CIGONDZO 07

Jehovha i tshamisile kuyini?

BISA

Loku uzwa ku Jehovha Nungungulu, zvini u zvi alakanyako? U alakanya ku munhu wa ntamu nguvhu, kanilezvi a nga kule na wena a ku fana ni tinyeleti ti nga kule nguvhu? Kutani u alakanya ku a hi munhu, kanilezvi i ntamu wa ntumbuluko a ku fana ni cingwalangwandla? Kasi Jehovha i tshamisile kuyini? A Bhibhiliya ga hi byela a matshamela yo kari ya Jehovha. Ga hi byela kambe lezvaku yena wa khatala hi wena.

1. Hikuyini hi kalako hi nga zvi koti ku wona Nungungulu?

“Nungungulu i Moya.” (Johani 4:24) Jehovha a nga na miri wo khwatsi hi lowu wa hina. Munhu wa moya a hanyako le tilweni, gi nga wutshamu ga ku a hi zvi koti ku gi wona.

2. Hi wahi matshamela yo kari ya Jehovha?

A hi zvi koti ku mu wona Jehovha. Kanilezvi laha hi yako hi gondza hi yena, hi tiva ku munhu wa lisine a nga ni matshamela yo hlamalisa. A Bhibhiliya gi wula lezvi: “Jehovha wa randza kululama, a nga ta tshuka a tsika a vatsumbekileko vakwe.” (Lisimu 37:28) Wa kombisa “tipswalo ta hombe ni wuxinji” kambe, nguvhunguvhu ka lava va xanisekako. (Jakobe 5:11) “Jehovha i kusuhani ni lava va pandzekileko timbilu; i hanyisa lava va mbhelileko ntamu.” (Lisimu 34:18, tlhamuselo wa lahasi) U wa zvi tiva ku lezvi hi mahako zvi nga mu tsakisa Jehovha kutani ku mu zangarisa? A munhu loyi a hlawulako ku maha zvakubiha wa mu khunguvanyisa ni ku mu zangarisa Jehovha. (Lisimu 78:40, 41) Kanilezvi loyi a mahako zvazvinene wa mu tsakisa. — Lera Mavingu 27:11.

3. Jehovha i kombisa kuyini ku wa hi randza?

A tshamela ga Jehovha ga tshinya ka wontlhe lirandzo. Hi lisine, a Bhibhiliya gi wula ku “Nungungulu lirandzo”. (1 Johani 4:8) Jehovha a nga hi kombi a lirandzo lakwe hi ku tirisa a Bhibhiliya ntsena kanilezvi i tlhela a hi komba kambe hi ku tirisa lezvi a zvi vangileko. (Lera Mitiro 14:17.) Hi cikombiso, ehleketa hi lezvi a nga hi vangisa zvona. I hi mahile hi ndlela ya ku hi zvi kota ku wona tikori to saseka, kuzwa mimuzka yo saseka, ni kuzwa kunandziha ka zvakuga. I lava ku hizwa a kunandziha ka wutomi!

GONDZA ZVI ETA

Wona leci Jehovha a ci tirisako kasi ku maha zvilo zvo hlamalisa ni lezvi a ma kombisisako zvona a matshamela yakwe yo saseka.

4. A moya wo basa i ntamu lowu Nungungulu a wu tirisako

Loku hi lava ku maha ntiro wo kari hi tirisa mandla. Ahati Jehovha ke, cini a ci tirisako? I tirisa moya wakwe wo basa. A Bhibhiliya gi hi byela lezvaku a moya wo basa a hi munhu, kanilezvi i ntamu lowu Nungungulu a wu tirisako kasi ku maha ni cihi a ci lavako. Lerani Luka 11:13 na Mitiro 2:17, mu gumesa mu bhula hi zviwutiso lezvi:

Nungungulu i ta “chulula” a moya wakwe wo basa ka lava va mu kombelako. Makunu u alakanya ku a moya wo basa munhu kutani i ntamu lowu Nungungulu a wu tirisako? Hikuyini u wulako lezvo?

Jehovha i tirisa a moya wakwe wo basa kasi ku maha zvilo zvo hlamalisa. Lerani Lisimu 33:6 na 2 Pedro 1:20, 21, mu gumesa mu bhula hi ciwutiso leci:

Hi zvihi a zvilo zvo kari lezvi Jehovha a zvi mahileko hi ku tirisa a moya wakwe wo basa?

5. Jehovha i na ni matshamela yo saseka

Mosi i wa hi nandza go tsumbeka ga Nungungulu, kanilezvi i wa lava ku mu tiva khwatsi a Muvangi wakwe. Hikwalaho, Mosi i no byela Jehovha, aku: “Ndzi tivise a tindlela ta wena kasi ndzi ku tiva.” (Eksodhusi 33:13) Jehovha i no hlamula Mosi a mu byela a matshamela yo kari yakwe. Lerani Eksodhusi 34:4-6, mu gumesa mu bhula hi zviwutiso lezvi:

Hi wahi a matshamela yo kari lawa Jehovha a nga byela Mosi?
Hi wahi a matshamela ya Jehovha lawa ma ku tsakisako nguvhu?

6. Jehovha wa khatala hi vanhu

A vaHebheru vanhu va Nungungulu va nga hi tikhumbi le Gibhite. Jehovha i ti zwisile kuyini a cikhati leci a nga wona vanhu vakwe na va xaniseka? Bisani AUDHIO mu landzelela lomu ka maBhibhiliya ya n’wina kutani lerani Eksodhusi 3:1-10. Andzhako ka lezvo, bhulani hi zviwutiso zvi landzelako.

AUDHIO: Jehovha i wa bayiseka hi ku wona kuxaniseka kabye (2:45)

Jehovha i ti zwisa kuyini loku a wona a vanhu na va xaniseka? — Wona vhesi 7 ni 8.
U alakanya ku Jehovha wa zvi lava hakunene a ku vhuna vanhu niku i na ni ntamu wa ku maha lezvo? Hikuyini?

7. A ntumbuluko wu hi gondzisa a matshamela ya Jehovha

Jehovha i hi komba a matshamela yakwe hi ku tirisa zvivangwa zvakwe. Bisani VHIDHIO. Andzhako ka lezvo, lerani Va Le Roma 1:20, mu gumesa mu bhula hi ciwutiso ci landzelako.