CIGONDZO 10
A mitlhangano ya Vakustumunyu va Jehovha yi nga ku vhunisa kuyini?
U tshukile uya mutlhanganweni wa Vakustumunyu va Jehovha? Loku u nga se tshuka uya, kuzvilava a ku alakanyela kuya mitlhanganweni leyo zvi nga ku chavisanyana. Kuzvilava u nga ti wutisa ku: ‘Zvini zvi mahekako ka mitlhangano leyo? Hikuyini yi nga ya lisima? Hikuyini ndzi faneleko kuya ka yona?’ Ka cigondzo leci, u ta gondza lezvi a mitlhangano yi nga ku tshinetisako zvona ka Nungungulu yi tlhela yi ku vhuna wutomini ga wena.
1. Hikuyini a Vakustumunyu va Jehovha va mahako mitlhangano?
A mutsali wokari wa Bhibhiliya i wulile lezvi: “Ndzi ta dhumisa Jehovha lomu bandleni ga hombe.” (Lisimu 26:12) Hi magezu lawo, i wo komba a kungo-tshinya gi hi mahako hi tlhangana, ku nga kudhumisa kutani ku khozela Nungungulu. Hi kufanana, a Vakustumunyu va Jehovha va tlhangana vhiki ni vhiki kasi ku dhumisa Nungungulu, ni ku yimbelela, ni ku khongela. Ka makhati yokari ndzeni ka lembe, va maha mitlhangano ya hombe kasi va khozela Jehovha.
2. Zvini u to gondza mitlhanganweni ya hina?
Mitlhanganweni ya hina, hi gondza a Mhaka ya Nungungulu, hi yi ‘tlhamusela yiku dlunya ni ku yi maha yi zwisiseka’. (Lera Nehemiya 8:8.) Mitlhanganweni ya hina, u ta gondza xungetano hi Jehovha ni matshamela yakwe yo saseka. Laha u yako u gondza hi lezvi Jehovha a ku randzisako zvona, u taya u tshinela nguvhu kakwe. U ta tlhela u gondza lezvi a nga ku vhunisako zvona kasi uva ni wutomi go tsakisa. — Isaya 48:17, 18.
3. U nga vhunekisa kuyini hi ku bhula ni lava u va kumako mitlhanganweni?
Jehovha i hi byela ku “khatalelanani kasi [mu] susumetana lirandzweni ni mitirweni yo saseka, na [mu] nga tsiki ku tlhangana.” (Mahebheru 10:24, 25) Mitlhanganweni ya hina, u ta kuma a vanhu lava hakunene va khatalako hi mun’we ni mun’wani, lava a kufana na wena, va lavako ku gondza zvotala xungetano hi Nungungulu. U ta vazwa na va wulawula hi zvilo zvi kucako zva Bhibhiliya. (Lera Va Le Roma 1:11, 12.) U ta tiva a vanhu votala kambe va ku va tsakile hambu lezvi va kumanako ni zvikarato. Hi zvalezvi zvi mahako Jehovha a lava ku hi tlhangana contlhe cikhati!
GONDZA ZVI ETA
Wona ku zvini zvi mahekako mitlhanganweni ya Vakustumunyu va Jehovha niku hikuyini zvi vhunako a ku ti karatela kuya ka mitlhangano leyo.
4. Mitlhangano ya Vakustumunyu va Jehovha
Cikhatini ca vapostoli va Jesu, a maKristu ma wa tlhangana hi kukhandzakanya kasi ku khozela Jehovha. (Va Le Roma 16:3-5) Lerani Va Le Kolosi 3:16, mu gumesa mu bhula hi ciwutiso leci:
-
Cikhatini ca vapostoli, a maKristu ma wa mu khozelisa kuyini Jehovha?
Nyamutlha, a Vakustumunyu va Jehovha vonawu va tlhangana hi kukhandzakanya ka matshamu yabye ya ku khozela ka wona. Kasi ku wona ku zvini zvi mahekako mitlhanganweni, bisani VHIDHIO. Hi kulandzela, wonani mufota wu kombisako vanhu va nga mutlhanganweni, mu gumesa mu bhula hi zviwutiso zvi landzelako.
-
Zvilo muni zvi mahekako ka Salawu ya Mufumo, zvi fanako ni lezvi u nga lera ka Va Le Kolosi 3:16?
-
Lomu ka vhidhio kutani laha ka mufota, zvi kona zvin’wani u nga zvi wona zvi mahekako mitlhanganweni zvi ku tsakisako?
Lerani 2 Va Le Korinte 9:7, mu gumesa mu bhula hi ciwutiso leci:
-
Hikuyini ka mitlhangano ya Vakustumunyu va Jehovha ku nga hakheliwiko mali?
Na u hi ni mugondzisi wa wena, vhuxetani lezvi zvi to gondziwa ka mutlhangano wu landzelako.
-
Hi cihi cipandze u alakanyako ku ci ta ku tsakisa nguvhu kutani ci to ku vhuna?
U wa zvi tiva?
Lomu ka jw.org, u nga kuma a wutshamu ni cikhati leci a mitlhangano yi mahiwako hi cona misaveni yontlhe.
-
(A) Mitlhanganweni ya hina ka vekiwa tikanelo, ku mahiwa mikombiso ku tlhela ku kombisiwa tivhidhio. A mitlhangano yi sangula yi tlhela yi gumesa hi lisimu ni mukhongelo
-
Ka zvipandze zvo kari zva mutlhangano, loku u zvi lava u nga hlamula zviwutiso zvi mahiwako
-
Vontlhe va rambiwa — a vavanuna, ni vavasati, ni lava va khosaheleko ni vanana
-
A mitlhangano ya hina mahala. A Vakustumunyu va Jehovha a va mahisi mihlengo
5. Zvi lava ku ti karata kasi kuya mitlhanganweni
Wona cikombiso ca ngango wa Jesu. Lembe ni lembe, va wa famba a cipimo ca 100 wa tikilometro lomu ka zvitsunga na va suka hi Nazareta vaya tempeleni, a Jerusalema. Lerani Luka 2:39-42, mu gumesa mu bhula hi zviwutiso lezvi:
-
U alakanya ku zvi wa lava ku ti karata kasi kuya Jerusalema?
-
Hikuyini zvi nga ha lavako ku wenawu u ti karata kasi kuya mitlhanganweni?
-
A ku zva vhuna a ku uya mitlhanganweni hambu loku zvi karata? Hikuyini?
A Bhibhiliya gi wula ku a ku hi tlhangana zvin’we kasi ku khozela zva lisima nguvhu. Lerani Mahebheru 10:24, 25, mu gumesa mu bhula hi ciwutiso leci:
-
Hikuyini hi faneleko kuya mitlhanganweni hi kukhandzakanya?
A VOKARI VE: “A zvizi zvi lava ku u tlhangana ni van’wani kasi ku khozela Nungungulu. A ku ti gondzela Bhibhiliya wece laha kaya zva enela.”
-
Hi wihi mutsalo kutani cikombiso ca Bhibhiliya ci kombako mawonela ya Jehovha xungetano hi mhaka leyi?
LEZVI HI NGA GONDZA
Loku uya mitlhanganweni u ta gondza zvotala xungetano hi Jehovha, u tiyisa a wunghana ga wena naye, u tlhela u mu khozela na u hi ni van’wani.
Zviwutiso zva kuvhuxeta
-
Hikuyini Jehovha a hi kucako ku maha mitlhangano?
-
Zvini u to gondza mitlhanganweni ya Vakustumunyu va Jehovha?
-
Hi tihi tin’wani tindlela u alakanyako ku u nga vhuneka hi tona loku uya mitlhanganweni?
GONDZA ZVIN’WANI
A ku alakanyela kuya mitlhanganweni zva ku chavisa? Wona lezvi a wanuna wo kari loyi yenawu zvi nga mu chavisa, a nga sangulisa zvona ku yi randza mitlhangano.
Wona ku hikuyini a jaha go kari gi nga yi randza mitlhangano niku zvini gi nga maha kasi gi nga lovhi mitlhanganweni.
Wona lezvi a van’wani va ti zwisako zvona hi kuya mitlhanganweni.
“Hikuyini u faneleko kuya mitlhanganweni Salawini ya Mufumo?” (Ndzima yi nga ka jw.org)
Wona lezvi a wanuna wo kari wa tihanyi a nga hi wa ntlawa wa zvigevenga a nga cicisa zvona andzhako ka kuva a yile ka mutlhangano wa Vakustumunyu va Jehovha.
“Ni kwihi nzi ngaya kona, nzi wa famba ni xibhamu xa mina” (A Murindzeli wa 1 ka Julho wa 2014)
