CIGONDZO 13
A wukhongeli ga mawunwa gi mu chakisisa kuyini Nungungulu?
Loku ku hi ku Nungungulu lirandzo, hikuyini a zvilo zvo tala zva ku biha zvi mahiwako hi wukhongeli legi gi ti byelako ku gi khozela Nungungulu? Hi magezu matsongwani, a wukhongeli lego a hi ga lisine, ga mawunwa niku gi chakisa Nungungulu. Gi mu chakisisa kuyini Nungungulu? Nungungulu i ti zwisa kuyini hi gona? Kona zvini a to gi maha?
1. A wukhongeli ga mawunwa gi mu chakisisa kuyini Nungungulu hi tigondzo ta gona?
A wukhongeli ga mawunwa gi “cicisile a lisine la Nungungulu hi mawunwa”. (Va Le Roma 1:25) Hi cikombiso, a wukhongeli go tala a gi va gondzisi a vito ga Nungungulu a valandzeli va gona. Hambulezvo, a Bhibhiliya gi wula ku a vito ga Nungungulu gi fanele ku tirisiwa. (Va Le Roma 10:13, 14) Loku ku humelela nchumu wo biha, a varangeli vo kari va wukhongeli va wula lezvaku kurandza ka Nungungulu. Kanilezvi vo hemba. Nungungulu a nga tshuki a maha zvilo zva kubiha. (Lera Jakobe 1:13.) A ya hava ku a mawunwa ya wukhongeli ma tsawukanisa vanhu na Nungungulu.
2. A wukhongeli ga mawunwa gi mu chakisisa kuyini Nungungulu hi mitiro ya gona?
A wukhongeli ga mawunwa a gi khomi vanhu a ku fana ni lezvi Jehovha a va khomisako zvona. A Bhibhiliya gi wula lezvaku “a zviwonho [zva wukhongeli ga mawunwa] zvi tlhatekelene kala tilweni”. (Kuvhululelwa 18:5) Hi malembe yo tala, a wukhongeli ga ti nghenisela ka politika, gi seketela tiyimpi gi tlhela gi dayisa a vanhu vo tala. A varangeli vo kari va wukhongeli va kurumeta vanhu lezvaku va va nyika mali kasi va hanya a wutomi ga ku nandziha. A mitiro yabye yi komba lezvaku a va mu tivi Nungungulu niku a va ringanelwi hi ku vitaniwa ku malandza yakwe. — Lera 1 Johani 4:8.
3. Nungungulu i ti zwisa kuyini hi wukhongeli ga mawunwa?
Loku ku hi lezvaku wena wa bayiseka hi lezvi a wukhongeli ga mawunwa gi mahako, u alakanya ku Jehovha i ti zwisa kuyini? Jehovha wa va randza vanhu kanilezvi wa bayiseka hi varangeli va wukhongeli lava va mu chakisako va tlhela va xanisa vanhu. I tsumbisa lezvaku a wukhongeli ga mawunwa gi ta lovisiwa niku gi “nga ta ha kumiwa kambe”. (Kuvhululelwa 18:21) Zvezvanyana, Nungungulu i ta fuvisa gontlhe a wukhongeli ga mawunwa. — Kuvhululelwa 18:8.
GONDZA ZVI ETA
Gondza zvin’wani xungetano hi lezvi Nungungulu a ti zwisako zvona hi wukhongeli ga mawunwa. Wona kambe lezvi gi zvi mahileko u tlhela u wona a ku hikuyini lezvo zvi nga faneliko ku ku tsikisa ku gondza hi Jehovha.
4. Nungungulu a nga amukeli gontlhe wukhongeli
A vanhu vo tala va kholwa lezvaku a wukhongeli gi fana ni tindlela to hambana ti yisako ka Nungungulu. A ku lezvo lisine? Lerani Matewu 7:13, 14, mu gumesa mu bhula hi ciwutiso leci:
-
A Bhibhiliya gi yi tlhamuselisa kuyini a ndlela yi yisako wutomini?
Bisani VHIDHIO, mu gumesa mu bhula hi ciwutiso ci landzelako.
-
A ku a Bhibhiliya ga wula ku a wukhongeli gontlhe ga mu tsakisa Nungungulu?
5. A wukhongeli ga mawunwa a gi kombisi a lirandzo la Nungungulu
A wukhongeli ga mawunwa gi chakisa Nungungulu hi tindlela to tala. A yin’we ya tindlela gi mu chakisako hi yona ku patseka ka tiyimpi. Kasi mu wona a cin’we ca zvikombiso, bisani VHIDHIO. Andzhako ka lezvo, bhulani hi zviwutiso zvi landzelako.
-
Zvini lezvi a tichichi to tala ti nga maha yimpini ya wumbiri ya misava?
-
U ti zwisa kuyini hi lezvi ti zvi mahileko?
Lerani Johani 13:34, 35 ni 17:16. Andzhako ka lezvo, bhulani hi zviwutiso lezvi:
-
U alakanya ku Jehovha i ti zwisa kuyini a cikhati leci a wukhongeli gi ti patsako ka tiyimpi?
-
A wukhongeli ga mawunwa gi na ni nandzu wa zvilo zvo tala zvo biha. Zvilo muni u zvi wonako zvi kombako ku a wukhongeli a gi kombisi a lirandzo la Nungungulu?
A wukhongeli ga mawunwa a gi kombisi a lirandzo la Nungungulu
6. Nungungulu i lava ku vhuna vanhu a ku va huma ka wukhongeli ga mawunwa
Lerani Kuvhululelwa 18:4, a mu gumesa mu bhula hi ciwutiso leci:
-
U ti zwisa kuyini hi ku tiva lezvaku Nungungulu wa zvi lava a ku ponisa lava va kanganyisiwako hi wukhongeli ga mawunwa?
7. Simama ku gondza hi Nungungulu wa lisine
A ku a zvilo zva kubiha lezvi a wukhongeli ga mawunwa gi zvi gondzisako ni ku zvi maha zvi fanele ku ku tsikisa ku gondza hi Nungungulu ke? Ehleketa hi n’wana loyi a tsikako ku ingisa a papayi wakwe, a suka laha kaya a ya sangula ku maha a zvilo zva kubiha. A papayi a nga tsakisiwi hi mitiro ya n’wana wakwe. Hikuyini zvi nga wa ta kala zvi nga hi zvinene a ku mu nyika nandzu a papayi hi kota ya lezvi a n’wana wakwe wa muhluwuki a hanyisako zvona?
-
A ku zvi wa tava zvinene a ku mu nyika nandzu Jehovha u tlhela u tsika ku gondza hi yena hi kota ya lezvi zvi mahiwako hi wukhongeli ga mawunwa?
A VOKARI VE: “Gontlhe a wukhongeli gi nene, gontlhe gi khozela a Nungungulu yaloyi wa mun’we.”
-
Wenawu u zvi wonisa zvezvo?
-
Hambu lezvi a wukhongeli gontlhe gi wulako ku gi khozela Nungungulu, hikuyini gi kalako gi nga hi gontlhe gi amukelekako ka Nungungulu?
LEZVI HI NGA GONDZA
A wukhongeli ga mawunwa gi chakisa Nungungulu hi tigondzo ta gona ta mawunwa ni mitiro ya gona yo nyenyeza. Hikwalaho, Nungungulu i ta lovisa a wukhongeli ga mawunwa.
Zviwutiso zva kuvhuxeta
-
U zvi wonisa kuyini lezvi a wukhongeli gi zvi gondzisako ni ku zvi maha?
-
Jehovha i ti zwisa kuyini hi wukhongeli ga mawunwa?
-
Zvini lezvi Nungungulu a to maha wukhongeli ga mawunwa?
GONDZA ZVIN’WANI
Gondza u wona a zvilo zvimbiri lezvi a wukhongeli go tala gi mahako zvi nga tsakisiko Nungungulu.
“A wukhongeli gontlhe ga fana ke? A ku gontlhe gi yisa ka Nungungulu?” (Ndzima yi nga ka jw.org)
Hikuyini Jehovha a lavako ku hi mu khozela na hi hi ni van’wani?
“Xana zva boha ku hi lumba a hlengeletano yo kari ya wukhongeli?” (Ndzima yi nga ka jw.org)
A paderi wo kari i wa kanakanela a wukhongeli gakwe. Hambulezvo, a nga tsikangi ku hlota lisine xungetano hi Nungungulu.
“Hikuyini a paderi a tsikileko a chichi yakwe?” (Khindlimuka!, Fevereiro 2015)
Hi mazanazana ya malembe, a wukhongeli gi gondzisa mawunwa xungetano hi Nungungulu lawa ma mahako vanhu va kholwa ku Nungungulu a nga na mhaka na hina niku i na ni tihanyi. Wona lisine xungetano hi mawunwa lawa ya manharu.
“Mawunwa ma mahako vanhu zi va karatela ku ranza Nungungulu” (A Murindzeli wa 1 ka Novembro wa 2013)
a Kasi ku tiva ku hikuyini a bhuku ga Kuvhululelwa gi tlhamuselako a wukhongeli ga mawunwa kota wasati a vitaniwako ku i Bhabhuloni wa Hombe wona a Tlhamuselo wa wu 1.
