CIGONDZO 15
Himani Jesu?
Jesu mun’we wa vanhu vo tiveka nguvhu matin’wini ya vanhu. Hambulezvo, a kutala ka vanhu a va tivi zvotala hi yena, vo tiva vito gakwe basi. A votala va ni mawonela yo hambanahambana xungetano hi ku himani khwatsi-khwatsi Jesu. Zvini lezvi a Bhibhiliya gi zvi wulako xungetano hi yena?
1. Himani Jesu?
Jesu i ngilozi ya ntamu yi tshamako le tilweni. Hi yena wo sangula ku vangiwa hi Jehovha Nungungulu na a nga se vanga wun’wani nchumu. Hi kota ya lezvo, i vitaniwa ku “matewula ya zvivangwa zvontlhe”. (Va Le Kolosi 1:15) A Bhibhiliya gi wula ku Jesu i “N’wana a pswalilweko yece” wa Nungungulu, hakuva Jesu hi yena yece a vangilweko hi kukongoma hi Jehovha. (Johani 3:16) Jesu i tirile ni Papayi wakwe Jehovha, na a mu vhuna a ku vanga a zvilo zvontlhe lezvi zvin’wani. (Lera Mavingu 8:30.) Jesu i simama ku ti buza hi wunghana ga hombe na Jehovha. I tira hi kutsumbeka kota muwulawuli, ku nga “Gezu,” a huwelela mahungu ya Nungungulu ni zvileletelo zvakwe. — Johani 1:14.
2. Hikuyini Jesu a tileko laha misaveni?
Kwalomo ka 2000 wa malembe ma hundzileko, Jehovha i mahile cihlamaliso. Hi ku tirisa a moya wo basa, i no rurisa a wutomi ga Jesu hi le tilweni giya khwirini ga nhwana a nga vitaniwa ku hi Mariya. Hi ndlela leyo, Jesu i no pswaliwa kota munhu. (Lera Luka 1:34, 35.) Jehovha i rumele Jesu kasi a tava Mesiya a tsumbisilweko kutani Kristu, ni ku ponisa vanhu. a A zviphrofeto zvontlhe zva Bhibhiliya zvi nga wulawula hi Mesiya zvi no tatiseka ka Jesu. Lezvo zvi vhunile vanhu a ku tiva lezvaku Jesu i wa hi yena “Kristu, a N’wana wa Nungungulu a hanyako”. — Matewu 16:16.
3. I kwihi Jesu zvezvi?
Andzhako ka loku Jesu a file, i no vhuxiwa kota ngilozi a gumesa a tlhela tilweni. Seyo, “Nungungulu i no mu tlakusa ava ka cikhundla co tlakuka”. (Va Le Filipi 2:9) Zvezvi Jesu i ka cikhundla ca hombe nguvhu. Hi Jehovha ntsena a nga ni ntamu wa hombe ku hundza Jesu.
GONDZA ZVI ETA
U ta gondza zvin’wani xungetano hi ku himani Jesu hakunene niku hikuyini zvi nga zva lisima nguvhu a ku gondza hi yena.
4. Jesu a hi Nungungulu wa Ntamu Wontlhe
A Bhibhiliya gi gondzisa ku hambu lezvi Jesu a nga ngilozi ya ntamu le tilweni, wa ingisa Jehovha, a Nungungulu wakwe tlhelo Papayi. Hi zvi tivisa kuyini lezvo? Bisani VHIDHIO kasi mu wona lezvi a Bhibhiliya gi gondzisako xungetano hi kuhambana ku nga kona cikari ka Jesu ni Nungungulu wa ntamu wontlhe.
A mitsalo yi landzelako yi hi vhuna ku zwisisa ku Jehovha wa hambana na Jesu. Lerani a mutsalo wun’we ni wun’wani, mu gumesa mu bhula hi zviwutiso zvi landzelako.
Lerani Luka 1:30-32.
-
A ngilozi yi ku tlhamuselisile kuyini a kuhambana ka Jesu na Jehovha Nungungulu, “Loyi a Tlakukileko ku Hundza Vontlhe”?
Lerani Matewu 3:16, 17.
-
Kubhabhatisweni ka Jesu, zvini lezvi a gezu gi ngata hi le tilweni gi nga wula?
-
U alakanya ku gi wa hi gezu ga mani?
Lerani Johani 14:28.
-
Laha ka papayi ni n’wana, himani a nga wa hombe ni kuva ni ntamu?
-
Jesu i wulile ku Jehovha i Papayi wakwe. Lezvo zvi hi gondzisa yini?
Lerani Johani 12:49.
-
Xana Jesu i alakanya ku yena ni Papayi wakwe va fana? Wena ke, u zvi wonisa kuyini?
5. Jesu i kombile ku hi yena Mesiya
Lomu ka Bhibhiliya ku na ni zviphrofeto zvo tala zvi wulawulako hi Mesiya, ku nga loyi Nungungulu a mu hlawulileko kasi ku ponisa vanhu. A zviphrofeto lezvo zvi vhunile vanhu a ku tiva ku i wa hi mani Mesiya. Bisani VHIDHIO kasi mu wona a zviphrofeto zvo kari lezvi Jesu a zvi tatisileko a cikhati a ngata laha misaveni.
Lerani a zviphrofeto lezvi zva Bhibhiliya, mu gumesa mu bhula hi zviwutiso lezvi zvi landzelako:
Lerani Mika 5:2 kasi mu wona lomu Mesiya a nga wa ta pswalelwa kona. b
-
A ku a ciphrofeto leci ci tatisekile? — Matewu 2:1.
Lerani Lisimu 34:20 na Zakariya 12:10, kasi mu wona lezvi a Bhibhiliya gi nga phrofetile xungetano hi kufa ka Mesiya.
-
A ku a zviphrofeto lezvi zvi tatisekile? — Johani 19:33-37
-
A vokari va alakanya ku ci kona a nga maha Jesu kasi a zviphrofeto lezvi zvi tatiseka ka yena. Wena ke, u alakanya ku zva zwala ku wula lezvo?
-
Hi mawonela ya wena, lezvo zvi komba yini hi Jesu?
6. Ha vhuneka hi ku gondza hi Jesu
A Bhibhiliya gi wula ku zva lisima nguvhu a ku gondza hi Jesu ni ntiro wakwe. Lerani Johani 14:6 ni 17:3, mu gumesa mu bhula hi ciwutiso leci:
-
Hikuyini zvi nga zva lisima nguvhu a ku gondza hi Jesu?
Jesu i vhululile ndlela kasi hiva vanghana va Nungungulu. I gondzisile lisine hi Jehovha niku hi kota yakwe hi nga kuma a wutomi ga pindzukelwa
A VOKARI VE: “Jesu hi Nungungulu.”
-
Wena ke, u zvi wonisa kuyini?
LEZVI HI NGA GONDZA
Jesu i ngilozi ya ntamu. I n’wana wa Nungungulu niku hi yena Mesiya.
Zviwutiso zva kuvhuxeta
-
Hikuyini Jesu a vitaniwako ku “matewula ya zvivangwa zvontlhe”?
-
Zvini lezvi Jesu a nga kari a maha na ku nga se vangiwa misava?
-
Hi zvi tivisa kuyini a ku Jesu hi Mesiya?
GONDZA ZVIN’WANI
Wona ku hi zvi tivisa kuyini ku Jesu hi yena Mesiya.
Wona ku hikuyini a Bhibhiliya gi nge Nungungulu i Papayi wa Jesu.
“Hikuyini Jesu a vitaniwako ku i N’wana wa Nungungulu?” (Ndzima yi nga ka jw.org)
Wona ku a gondzo yaku Nungungulu vanharu kwalaha ka kun’we a hi ya lomu ka Bhibhiliya.
“Será que Jesus é Deus?” (A Murindzeli wa 1 ka Abril wa 2009, hi ciPutukezi)
Gondza u tiva lezvi a wutomi ga wasati wo kari gi nga cicisa zvona andzhako ka kuva a hlolile lezvi a Bhibhiliya gi wulako xungetano hi Jesu.
a Ka cigondzo 26 ni 27, hi ta wona ku hikuyini a vanhu va nga lava ku ponisiwa ni lezvi Jesu a hi ponisisako zvona.
b Wona Tlhamuselo wa wu 2 kasi u wona a ciphrofeto ci nga komba a cikhati leci Jesu a nga wa tata hi cona misaveni.
