U tshuka u felwa hi munhu u mu randzako? Ka cikhati leco u zwako kubayisa, kuzvilava u nga ti wutisa ku: ‘Zvini zvi humelelako loku hifa? A ku hi ta tshuka hi va wona kambe a varandzekako va hina va fileko?’ Ka cigondzo leci ni leci ci landzelako, u ta wona mihlamulo ya Bhibhiliya yi chavelelako.

1. Zvini zvi humelelako loku hifa?

Jesu i fananisile a kufa ni wurongo ga hombe. Hikuyini? A munhu a etleleko wurongo ga hombe a nga zvizwi lezvi zvi mahekako laha a nga kona. Hi kufanana, a munhu a fileko a ngazwi nchumu: a ngazwi kubayisa, a nga xaniseki ne a ngazwi ciwundza. A Bhibhiliya gi wula lezvi: “A vafileko a va tivi nchumu.” — Mutshawuteli 9:5.

2. Hikuyini hi vhunekako hi ku tiva lisine xungetano hi kufa?

A vanhu vo tala va zvi chava kufa va tlhela va chava vafileko! Kanilezvi wena u nga chavelelwa hi lezvi a Bhibhiliya gi zvi wulako hi kufa. Jesu i te: “[A] lisine li ta mu tlhatlhisa.” (Johani 8:32) A ku hambana ni lezvi a wukhongeli go kari gi wulako, a Bhibhiliya a gi gondzisi ku a munhu i na ni muhefemulo wu nga fiko, lowu wu simamako ku hanya loku a munhu a file. Hikwalaho, i hava a xanisekako na a file. Kota lezvi a vafileko va kalako va nga tivi nchumu, a va nge zvi koti ku hi mahela kubiha. Hikwalaho, a zvi lavi ku hi khongotela kutani kukhozela a vafileko hambu ku va khongelela.

A vanhu vo kari va wula lezvaku va nga wulawula ni vafileko. Kanilezvi lezvo a zvi koteki. Kota lezvi hi nga zvi wona, “a vafileko a va tivi nchumu”. Lava va alakanyako ku va wulawula ni varandzekako vabye va fileko hi lisine va wulawula ni madhimoni lawa ma ti mahako ku khwatsi vanhu lava vafileko. Hikwalaho, a ku tiva lisine xungetano hi vafileko zva hi vhikela ka madhimoni. Jehovha wa hi tlharihisa xungetano hi ku zama ku wulawula ni vafileko hakuva wa zvi tiva lezvaku a ku wulawula ni madhimoni zvi ta hi vangela mhango. — Lera Dhewuteronome 18:10-12.

3. Tiva lisine xungetano hi vafileko

Misaveni yontlhe, a vanhu va ni mawonela yo hambanahambana xungetano hi lezvi zvi humelelako loku hifa. Kunene, a hi wontlhe a mawonela lawo ma nga lisine.

• Lomu cipandzeni ca wena, zvini lezvi a vanhu va kholwako ku zva humelela loku munhu afa?

 4. Ha vhuneka hi ku tiva lisine xungetano hi vafileko

A ku tiva lisine xungetano hi kufa zva hi tlhatlhisa ka ku chava vafileko. Lerani Mutshawuteli 9:10, mu gumesa mu bhula hi ciwutiso leci:

• A vafileko va nga hi mahela kubiha?

A lisine la Bhibhiliya la hi vhikela kambe ka mawunwa ya ku a vafileko va fanele ku khongotelwa kutani ku khozelwa. Lerani Isaya 8:19 na Kuvhululelwa 4:11, mu gumesa mu bhula hi ciwutiso leci:

• U alakanya ku Jehovha i mu wonisa kuyini a munhu loyi a khozelako kutani ku lava civhuno ka munhu a fileko?

5. A ku tiva lisine xungetano hi vafileko zva hi chavelela

A vanhu vo tala va gondzisiwa ku loku vafa, va ta tsayisiwa hi kota ya zvilo zvo biha lezvi va zvi mahileko. Kanilezvi zva hi chavelela a ku tiva lezvaku i hava a tsayisiwako andzhako ka loku a file, hambu loyi a mahileko a zvilo zvo biha nguvhu. Lerani Va Le Roma 6:7, mu gumesa mu bhula hi ciwutiso leci:

• A Bhibhiliya gi wula lezvaku loyi a fileko a nga ha hi na nandzu wa zviwonho zvakwe. Makunu, u alakanya ku a munhu a fileko wa tsayisiwa hi kota ya zviwonho zvakwe zva kale?

Laha hi yako hi mu tiva khwatsi Jehovha, hiya hi zvi zwisisa khwatsi ku i wa nga ta tshuka a tsayisa a munhu a fileko. Lerani Dhewuteronome 32:4 na 1 Johani 4:8, mu gumesa mu bhula hi zviwutiso lezvi:

• A Nungungulu a nga ni matshamela lawa hi nga lera ka mavhesi lawa, a nga vhumelela vanhu va fileko lezvaku va tsayisiwa?

• U alakanya ku a ku tiva a lisine xungetano hi kufa zva chavelela? Hikuyini?

 LEZVI HI NGA GONDZA

Loku munhu afa a nga tivi nchumu. A vafileko a va xaniseki ne a va nge va maheli kubiha a vahanyako.

Zviwutiso zva kuvhuxeta

• Zvini zvi humelelako loku hifa?

• Hi vhunekisa kuyini hi ku tiva a lisine xungetano hi vafileko?

• A ku tiva lisine xungetano hi vafileko zvi hi chavelelisa kuyini?