Jehovha i lava ku u mu tiva khwatsi. Hikuyini? Hi ku Jehovha wa zvi tiva ku laha u toya u gondza hi matshamela yakwe ni lezvi a mahisako zvona zvilo ni wutomi go tsakisa legi a ku tsumbisako, u ta zvi lava nguvhu kuva munghana wakwe. A ku hakunene u nga zvi kota kuva munghana wa Nungungulu? (Lera Lisimu 25:14.) U nga maha yini kasi uva munghana wa Jehovha? A Bhibhiliya ga hlamula a zviwutiso lezvo gi tlhela gi tlhamusela ku hikuyini a kuva ni wunghana na Jehovha zvi nga zva lisima ku hundza ni gihi wunghana u nga vako nago.

1. Jehovha i ku ramba ku u maha yini?

A Bhibhiliya gi wula lezvi: “Tshinelani ka Nungungulu, na yena i ta tshinela ka n’wina.” (Jakobe 4:8) Zvi lava ku wula yini lezvo? Jehovha wa ku ramba a ku uva munghana wakwe. Kuzvilava a vokari va nga haku: ‘Ndzi nga zvi kotisa kuyini kuva munghana wa Nungungulu kuveni a ndzi mu woni?’ Hambulezvo, lomu ka Bhibhiliya, Jehovha i hi byela zvontlhe xungetano hi matshamela yakwe kasi hi zvi kota kuva vanghana vakwe. Laha hi lerako a mahungu ya Nungungulu lomu ka Bhibhiliya, a wunghana ga hina na Jehovha Nungungulu ga kula hambu lezvi hi kalako hi nga mu woni.

2. Hikuyini Jehovha a nga yena munghana wa hombe ka vontlhe?

A ku na munhu a ku randzako nguvhu a hundza Jehovha. Jehovha i lava ku u tsaka niku i lava ku u bhula naye khati ni khati u lavako ku vhuniwa. U nga ‘hoxela a kukarateka ka wena kontlhe hehla kakwe, hakuva wa khatala hi wena’. (1 Pedro 5:7) Jehovha i tshama na a longile ku seketela, ni kuchavelela, ni ku ingisela a vanghana vakwe. — Lera Lisimu 94:18, 19.

3. Jehovha i lava ku hi maha yini kasi hiva vanghana vakwe?

Jehovha wa randza a vanhu vontlhe, kanilezvi yena “munghana wa hombe wa lava va lulamileko”. (Mavingu 3:32) Jehovha i lava ku a vanghana vakwe va ti karatela ku maha lezvi a nge zvinene ni ku potsa lezvi a nge zvi bihile. A vokari va nga ha alakanya lezvi: ‘Ndzi nga ta tshuka ndzi zvi kota ku hanya hi milayo ya Nungungulu.’ Kanilezvi Jehovha wa hi zwisisa. Wa amukela vontlhe lava va mu randzako hi mbilu yontlhe, va mahako zvontlhe va zvi kotako kasi ku mu tsakisa. — Lisimu 147:11; Mitiro 10:34, 35.

 GONDZA ZVI ETA

4. Abrahama i wa hi munghana wa Jehovha

A matimu ya Bhibhiliya ma wulawulako hi Abrahama (loyi a gin’wani vito a nga Abrama) ma hi nyika masemanyana ya ku zvi wula yini a kuva munghana wa Nungungulu. Lerani hi Abrahama ka Genesisi 12:1-4, mu gumesa mu bhula hi zviwutiso lezvi:

• Zvini lezvi Jehovha a nga byela Abrahama ku a maha?

• Zvini lezvi Jehovha a nga mu tsumbisa?

• Zvini lezvi Abrahama a nga maha?

5. Lezvi Jehovha a lavako ku a vanghana vakwe va maha

Hontlheni hi rindzela ku a vanghana va hina va maha zvokari.

• Hi zvihi a zvilo zvo kari u randzako ku a vanghana va wena va ku mahela?

Lerani 1 Johani 5:3, mu gumesa mu bhula hi ciwutiso leci:

• Zvini lezvi Jehovha a zvi rindzelako ka vanghana vakwe?

Kasi hi ingisa Jehovha, zvi nga ha lava ku hi cica a mahanyela ya hina kutani wumunhu ga hina. Lerani Isaya 48:17, 18, mu gumesa mu bhula hi ciwutiso leci:

• Hikuyini Jehovha a lavako ku a vanghana vakwe va cica zvokari wutomini?

 6. Lezvi Jehovha a mahelako vanghana vakwe

 LEZVI HI NGA GONDZA

Jehovha i lava ku uva munghana wakwe niku i ta ku vhuna ku uva munghana wakwe.

Zviwutiso zva kuvhuxeta

• Jehovha i va vhunisa kuyini a vanghana vakwe?

• Hikuyini Jehovha a lavako ku a vanghana vakwe va cica zvokari wutomini?

• U alakanya ku zva karata a kuva munghana wa Jehovha? Hikuyini?