CIGONDZO 22

U nga sangulisa kuyini a ku chumayela a mahungu ya manene?

BISA

Laha u gondzako lezvi a Bhibhiliya gi zvi gondzisako, u nga tshuka u alakanya lezvi: ‘A vanhu vontlhe va fanele ku tiva mahungu lawa!’ Kunene, vontlhe va fanele ku ma tiva! Kanilezvi, u nga tshuka u chava a ku bhulela van’wani lezvi u zvi gondzako. U nga ku hlulisa kuyini a kuchava loko u tlhela u sangula ku chumayela a mahungu ya manene ya Bhibhiliya hi litsako? Hi ta zvi wona ka cigondzo leci.

1. U nga sangulisa kuyini a ku bhulela vanhu lava u va tivako lezvi u gondzako?

A vapizani va Jesu va wulile lezvi: “Hi nga ta tsika ku wulawula hi zvilo lezvi hi zvi wonileko ni ku zvizwa.” (Mitiro 4:20) Va wa zvi randza nguvhu lezvi Jesu a nga va gondzisile laha ka ku va wa lava ku a vanhu vo tala va zvi tiva. Wenawu u ti zwisa lezvo? Loku zvi hi lezvo, hlota tindlela ta ku bhulela a maxaka ya wena ni vanghana va wena hi ndlela ya cichavo lezvi u gondzako. — Lera Va Le Kolosi 4:6.

Mawonela yo kari u nga ma tirisako

A cikhati leci u bhulako ni xaka, kuzvilava u nga sangula mabhulo xungetano hi Bhibhiliya hi ku wula lezvi: “Ka vhiki legi ndzi gondzile a nchumu wo tsakisa.”
Loku a munghana wa wena a babya kutani ku karateka hi kota ya zvokari, mu lerele a mutsalo wu to mu chavelela.
Loku lava u tirako navo va ku wutisa ku ku fambisile kuyini a kumbhela ka vhiki, va hlawutele lezvi u gondzileko ka cigondzo ca wena ca Bhibhiliya kutani mutlhanganweni wa bandla.
Va kombe a site jw.org a vanghana va wena.
Ramba van’wani kasi va ta wona lezvi ci fambisako zvona a cigondzo ca wena ca Bhibhiliya kutani ku va komba lezvi va nga kombelisako zvona a cigondzo ca Bhibhiliya lomu ka site jw.org.

2. Hikuyini zvi nga zvi nene a ku chumayela zvin’we ni bandla?

A vapizani va Jesu va wa nga chumayeli a mahungu ya manene ka vanhu lava va nga va tiva ntsena. Jesu i no va “ruma hi vambiri vambiri mahlweni [kakwe] vaya ka madhoropa wontlhe” va ya chumayela. (Luka 10:1) Lezvo zvi vhululile mole wa ku a vanhu vo tala vazwa a mahungu ya manene. Ahandle ka lezvo, a kuchumayela zvin’we zvi va nyikile litsako a vapizani. (Luka 10:17) A ku wenawu u nga ti vekela mixuvo ya ku sangula ku chumayela ni bandla?

GONDZA ZVI ETA

Gondza u tiva lezvi u nga hlulisako zvona a kuchava ni lezvi u nga ti buzisako zvona hi ku chumayela a mahungu ya manene.

3. Jehovha i tava zvin’we na wena

A vokari va lavako ku sangula ku chumayela va nga karateka hi lezvi a van’wani va to va wonisa zvona kutani hi lezvi va to va khomisa zvona.

Wa chava a ku bhulela van’wani lezvi u zvi gondzako? Hikuyini?

Bisani VHIDHIO, mu gumesa mu bhula hi zviwutiso zvi landzelako.

VHIDHIO: Ndzi no khongela ka Jehovha ndzi kombela kutiya-hlanha (4:05)

A vaswa lava va Vakustumunyu va ku hlulisile kuyini a kuchava kabye?

Lerani Isaya 41:10, mu gumesa mu bhula hi ciwutiso leci:

A mukhongelo wu nga ku vhunisa kuyini loku u chava kuchumayela?

U wa zvi tiva?

A kutala ka Vakustumunyu va Jehovha kusanguleni va wa alakanya lezvaku va nga ta tshuka va zvi kota a kuchumayela mahungu ya manene ka van’wani. Hi cikombiso, Sergey i wa ti wona na a nga vhuni nchumu niku zvi wa mu karatela a ku wulawula ni van’wani. Kanilezvi yena i no sangula ku gondza Bhibhiliya. I wula lezvi: “Hambu lezvi ndzi nga chava, ndzi no sangula ku wulawula ni van’wani hi lezvi ndzi nga gondza. Lezvi zvi nga ndzi hlamalisa hi ku laha ndzi nga kari ndzi bhula ni van’wani hi Bhibhiliya zvi wa ndzi maha ndzi susa a maalakanyo ya mina ya ku a ndzi vhuni nchumu. Niku a ku bhula ni van’wani hi Bhibhiliya zvi mahile ku a kukholwa ka mina ku zima timitsu mbilwini ya mina.”

4. Wulawula hi ndlela ya cichavo

Laha u va bhulelako mahungu ya manene van’wani u nga alakanyeli ntsena lezvi u to wula, kanilezvi alakanyela kambe hi lezvi u to wulawulisa zvona. Lerani 2 Timote 2:24 na 1 Pedro 3:15, mu gumesa mu bhula hi zviwutiso lezvi:

U nga ma tirisisa kuyini a mavhesi lawa a cikhati leci u bhulako ni van’wani hi Bhibhiliya?
A maxaka yo kari ni vanghana va nga tshuka va ku kaneta a cikhati leci u va chumayelako. Loku lezvo zvi humelela u nga maha yini? Kona zvini u nga faneliko ku maha?
Hikuyini zvi nga wa tava zvinene a ku va maha zviwutiso hi ndlela ya cichavo wutshan’wini ga ku va kurumeta a ku vhumela lezvi u va gondzisako?

5. A ku bhulela van’wani a mahungu ya manene zva nyika litsako

Jehovha i nyikile Jesu a ntiro wa ku chumayela a mahungu ya manene. Jesu i wa wu wonisa kuyini a ntiro lowo? Lerani Johani 4:34, mu gumesa mu bhula hi zviwutiso lezvi:

A kuga zvakuga zva zvi nene zvi maha lezvaku hiva ni lihanyo linene zvi tlhela zvi hi nehela litsako. Hikuyini Jesu a nga fananisa a ku maha kurandza ka Nungungulu — a ku patsa ni ku chumayela mahungu ya manene — ni kuga zvakuga?
Hikuyini a ntiro wa kuchumayela mahungu ya manene wu nyikako litsako?

Mawonela

Ka mutlhangano wa bandla wa laha cikari ka vhiki, demba khwatsi ndleve ka mawonela ma nyikiwako xungetano hi ndlela ya ku bhulela van’wani a mahungu ya manene.
Ti tsalelise kasi u maha zvipandze ka mutlhangano wa bandla wa laha cikari ka vhiki. A ku maha zvipandze zva zvigondzani zvi nga ku vhuna a ku wulawula ni van’wani hi lezvi u gondzako na u nga chavi nchumu.
Tirisa a zvipandze “A vokari ve” kutani “A wokari a nga ha ku wutisa ku” zva bhuku legi kasi ku vhuxeta lezvi u nga mu hlamulisako zvona munhu loku a ku maha ciwutiso co kari kutani loku a ku kaneta.

A WOKARI A NGA HA KU WUTISA KU: “Hi wahi ya maswa?”

U nga wu londzowotisa kuyini a mole lowo kasi ku mu hlawutela lezvi u nga gondza ka cigondzo ca wena ca Bhibhiliya?

LEZVI HI NGA GONDZA

A ku bhulela van’wani a mahungu ya manene zva nyika litsako, niku zva olova a ku hundza lezvi u zvi pimisako.

Zviwutiso zva kuvhuxeta

Hikuyini hi bhulelako van’wani a mahungu ya manene?
U nga chumayelisa kuyini hi ndlela ya cichavo?
U nga ku hlulisa kuyini a kuchava ku chumayela?

Ndzi mbhetile a cigondzo leci hi dhiya:

Zama ku maha lezvi

Ehleketa hi munhu wo kari wa ku u nga mu bhulela a mahungu ya manene. Ehleketa hi lezvi u to wula, hi lezvi u to wulawulisa zvona, ni cikhati ca ku zvi wula hi cona.

Zvin’wani:

Your other goal