CIGONDZO 19
A Vakustumunyu va Jehovha hakunene maKristu ya lisine?
Hina Vakustumunyu va Jehovha ha kholwa ku hi maKristu ya lisine. Hikuyini? Lezvi hi zvi kholwako zvi seketelwa ka yini? Hikuyini hi ti vitanako ku hi Vakustumunyu va Jehovha? Kona hi zvi kombisa kuyini lezvaku ha randzana?
1. Lezvi a Vakustumunyu va Jehovha va zvi kholwako zvi seketelwa ka yini?
Jesu i wulile lezvi: “A mhaka ya [Nungungulu] lisine.” (Johani 17:17) A kufana na Jesu, a Vakustumunyu va Jehovha contlhe cikhati va seketela lezvi va zvi kholwako lomu ka Mhaka ya Nungungulu. Hi cikombiso, wona matimu ya Vakustumunyu va Jehovha, lava kusanguleni va nga tiviwa ku Zvigondzani zva Bhibhiliya. Hi 1870, a ntlawa wa vanhu va timbilu tinene wu no sangula ku hlolisisa khwatsi a Bhibhiliya kasi ku tiva lezvi hakunene a Bhibhiliya gi gondzisako. Va wa seketela a kukholwa kabye ka lezvi a Bhibhiliya gi wulako hambu loku lezvo zvi hambana ni lezvi a tichichi ti nga gondzisa. Hi kulandzela, va no sangula ku bhulela van’wani lezvi va nga kari va gondza lomu ka Bhibhiliya. a
2. Hikuyini hi ti vitanako ku hi Vakustumunyu va Jehovha?
Jehovha i vitana lava va mu khozelako aku Vakustumunyu vakwe hakuva va wulawula lisine hi yena. (Mahebheru 11:4–12:1) Hi cikombiso, cikhatini ci hundzileko, Nungungulu i byelile vanhu vakwe, aku: “N’wina mu vakustumunyu va mina.” (Lera Isaya 43:10.) Jesu i vitaniwa ku i “Kustumunyu wo Tsumbeka”. (Kuvhululelwa 1:5) Hikwalaho, hi 1931 hi no ti chula vito gaku Vakustumunyu va Jehovha. Ha tizwa matshandza hi ku vitaniwa hi vito legi.
3. A Vakustumunyu va Jehovha va li pimanyisisa kuyini a lirandzo la Jesu?
Jesu i wa va randza nguvhu a vapizani vakwe laha ka kuza va ku khwatsi maxaka yakwe. (Lera Marku 3:35) Hi kufanana, a Vakustumunyu va Jehovha i ngango wu boheneko wa misava yontlhe. Hi caleco ci hi mahako hi vitanana ku hi vamakabye. (Filemoni 1, 2) Hi tlhela hi ingisa a cileletelo leci, caku: “Mu randza vamakabye vontlhe.” (1 Pedro 2:17) A Vakustumunyu va Jehovha va kombisa lirandzo leli hi tindlela to tala. Va vhuna a vamakabye vabye misaveni yontlhe loku va hi zvikaratweni.
GONDZA ZVI ETA
Gondza zvin’wani xungetano hi matimu ya Vakustumunyu va Jehovha u tlhela u wona a zvin’wani zvikombiso zva lezvaku hakunene hi maKristu ya lisine.
Lezvi a maKristu ya lisine ma zvi kholwako zvi seketelwa lomu ka Bhibhiliya niku ma gondzisa van’wani lezvi ma gondzako
4. Lezvi hi zvi kholwako zvi seketelwa ka Bhibhiliya
Jehovha i phrofetile lezvaku lezvi hi gi zwisisisako zvona a Bhibhiliya zvi wa taya zvi dlunyateka. Lerani Dhaniyeli 12:4 ni tlhamuselo wa lahasi, mu gumesa mu bhula hi ciwutiso leci:
-
Zvini zvi nga wa ta “andza” cikari ka vanhu va Nungungulu laha va simamako ku hlola Bhibhiliya?
Wona lezvi a ntlawa wa zvigondzani zva Bhibhiliya, a ku patsa na Charles Russell, wu nga gondzisa zvona a Mhaka ya Nungungulu. Bisani VHIDHIO, mu gumesa mu bhula hi ciwutiso ci landzelako.
-
Charles Russell ni zvigondzani-kuloni zva Bhibhiliya va wa gondzisa kuyini a Bhibhiliya?
U wa zvi tiva?
Ka zvikhati zvin’wani, ha chukwatisa lezvi hi gi zwisisisako zvona a Bhibhiliya. Hikuyini? A ku khwatsi hi lezvi a gambo gi tsuwukako hi kutsongwani-kutsongwani kala gi ku n’we hi wona khwatsi, Nungungulu yenawu i hi vhuna ku zwisisa a Mhaka yakwe hi kutsongwani-kutsongwani. (Lerani Mavingu 4:18.) Hambu lezvi a Bhibhiliya gi kalako gi nga cici, a cikhati leci hi gi zwisisako khwatsi ha chukwatisa lezvi hi gondzisako.
5. Lezvi hi hanyisako zvona zvi yelana ni vito ga hina
Hikuyini hi ti chulileko a vito gaku Vakustumunyu va Jehovha? Bisani VHIDHIO, mu gumesa mu bhula hi ciwutiso ci landzelako.
-
Hikuyini a vito Vakustumunyu va Jehovha gi hi ringanako?
Hikuyini Jehovha a hlawulileko vanhu kasi vava vakustumunyu vakwe? Hi lezvaku a vakustumunyu lavo va wa ta yimela Jehovha ka mawunwa yo tala lawa a vanhu va mu hembelako. A hi wone a mawunwa mambiri basi.
A wukhongeli go kari gi gondzisa lezvaku a vanhu va fanele ku tirisa zvifananiso a cikhati leci va khozelako Nungungulu. Hambulezvo, lerani Levhi 26:1, mu gumesa mu bhula hi zviwutiso lezvi:
-
A ku lisine ku Nungungulu i lava ku hi tirisa zvifananiso kasi ku mu khozela? Jehovha i zvi wonisa kuyini zvifananiso?
A varangeli vo kari va wukhongeli va gondzisa ku Jesu hi Nungungulu. Lerani Johani 20:17, mu gumesa mu bhula hi zviwutiso lezvi:
-
Lisine ku Jesu i Nungungulu? Nungungulu na Jesu munhu mun’we?
-
U ti zwisa kuyini hi ku tiva lezvaku Jehovha i rumile Vakustumunyu vakwe lezvaku va chumayela lisine xungetano hi yena ni N’wana wakwe?
6. Ha randzana
A Bhibhiliya gi fananisa maKristu ni zviro zva miri wa munhu. Lerani 1 Va Le Korinte 12:25, 26, mu gumesa mu bhula hi zviwutiso lezvi:
-
Zvini lezvi a maKristu ya lisine ma faneleko ku maha loku a maKristu-kuloni ma xaniseka?
-
Zvini u zvi wonileko zvi kombako lezvaku a Vakustumunyu va Jehovha va randzana?
Loku a Vakustumunyu va Jehovha va tiko go kari va xaniseka, a Vakustumunyu-kuloni va misaveni yontlhe va tekela ku va vhuna. Kasi u wona cikombiso cin’we, bisani VHIDHIO. Andzhako ka lezvo, bhulani hi ciwutiso ci landzelako.
-
A Vakustumunyu va Jehovha va vhunanile hi ndlela muni andzhako ka cingulo ca hombe?
A maKristu ya lisine ma kombisa lirandzo ka lava va nga kuxanisekeni
A VOKARI VE: “A Vakustumunyu va Jehovha wukhongeli giswa.”
-
Jehovha i sangulile rini ku vitana a vakhozeli vakwe aku vakustumunyu vakwe?
LEZVI HI NGA GONDZA
A Vakustumunyu va Jehovha maKristu ya lisine. Hi ngango wa vakhozeli va misava yontlhe. Hi seketela lezvi hi zvi kholwako lomu ka Bhibhiliya hi tlhela hi chumayela lisine xungetano hi Jehovha.
Zviwutiso zva kuvhuxeta
-
Hikuyini hi ti chulileko a vito gaku Vakustumunyu va Jehovha?
-
Hi zvi kombisa kuyini ku ha randzana?
-
U alakanya ku a Vakustumunyu va Jehovha hakunene maKristu ya lisine?
GONDZA ZVIN’WANI
Gondza zvin’wani xungetano hi matimu ya hina.
Wona a cikombiso ca lezvi a Vakustumunyu va Jehovha va ti paluxisileko zvona a tigondzo ta mawunwa.
Wona mihlamulo ya zviwutiso zvo kari lezvi a vanhu va talako ku wutisa xungetano hi Vakustumunyu va Jehovha.
“Lezvi va talako ku wutisa hi Vakustumunyu va Jehovha” (Pajina ga saite ya jw.org)
Stephen i wa va zonda nguvhu a vanhu va hlonge yin’wani laha ka kuza a va vhukela. Wona ku zvini a zvi wonileko cikari ka Vakustumunyu va Jehovha zvi mu mahileko a cica.
“A wutomi ga mina gi waya gi biha nguvu” (A Murindzeli wa 1 ka Julho wa 2015)
a Kusukela hi 1879, a vanhu va Jehovha va humesa a revhista A Murindzeli, kasi ku tlhamusela a lisine la Bhibhiliya.
