CIGONDZO 05
A Bhibhiliya i Mhaka ya Nungungulu yi tako ka hina
Jehovha i hi nyikile cinyikiwo co saseka, ku nga Bhibhiliya. A cinyikiwo leco ci wumbiwa hi 66 wa mabhuku ma patsilweko laha ka kun’we. Kanilezvi u nga ha ti wutisa ku: ‘Gita hi kwihi a Bhibhiliya? Himani a mutumbuluxi wa gona?’ Kasi ku hlamula zviwutiso lezvi, a hi woneni lezvi a mahungu ya Nungungulu ma nga lomu ka Bhibhiliya ma nga chikelisa zvona ka hina.
1. Loku va hi vanhu va nga tsala, hikuyini hiku a Bhibhiliya gita hi ka Nungungulu?
A Bhibhiliya gi tsalilwe hi cipimo ca 40 wa vavanuna ndzeni ka 1600 wa malembe, kusukela 1513 A.E.C. kala kwalomo ka 98 E.C. A vatsali lavo va wa hi va midhawuko yo hambanahambana. Hambulezvo, a zvipandze zvontlhe zva Bhibhiliya zva zwanana. Zvi kotekisa kuyini lezvo? Hi ku a Bhibhiliya gita hi ka Nungungulu. (Lera 1 Va Le Tesalonika 2:13.) A vatsali va Bhibhiliya a va tsalangi a maalakanyo ya vona venyi. Kanilezvi “va no kanela lezvi va nyikilweko hi Nungungulu, na va susumetiwa hi moya wo basa.” a (2 Pedro 1:21) Nungungulu i tirisile a moya wo basa kasi ku susumeta kutani ku kuca a vavanuna lavo lezvaku va tsala a maalakanyo yakwe. — 2 Timote 3:16.
2. Himani a nga vhunekako hi Bhibhiliya?
Nungungulu i wulile ku a vanhu va “wontlhe matiko ni tixaka ni tirimi ni mifumo” va nga vhuneka hi mahungu ya lomu ka Bhibhiliya. (Lera Kuvhululelwa 14:6.) Nyamutlha, a Bhibhiliya ga kumeka hi tirimi to tala a ku hundza ni gihi bhuku. Zvezvi, a vanhu vo tala va nago a Bhibhiliya, na ku nga khataliseki lomu va hanyako kona kutani lirimi leli va wulawulako.
3. Jehovha i gi vhikelisile kuyini a Bhibhiliya?
Kusanguleni, a Bhibhiliya gi wa tsalilwe ka zvilo zva ku a zvi pindzuki, zvo kota mabhebhe ni papiro. Kanilezvi a vanhu va gi randzako, va wa maha tikopiya ta gona hi mandla, na va ti wonela kuphazama. A tihosi to kari ni varangeli vo kari va wukhongeli va zamile ku fuvisa Bhibhiliya, kanilezvi kuve ni vanhu va nga veka wutomi gabye mhangweni kasi ku gi vhikela. Jehovha a nga tsiki munhu kutani nchumu wu mu vhalela ku wulawula na hina. A Bhibhiliya gi wula lezvi: “A mhaka ya Nungungulu wa hina yi simama kala kupindzuka.” — Isaya 40:8.
GONDZA ZVI ETA
Gondza zvin’wani xungetano hi lezvi Nungungulu a nga susumetisa zvona vanhu lezvaku va tsala Bhibhiliya, lezvi a nga gi vhikelisa zvona, ni lezvi a mahileko kasi gi kumiwa hi vanhu.
4. A Bhibhiliya ga wula ku himani mutumbuluxi wa gona
Bisani VHIDHIO. Andzhako ka lezvo, lerani 2 Timote 3:16, mu gumesa mu bhula hi zviwutiso zvi landzelako.
-
Loku va hi vanhu va nga tsala Bhibhiliya, hikuyini gi vitaniwako ku i Mhaka ya Nungungulu?
-
U alakanya ku zva zwala a ku kholwa ku Nungungulu i byelile vanhu lezvaku va tsala maalakanyo yakwe?
A matsalani a nga tsala papilo, kanilezvi a mahungu ya gona mata hi ka loyi a nga mu ruma. Hi kufanana, a Bhibhiliya gi tsalilwe hi vanhu, kanilezvi a mahungu ya kona ma wata hi ka Nungungulu
5. A Bhibhiliya gi vhukelwe, kanilezvi gi ponile
Loku a Bhibhiliya gita hi ka Nungungulu, a nge gi tsiki gi fuva. Ndzeni ka matimu, kuve ni vanhu va ntamu va nga zama ku fuvisa Bhibhiliya. A varangeli va wukhongeli va zamile ku gi fihla kasi a vanhu va nga gi leri. Kanilezvi, ku na ni vanhu vo tala va nga veka wutomi gabye mhangweni kasi ku vhikela Bhibhiliya, hambu lezvi va nga zvi tiva ku va nga tshuka va dawa. Kasi ku tiva a mun’we wabye, bisani VHIDHIO, mu gumesa mu bhula hi zviwutiso zvi landzelako.
-
Xana a ku tiva lezvaku a vanhu vo tala va vekile wutomi gabye mhangweni kasi ku vhikela Bhibhiliya a zvi ku mahi u lava ku gi lera? Hikuyini?
Lerani Lisimu 119:97, mu gumesa mu bhula hi ciwutiso leci:
-
Cini ci kucileko vanhu vo tala a ku veka wutomi gabye mhangweni kasi ku hundzulusela ni ku avela Bhibhiliya?
6. A Bhibhiliya i bhuku ga vontlhe vanhu
A Bhibhiliya hi gona bhuku gi hundzuluselweko nguvhu ni ku avelwa matin’wini ya vanhu. Lerani Mitiro 10:34, 35, mu gumesa mu bhula hi zviwutiso lezvi:
-
Hikuyini Nungungulu a lavako ku a Mhaka yakwe yi hundzuluselwa ni ku avelwa nguvhu?
-
Cini ci ku tsakisako laha ka Bhibhiliya?
Kwalomo ka
100%
wa vanhu misaveni yontlhe
va nago Bhibhiliya hi lirimi va li zwisisako
Gi kona hi
3000
wa tirimi ni ku hundza
gontlhe kutani hi zvipandze
Ku humesilwe a maBhibhiliya ya kwalomo ka
5 wa tibhiliyoni
ku nga ntsengo wa hombe a ku hundza ni gihi gin’wani bhuku
A VOKARI VE: “A Bhibhiliya i bhuku ga kale gi tsalilweko hi vanhu.”
-
Wena ke, u zvi wonisa kuyini?
-
Cini ci ku tiyisekisako ku a Bhibhiliya i Mhaka ya Nungungulu?
LEZVI HI NGA GONDZA
A Bhibhiliya i Mhaka ya Nungungulu, niku i mahile zvontlhe kasi gi kumiwa hi vanhu vontlhe.
Zviwutiso zva kuvhuxeta
-
Zvi lava ku wula yini a ku a Bhibhiliya gi pimisilwe hi Nungungulu?
-
Cini ci ku hlamalisako laha ka lezvi a Bhibhiliya gi nga ponisa zvona, lezvi gi hundzuluseliswako zvona, ni ntsengo wa vanhu va nga nago?
-
U ti zwisa kuyini hi ku tiva lezvaku Nungungulu i mahile zvontlhe lezvo kasi a wulawula na wena?
GONDZA ZVIN’WANI
Wona a matimu ya lezvi a Bhibhiliya gi nga tisa zvona kusukela ka mabhuku yo sangula yo songiwa ya Bhibhiliya kala ka mabhibhiliya ya nyamutlha.
“A Bhibhiliya gi chikelisile kuyini ka hina?” (Khindlimuka!, Novembro wa 2007)
Wona lezvi a Bhibhiliya gi nga ponisa zvona a timhango tinharu ti nga lava ku gi fuvisa.
“Lezvi a Bhibhiliya gi nga ponisa zvona” (A Murindzeli N.° 4 wa 2016)
Wona timhango leti a vokari va nga kumana nato hi ku hundzulusela Bhibhiliya.
A Bhibhiliya gi kopiyarilwe gi tlhela gi hundzuluselwa makhati yo tala. Cini ci hi tiyisekisako lezvaku a Mhaka ya Nungungulu a yi cicangi?
a Kota lezvi hi to zvi wona ka Cigondzo 07, a moya wo basa i ntamu lowu Nungungulu a wu tirisako.
