesa mu bhula hi zviwutiso lezvi:

A mutsali wa lisimu leli i wa gi wonisa kuyini Bhibhiliya?
Wena ke, u gi wonisa kuyini Bhibhiliya?

4. A Bhibhiliya gi nga hlamula a zviwutiso zva hina

A wasati wo kari i polile lezvaku a Bhibhiliya ga hlamula zviwutiso lezvi zvi nga mu karata hi malembe. Bisani VHIDHIO, mu gumesa mu bhula hi zviwutiso zvi landzelako.

VHIDHIO: U nga tshuki u mbhelelwa hi kutsumba! (1:48)

Zviwutiso muni lezvi a wasati loyi a nga hi nazvo?
A ku gondza a Bhibhiliya zvi mu vhunisile kuyini?

A Bhibhiliya ga hi kuca ku maha zviwutiso. Lerani Matewu 7:7, mu gumesa mu bhula hi ciwutiso leci:

Zviwutiso muni u nga nazvo u tsakelako ku tiva mihlamulo ya zvona lomu ka Bhibhiliya?

5. Zvi nga ku tsakisa ku lera Bhibhiliya

A vanhu vo tala zva va tsakisa ku lera Bhibhiliya niku zva va vhuna. Bisani VHIDHIO, mu gumesa mu bhula hi zviwutiso zvi landzelako.

VHIDHIO: Ku lera Bhibhiliya (2:05)

A vaswa lava va ti zwisa kuyini hi ku lera mabhuku laha ma yileko?
Hikuyini va zvi randzako ku lera Bhibhiliya?

A Bhibhiliya gi wula lezvaku gi nga hi gondzisa zvilo zvi to hi chavelela, zvi tlhela zvi hi nyika kutsumba. Lerani Va Le Roma 15:4, mu gumesa mu bhula hi ciwutiso leci:

Zva ku tsakisa ku tiva lezvaku a Bhibhiliya gi tsumbisa ku hi chavelela ni ku hi nyika kutsumba?

6. A van’wani va nga hi vhuna ku zwisisa Bhibhiliya

Ahandle ka ku ti lerela a Bhibhiliya voce, a votala va polile lezvaku a ku gondza ni van’wani zva vhuna nguvhu. Lerani Mitiro 8:26-31, mu gumesa mu bhula hi ciwutiso leci:

Hi nga maha yini kasi hi zwisisa a Bhibhiliya? — Wona vhesi 30 ni 31.

A wanuna wa muEtiyopia i kombele ku vhuniwa kasi a zwisisa Mitsalo. A vanhu vo tala nyamutlha va polile lezvaku a ku gondza Bhibhiliya ni van’wani zva vhuna nguvhu

A VOKARI VE: “A ku gondza Bhibhiliya ku ti mbhetela sikira hi ku funya.”

U nga va hlamula yini? Hikuyini?

LEZVI HI NGA GONDZA

A Bhibhiliya ga nyika wusungukati gi vhunako wutomini ga siku ni siku, ga hlamula zviwutiso zva lisima, gi tlhela gi chavelela vanhu ni ku va nyika kutsumba.