CIGONDZO 30
A vanghana ni maxaka ya wena va fileko va nga tlhela va hanya!
A kufa ku vanga a cirilo ni kupandza ka mbilu. Hi cigelo leco a Bhibhiliya gi wulako ku a kufa i nala. (1 Va Le Korinte 15:26) Ka cigondzo 27, u gondzile ku Jehovha i ta hlula a nala loye. Kanilezvi zvini lezvi zvi to maheka ka lava va sinako va file? Ka cigondzo leci, u ta gondza zvin’wani hi citsumbiso co tsakisa ca Jehovha, ca ku i ta vhuxa a tibhiliyoni ta vanhu kasi va ti buza hi wutomi kala kupindzuka. A ku lezvo hakunene zvi ta maheka? Va ta vhuxiwa kasi va hanya le tilweni kutani laha misaveni?
1. Zvini lezvi Jehovha a lavako ku mahela a vanghana ni maxaka ya hina lava va fileko?
Jehovha wa zvi donela mari a ku vhuxa lava va fileko. A wanuna wo kari wo tsumbeka wa ku hi Joba i wa kholwa ku Nungungulu a nga ta mu rivala loku afa. I byelile Nungungulu, aku: “U ta vitana, mina ndzi ku hlamula [hi lomu cilahleni].” — Lera Joba 14:13-15.
2. Hi zvi tivisa kuyini ku a vafileko va nga tlhela va hanya?
A cikhati leci Jesu a nga hi laha misaveni, Nungungulu i mu nyikile ntamu wa ku vhuxa vanhu. Jesu i vhuxile a cinhanyetana ca 12 wa malembe ni n’wana wa noni. (Marku 5:41, 42; Luka 7:12-15) Hi ndzhako ka cikhati, Lazaru, a munghana wa Jesu i nofa. Hambu lezvi ku nga hundza a mune wa masiku Lazaru na a file a tlhela a lahliwa, Jesu i no mu vhuxa. Jesu i no khongela ka Nungungulu, a gumesa a wula lezvi: “Lazaru, huma!” Makunu, “loyi a nga file i no huma” na a hanya! (Johani 11:43, 44) Hi nga alakanyela lezvi a maxaka ni vanghana va Lazaru va nga tsakisa zvona hi ku mu wona na a hanya!
3. Zvini lezvi zvi to maheka ka vanghana ni maxaka va wena lava va fileko?
A Bhibhiliya gi tsumbisa lezvi: “Ku tava kona a kuvhuka [ka vafileko].” (Mitiro 24:15) Lava Jesu a va vhuxileko a cikhati leci a nga hi laha misaveni va wa nga yangi tilweni. (Johani 3:13) I va vhuxile kasi va tlhela va hanya kwalaha misaveni niku a va no ku tsaka hi lezvo. Hi kufanana, zvezvanyana, Jesu i ta vhuxa a vanhu va tibhiliyoni kasi va tlhela va ti buza hi wutomi kwalaha misaveni ya paradhise. I wulile lezvaku vontlhe lava alakanyiwako hi Nungungulu va ta vhuxiwa hambu loku ku nga hi na munhu a va alakanyako. — Johani 5:28, 29.
GONDZA ZVI ETA
Gondza lomu ka Bhibhiliya u tiva ku hikuyini hi nga kholwako ku Jesu i na ni ntamu wa ku vhuxa vanhu ni lezvaku i ta maha lezvo. Wona lezvi a kuvhuka ka vafileko ku nga ku chavelelisako zvona ni ku ku nyika kutsumba.
4. Jesu i kombile ku i na ni ntamu wa ku vhuxa vafileko
Gondza zvin’wani xungetano hi lezvi Jesu a nga mahela munghana wakwe Lazaru. Lerani Johani 11:14, 38-44, mu gumesa mu bhula hi zviwutiso lezvi:
-
Hi zvi tivisa kuyini ku hakunene Lazaru i wa file? — Wona vhesi 39.
-
Loku ku hi ku Lazaru i wa yile tilweni, u alakanya ku Jesu na a mu vhuxele laha misaveni?
5. Ku ta vhuxiwa a vanhu vo tala!
Lerani Lisimu 37:29, mu gumesa mu bhula hi ciwutiso leci:
-
A vanhu va tibhiliyoni lava va to vhuxiwa va ta hanya kwihi?
Jesu a nga ta vhuxa lava va khozelako Jehovha basi, kanilezvi i ta tlhela a vhuxa a vanhu vo tala nguvhu. Lerani Mitiro 24:15, mu gumesa mu bhula hi ciwutiso leci:
-
Himani u tsakelako ku mu wona na a vhuxilwe?
Ehleketa hi lezvi: Jesu a nga zvi kota ku vhuxa munhu a fileko a ku khwatsi hi lezvi a papayi wo kari a zvi kotako ku vhuxa a n’wana wakwe loku a etlele
6. A ku tiva ku a vafileko va ta vhuka zvi nga ku chavelela ni ku ku nyika kutsumba
A matimu ma nga lomu ka Bhibhiliya ma wulawulako hi nhanyana wa Jairo ma chavelela ni ku tiyisa votala va rilako. Lerani a matimu lawo ya zvilo zvi mahekileko ka Luka 8:40-42, 49-56.
Na a nga se vhuxa a nhanyana wa Jairo, Jesu i rangile hi ku byela a papayi wa kona, Jairo, aku: “U nga chavi, wena kholwa basi.” (Wona vhesi 50.) A ku tiva ku a vafileko va ta vhuka zvi nga ku vhunisa kuyini . . .
-
loku a xaka kutani munghana wa wena afa?
-
loku a wutomi ga wena gi hi mhangweni?
Bisani VHIDHIO, mu gumesa mu bhula hi zviwutiso zvi landzelako.
-
A citsumbiso ca kuvhuka ka vafileko ci va tiyisisile kuyini a vapswali va Felicity?
A VOKARI VE: “A vafileko va ta vhuxiwa le tilweni na ku nga hi laha misaveni.”
-
Hi wahi mawonela ya wena?
-
Mutsalo muni u nga wu tirisako kasi ku komba ku a kutala ka vanhu va ta vhuxiwa kasi va hanya laha misaveni?
LEZVI HI NGA GONDZA
A Bhibhiliya gi tsumbisa ku a vanhu va tibhiliyoni lava va fileko va ta vhuxiwa. Jehovha i lava ku va wona na va hanya kambe niku i mu nyikile ntamu Jesu kasi a va vhuxa.
Zviwutiso zva kuvhuxeta
-
Jehovha na Jesu va ti zwisa kuyini hi ku vhuxa vafileko?
-
A vanhu va tibhiliyoni lava va to vhuxiwa va ta hanya kwihi, le tilweni kutani laha misaveni? Hikuyini u wulako lezvo?
-
Cini ci ku kholwisako ku a maxaka ya wena ni vanghana va wena va nga tlhela va hanya?
GONDZA ZVIN’WANI
Wona zvilo u nga mahako kasi u hungula kubayisa loku u felwe.
“Cini ci nga vhunako lava va felweko?” (Khindlimuka!, N.° 3 wa 2018)
A ku a matshinya ya milayo ya Bhibhiliya hakunene ma nga vhuna a munhu a rilako?
U nga mu vhunisa kuyini n’wanana loyi a felweko hi munhu a mu randzako?
Va kona va to vhuxiwa vaya tilweni? Hi vamani va to kala ku vhuxiwa?
