CIGONDZO 09

Tiyisa a wunghana ga wena na Nungungulu hi mukhongelo

BISA

U tshukile u lava ku vhuniwa wutomini ga wena? U na ni zviwutiso u lavako mihlamulo ya kona? U lava ku chavelelwa kutani ku tiyisiwa? Wa zvi lava kuva kusuhani na Jehovha? A mukhongelo wu nga ku vhuna ka zvontlhe lezvi. Kanilezvi hi fanele ku khongelisa kuyini? A ku Nungungulu wa ingisela a mikhongelo yontlhe? U nga maha yini kasi u tiyiseka ku i tazwa a mikhongelo ya wena. A hi zvi wone.

1. Hi fanele ku khongela ka mani, kona zvilo muni hi nga zvi khongelelako?

Jesu i gondzisile ku hi fanele ku khongela ntsena ka Papayi wa hina wa le tilweni. Hambu Jesu i wa khongela ka Jehovha. I wulile lezvi: “Hikwalaho, khongelisani lezvi: ‘Papayi wa hina wa le tilweni . . . ’” (Matewu 6:9) A cikhati leci hi khongelako ka Jehovha, ho tiyisa a wunghana ga hina naye.

Hi nga khongela hi kombela ni cihi! Kanilezvi, kasi Nungungulu a hlamula mikhongelo ya hina, yi fanele ku yelana ni kurandza kakwe. A Bhibhiliya gi wula lezvi: “Kani hi cihi hi kombelako ci yelanako ni kurandza [ka Nungungulu], wa hizwa.” (1 Johani 5:14) Jesu i nyikile cikombiso ca zvilo hi nga zvi khongelelako. (Lera Matewu 6:9-13.) Hi nga khongela xungetano hi timhaka ta hina wutsumbu, kanilezvi a hi faneli ku rivakelwa ku bonga Nungungulu hi lezvi a hi mahelako ni ku mu kombela ku a vhuna van’wani.

2. Hi fanele ku khongelisa kuyini?

A Bhibhiliya gi hi kuca ku hi ‘chulula timbilu ta hina mahlweni ka Nungungulu’. (Lisimu 62:8) Hikwalaho, a mikhongelo ya hina yi fanele kuva yo sukela mbilwini. Hi nga khongela hi gezu go zwala kutani hi le mbilwini, ni ka cihi cikhati ni ka gihi wutshamu. Hi nga khongela na hi khizamile, na hi tshamile kutani na hi yimile, leci ci lavekako ku kombisa cichavo hi Jehovha.

3. Nungungulu i hlamulisa kuyini a mikhongelo ya hina?

I hlamula hi tindlela to tala. Jehovha i hi nyikile a Mhaka yakwe, ku nga Bhibhiliya, lomu hi talako ku kuma a mihlamulo ya zviwutiso zva hina. A ku gondza Bhibhiliya zvi nga “tlharihisa cipumbu”. (Lisimu 19:7; Lera Jakobe 1:5.) A nga hi nyika kurula ka maalakanyo a cikhati leci hi kumanako ni zvikarato. Ahandle ka lezvo, a nga kuca a malandza yakwe kasi ma hi vhuna loku hi lava ku vhuniwa.

GONDZA ZVI ETA

Wona lezvi u nga mahisako zvona mikhongelo yi humako mbilwini yi tsakisako Nungungulu, u tlhela u wona lezvi a mukhongelo wu nga ku vhunisako zvona.

4. Lezvi hi nga mahako kasi Nungungulu azwa mikhongelo ya hina

Zvilo muni zvi lavekako kasi Nungungulu azwa mikhongelo ya hina? Bisani VHIDHIO.

VHIDHIO: Nungungulu wa ingisela a mikhongelo yontlhe? — Cipandzana (2:42)

Jehovha i lava ku hi khongela ka yena. Lerani Lisimu 65:2, mu gumesa mu bhula hi zviwutiso lezvi:

U alakanya ku a “Muzwi wa mikhongelo” wa zvi lava ku wena u khongela ka yena? Hikuyini?

Kasi Nungungulu azwa mikhongelo ya hina, hi fanele ku hanya hi lezvi yena a nge zvi nene. Lerani Mika 3:4 na 1 Pedro 3:12, mu gumesa mu bhula hi ciwutiso leci:

Zvini zvi nga hi tiyisekisako ku Jehovha i ta ingisela mikhongelo ya hina?

Le yimpini, a masochwa ya seno ni seno ma khongelela ku hlula. Zva zwala a ku rindzela ku Nungungulu a hlamula mikhongelo leyo?

5. A mikhongelo ya hina yi fanele ku huma mbilwini

A vanhu vo kari va gondzisilwe ku loku va khongela va fanele ku phindaphinda a magezu yalawa ya man’we khati ni khati. Kanilezvi a ku hi zvalezvi Nungungulu a lavako ku hi khongelisa zvona? Lerani Matewu 6:7, mu gumesa mu bhula hi ciwutiso leci:

U nga maha yini kasi “u nga phindaphindi magezu yalawa ya man’we” mikhongelweni ya wena?

Siku ni siku, alakanya nchumu wo kari wo kongoma wutomini ga wena u gumesa u bonga Jehovha hi wona. Loku u maha lezvo ka masiku wontlhe ya vhiki, u ta wona ku ku ta mbhela vhiki na u khongele hi 7 wa zvilo zvo hambana na u nga phindi magezu yalawa ya man’we.

A papayi wa tsaka loku a n’wana wakwe a mu byela lezvi zvi nga mbilwini. Hi kufanana, Jehovha yenawu wa tsaka loku hi khongela ka yena na zvi huma mbilwini

6. A mukhongelo cinyikiwo ci tako hi ka Nungungulu

A mukhongelo wu nga hi vhunisa kuyini, nguvhunguvhu ka cikhati ca zvikarato wutomini ga hina? Bisani VHIDHIO.

VHIDHIO: A mukhongelo wa hi vhuna ku lwisana ni zvikarato (1:32)

A Bhibhiliya gi wula ku a mukhongelo wu nga hi nyika kurula ka maalakanyo. Lerani Va Le Filipi 4:6, 7, mu gumesa mu bhula hi zviwutiso lezvi:

Lisine ku a hi contlhe cikhati a mukhongelo wu susako zvikarato zva hina. Hambulezvo, a mukhongelo wu hi vhunisa kuyini?
Zvilo muni u tsakelako ku khongela hi zvona?

U wa zvi tiva?

A gezu “amen” gi wula ku “a zvi maheke”, kutani “hakunene”. Kusukela zvikhatini zva kutsaliwa ka Bhibhiliya, a ku “amen” zvi wuliwa kugumeseni ka mikhongelo.— 1 Kronekele 16:36.

7. Ti nyike cikhati ca ku khongela

Ka zvikhati zvo kari hi nga khomeka nguvhu laha kuza hi rivakelwa ni ku khongela. A ku khongela zvi wa hi zva lisima ka Jesu hi ndlela muni? Lerani Matewu 14:23 na Marku 1:35, mu gumesa mu bhula hi zviwutiso lezvi:

Zvini lezvi Jesu a nga maha kasi a kuma cikhati ca ku khongela?
Zvini lezvi wena u nga mahako kasi u kuma cikhati ca ku khongela?

A VOKARI VE: “A ku maha mukhongelo ku ti gela cikhati hakuva i hava a wu ingiselako.”

U ngaku yini?

LEZVI HI NGA GONDZA

A mikhongelo yi humako mbilwini yi hi tshineta ka Nungungulu, yi hi nyika kurula ka maalakanyo ni ku hi nyika ntamu hi wu lavako kasi hi tsakisa Jehovha.