CIGONDZO 26

Hikuyini ku nga ni kubiha ni kuxaniseka?

BISA

Loku ku humela a nchumu wo biha nguvhu hi tolovela ku wutisa ku: “Hikuyini zvi nga humelela?” A ho ku tsaka hi lezvi a Bhibhiliya gi hlamulako a ciwutiso leco!

1. Sathani i ku sangulisile kuyini a kubiha laha misaveni?

Sathani, Dhiyabho, i no vhukela Nungungulu. Sathani i wa lava ku fumela van’wani. Hikwalaho, i no kucetela a vanhu vo sangula, ku nga Adhamu na Evha, lezvaku va ti patsa naye va vhukela Nungungulu. Sathani i mahile lezvo hi ku hembela Evha. (Genesisi 3:1-5) I mahile Evha a alakanya ku Nungungulu i wa mu tsona a zvilo zva zvinene. Hi ku maha lezvo, i wo wula ku a vanhu va wa ta tsaka loku va nga ingisi Nungungulu. Sathani i wulile mawunwa yo sangula laha a nga byela Evha ku a nga tafa. Hikwalaho, a Bhibhiliya gi wula ku Sathani “muhembi ni papayi wa mawunwa”. — Johani 8:44.

2. Zvini lezvi Adhamu na Evha va nga hlawula ku maha?

Jehovha i wa va nyikile zvilo zvo tala zva zvinene Adhamu na Evha. I wa va byelile lezvaku va ngaga a mihandzu ya tisinya tontlhe ti nga hi lomu jardhim ya Edheni va tsika yin’we basi. (Genesisi 2:15-17) Kanilezvi, vona va no hlawula a kuga a mihandzu ya siya leyo. Evha “i no khaya a handzu wa kona, a sangula kuga”. Hi ndzhako ka cikhati, Evha i no nyika Adhamu “yenawu a sangula kuga”. (Genesisi 3:6) Hi wumbiri gabye va no tsika ku ingisa Nungungulu. Kota lezvi Adhamu na Evha va nga mbhelele, zvi wa nga va karateli ku maha zvazvinene. Kanilezvi, va no tsika ku ingisa Nungungulu ha womu. Laha va nga maha lezvo, va no wonha, va fularela a wuhosi gakwe. A ciboho cabye ci va nehele kuxaniseka ka hombe. — Genesisi 3:16-19.

3. A ciboho ca Adhamu na Evha ci hi khumbisa kuyini?

A cikhati leci Adhamu na Evha va nga wonha, va nova vanhu vo kala kumbhelela niku hi ndlela leyo va no va thapelisa a kungambheleli vontlhe a vana vabye. Na gi wulawula hi Adhamu, a Bhibhiliya gi wula lezvi: “Hi kota ya munhu mun’we a ciwonho ci [no] nghena tikweni, ni kufa hi kota ya ciwonho; hizvalezvo a kufa ku no thapela vanhu vontlhe hakuva vontlhe va wonhile.” — Va Le Roma 5:12.

Ha xaniseka hi kota ya zvigelo zvo tala. Ka zvikhati zvin’wani, ha xaniseka hi kota ya zviboho zva hava lezvi hina hi mahako. Ha xaniseka kambe hi kota ya zviboho zva hava lezvi a van’wani va mahako. Niku ka zvikhati zvin’wani ha xaniseka hi kuva ka wutshamu ga hava hi cikhati ca hava. — Lera Mutshawuteli 9:11.

GONDZA ZVI ETA

Gondza u tiva ku hikuyini Nungungulu a kalako a nga hi na nandzu wa kubiha ni kuxaniseka loku ku nga kona laha misaveni nyamutlha u tlhela u wona ku i ti zwisa kuyini a cikhati leci hi xanisekako.

4. Himani a nga ni nandzu wa kuxaniseka ka hina

A vanhu vo tala va kholwa ku hi Nungungulu a fumelako a misava yontlhe. A ku lezvo lisine? Bisani VHIDHIO.

VHIDHIO: Himani a fumako a misava? (1:24)

Lerani Jakobe 1:13 na 1 Johani 5:19, mu gumesa mu bhula hi ciwutiso leci:

Hi Nungungulu a nga ni nandzu hi lezvi hi xanisekako ni lezvi ku humelelako a zvilo zva kubiha?

5. Mihandzu ya kufuma ka Sathani

Bisani VHIDHIO.

VHIDHIO: Hikuyini Nungungulu a vhumelelako kuxaniseka? — Cipandzana (3:07)

Lerani Genesisi 3:1-6, mu gumesa mu bhula hi zviwutiso lezvi:

Mawunwa muni lawa Sathani a ma wulileko? — Wona mavhesi 4 ni 5.
Zvini lezvi Sathani a nga wula zvi nga komba ku i wa wula ku Jehovha wa va tsona a zvazvinene a vanhu?
Hi mawonela ya Sathani, a ku a vanhu zvi lava ku va fumelwa hi Jehovha kasi va tsaka?

Lerani Mutshawuteli 8:9, mu gumesa mu bhula hi ciwutiso leci:

Lezvi ku kalako ku nga hi Jehovha a fumelako misava, zvini zvi humelelako?

Adhamu na Evha va wa mbhelele niku va wa hanya paradhiseni. Kanilezvi va no ingisa Sathani va vhukela Jehovha
Andzhako ka loku va tsikile ku ingisa Jehovha, a misava yi no tala hi ciwonho, ni kuxaniseka, ni kufa
Jehovha i ta fuvisa ciwonho, ni kuxaniseka, ni kufa. Ka cikhati leco, a vanhu va ta tlhela vava vo mbhelela, va hanya paradhiseni

6. Jehovha wa ku wona kuxaniseka ka hina

A ku Nungungulu wa ku wona a kuxaniseka ka hina? A hi wone lezvi zvi tsalilweko hi hosi Dhavhidha na mupostoli Pedro. Lerani Lisimu 31:7 na 1 Pedro 5:7, mu gumesa mu bhula hi ciwutiso leci:

U ti zwisa kuyini hi ku tiva lezvaku Jehovha wa ku wona a kuxaniseka ka hina niku wa karateka hi kona?

7. Nungungulu i ta fuvisa a kuxaniseka kontlhe ka vanhu

Lerani Isaya 65:17 na Kuvhululelwa 21:3, 4, mu gumesa mu bhula hi ciwutiso leci:

Hikuyini zvi chavelelako a ku tiva lezvaku Jehovha i ta fuvisa a tiphanja tontlhe leti a vanhu va nga nato hi kota ya zvilo zva kubiha lezvi zvi va humeleleko?

U wa zvi tiva?

A cikhati leci Sathani a nga wula a wunwa go sangula i wo lumbeta Jehovha. Lezvi zvi wula ku i chakisile a vito ga Jehovha hi ku maha vanhu va pimisa ku a hi Mufumeli wo lulama niku a nga na lirandzo. Laha Jehovha a to fuvisa a kuxaniseka ka vanhu zvezvanyana, i ta basisa vito gakwe. Hi magezu man’wani, i ta komba zvi ku dlunya ku a wuhosi gakwe hi gona ga ginene. A kubasisiwa ka vito ga Jehovha i mhaka ya lisima nguvhu wuakweni gontlhe. — Matewu 6:9, 10.

A VOKARI VE: “Hi Nungungulu a hi xanisako kasi ku hi ringa.”

U wa ta wula yini?

LEZVI HI NGA GONDZA

Sathani Dhiyabho ni vanhu vambiri vo sangula hi vona nguvhunguvhu va nga ni nandzu wa kubiha kontlhe ku nga lomu misaveni. Jehovha wa karateka nguvhu loku hi xaniseka niku zvezvanyana i ta fuvisa kuxaniseka.