CIGONDZO 35
Hi nga zvi mahisa kuyini a zviboho zva zvinene?
Hontlheni hi fanele ku maha a zviboho zvo kari. A zvokari zva kona zvi ngava ni wuyelo ga ginene kutani go biha wutomini ga hina zvi tlhela zvi khumba a wunghana ga hina na Jehovha. Hi cikombiso, kuzvilava zvi nga lava ku hi boha ku hi ta hanya kwihi, hi ta yi kuma kwihi a mali ya ku ti hlayisa, hi ta chadha kutani ahihi. Loku hi maha a zviboho zva zvinene, hi ta ti buza hi wutomi go tsakisa hi tlhela hi tsakisa Jehovha.
1. U nga gi tirisisa kuyini a Bhibhiliya kasi ku maha zviboho zva zvinene?
Na u nga se maha a ciboho co kari, sangula hi ku khongela ka Jehovha u kombela ku a ku vhuna, u gumesa u hlola lezvi a Bhibhiliya gi zvi wulako hi mhaka ya kona. (Lera Mavingu 2:3-6.) Ka zvikhati zvo kari, Jehovha i hi nyika a cileletelo co kongoma. Ka ciyimo leco, i chukwana a ku ingisa a cileletelo leco.
Kanilezvi, ahati loku ku nga hi na cileletelo co kongoma ca Bhibhiliya ci ku byelako lezvi u faneleko ku maha? Hambu zvi tshamisile lezvo, Jehovha i ta ku rangela “ndleleni leyi u faneleko ku famba hi yona”. (Isaya 48:17) Hi ndlela muni? Lomu ka Bhibhiliya, u nga kuma a matshinya ya milayo ma nga ku rangelako. A matshinya ya milayo ya Bhibhiliya ku wuliwa lisine li nga lomu ka Bhibhiliya li kombako lezvi Jehovha a zvi alakanyako ni lezvi a ti zwisako zvona hi timhaka to kari. Hi tala ku zwisisa lezvi Jehovha a ti zwisako zvona hi mhaka yo kari a cikhati leci hi lerako a matimu yo kari lomu ka Bhibhiliya. Loku hi pola lezvi Jehovha a ti zwisako zvona, hi ta maha zviboho zvi mu tsakisako.
2. Zvini lezvi u faneleko ku zvi alakanya na u nga se maha ciboho?
A Bhibhiliya gi wula lezvi: “A munhu wo tlhariha i ranga hi ku ehleketa na a nga seba zambo gakwe.” (Mavingu 14:15) Lezvi zvi wula ku na hi nga se maha ciboho co kari, hi fanele ku ti nyika cikhati ca ku ehleketa hi zvontlhe zvi patsekako. Ti wutise lezvi: ‘Hi wahi a matshinya ya milayo ya Bhibhiliya ndzi nga ma tirisako ka ciyimo leci? Lezvi ndzi to hlawula, zvi ta ndzi nyika kurula ka maalakanyo? A ciboho ca mina ci ta va khumbisa kuyini van’wani? A ca lisima ka zvontlhe, ci ta mu tsakisa Jehovha ke?’ — Dhewuteronome 32:29.
Jehovha i na ni fanelo ya ku hi byela lezvi zvi nga zvinene ni lezvi zvi bihileko. A cikhati leci hi yi tivako khwatsi a milayo ni matshinya ya milayo ya Jehovha hi tlhela hi ti yimisela ku ingisa, ho gondzisa a livhalo la hina. A livhalo i nchumu wa le ndzeni wu hi vhunako ku tiva zvazvinene ni zvakubiha. (Va Le Roma 2:14, 15) A livhalo li gondzisilweko khwatsi li ta hi vhuna ku maha a zviboho zva zvinene.
GONDZA ZVI ETA
Gondza u tiva lezvi a matshinya ya milayo ya Bhibhiliya ni livhalo la hina zvi hi vhunisako zvona a ku maha a zviboho zva zvinene.
3. Tsika Bhibhiliya gi ku rangela
A matshinya ya milayo ya Bhibhiliya ma nga hi rangelisa kuyini laha hi mahako a zviboho? Bisani VHIDHIO, mu gumesa mu bhula hi zviwutiso lezvi zvi landzelako.
-
Cinyikiwo muni ca lisima leci Jehovha a nga hi nyika?
-
Hikuyini Jehovha a hi nyikileko a cinyikiwo ca ku tlhatlheka ku hi ti mahela zviboho?
-
Cini a hi nyikileko kasi ku hi vhuna ku maha a zviboho zva zvinene?
Kasi ku wona cikombiso ca tshinya go kari ga nayo ga Bhibhiliya, lerani Va Le Efesusi 5:15, 16. Hi kulandzela, bhulani ni lezvi u nga ci tirisisako zvona ‘khwatsi a cikhati ca wena’ kasi . . .
-
ku lera a Bhibhiliya hi kukhandzakanya.
-
uva sati kutani nuna wa munene, mamani kutani papayi wa munene, ni n’wana wa munene.
-
uva kona mitlhanganweni ya bandla.
4. Gondzisa livhalo la wena a ku maha zviboho zva zvinene
Loku ku hi ni cileletelo co kongoma ca Bhibhiliya xungetano hi mhaka yo kari, zvi nga olova a ku maha ciboho ca cinene. Kanilezvi, ahati loku ku nga hi na cileletelo co kongoma ca Bhibhiliya? Bisani VHIDHIO, mu gumesa mu bhula hi zviwutiso lezvi zvi landzelako.
-
Mazambo muni lawa a makabye loyi wa cisati a ngaba kasi ku gondzisa a livhalo lakwe ni ku maha a ciboho leci ci nga wa ta tsakisa Jehovha?
Hikuyini hi nga faneliko ku kombela van’wani a ku va hi mahela zviboho zva hina? Lera Mahebheru 5:14, mu gumesa mu bhula hi zviwutiso lezvi:
-
A ku kombela van’wani lezvaku va hi mahela zviboho zvi nga wonekisa ku khwatsi zva olova. Kanilezvi zvini lezvi a mun’we ni mun’wani wa hina a faneleko ku zvi tiva?
-
Cini ci nga ku vhunako ku gondzisa livhalo la wena ni ku maha zviboho zva zvinene?
A kufana ni mapa, a livhalo la hina li hi vhuna a ku tiva lomu hi nga yako kona wutomini ga hina
5. Kombisa cichavo hi tivhalo ta van’wani
A vanhu va hambene, hikwalaho va maha zviboho zvo hambana. Hi nga kombisisa kuyini cichavo hi tivhalo ta van’wani? Wona zviyimo zvimbiri:
Ciyimo 1: A makabye wa cisati a randzako ku boha mabhuluku loku a famba a hlakana kutani loku a kari a ti mahela mitiro yakwe i rura aya ka bandla legi a vamakabye vo tala va cisati va swirekako loku va wona van’wani na va bohile mabhuluku.
Lerani Va Le Roma 15:1 na 1 Va Le Korinte 10:23, 24, mu gumesa mu bhula hi zviwutiso lezvi:
-
Hi kuya hi mavhesi lawa, zvini lezvi a makabye loyi wa cisati a nga bohako ku maha? U nga maha yini loku u hi zvin’we ni munhu loyi a livhalo lakwe li mu betelako a ku maha nchumu lowu a livhalo la wena li ku vhumelelako ku maha?
Ciyimo 2: A makabye wo kari wa cinuna wa zvi tiva a ku a Bhibhiliya a gi beteli a kun’wa byala hi ndlela yo ringanisela, kanilezvi yena i hlawula ku nganwi. Yena i rambiwa kuya festeni. Kwaseyo i wona vamakabye na vanwa byala.
Lerani Mutshawuteli 7:16 na Va Le Roma 14:1, 10, mu gumesa mu bhula hi zviwutiso lezvi:
-
Hi kuya hi mavhesi lawa, zvini lezvi a makabye loyi wa cinuna a nga bohako ku maha? U nga maha yini loku u wona a munhu mun’wani na a maha lezvi a livhalo la wena li ku betelako ku maha?
Zvini u faneleko ku maha kasi u maha zviboho zva zvinene?
1. Kombela Jehovha lezvaku a ku vhuna ku tiva co maha. — Jakobe 1:5.
2. Kambisisa lomu ka Bhibhiliya ni ka mabhuku lawa ma seketelwako ka gona kasi u kuma a matshinya ya milayo ma yelanako ni ciboho u lavako ku maha. U nga wulawula kambe ni maKristu ma buvhileko.
3. Ehleketa hi lezvi a ciboho ca wena ci to khumbisa zvona a livhalo la wena ni tivhalo ta van’wani.
A VOKARI VE: “U na ni fanelo ya ku maha ni cihi u ci lavako. A ku zvi va khumbisa kuyini van’wani, wena a wu ngheni ka zvona.”
-
Hikuyini hi faneleko ku chela kota hi kutizwa ka Nungungulu ni ka vanhu van’wani?
LEZVI HI NGA GONDZA
Kasi hi maha zviboho zva zvinene, hi fanele ku tiva lezvi Jehovha a ti zwisako zvona hi mhaka ya kona, hi tlhela hi ehleketa hi lezvi a zviboho zva hina zvi to va khumbisa zvona van’wani.
Zviwutiso zva kuvhuxeta
-
U nga zvi mahisa kuyini a zviboho zvi tsakisako Jehovha?
-
U nga li gondzisisa kuyini a livhalo la wena?
-
U nga kombisisa kuyini cichavo hi tivhalo ta van’wani?
GONDZA ZVIN’WANI
U nga mahisa kuyini a zviboho zvi to tiyisa a wunghana ga wena na Nungungulu?
“Maha a zviboho lezvi zvi dzundzako Nungungulu” (A Murindzeli wa 15 ka Abril wa 2011)
Gondza zvin’wani xungetano hi lezvi Jehovha a hi nyikisako zvona wusungukati.
Wona lezvi zvi vhunileko wanuna wo kari a ku maha ciboho co karata.
Gondza u wona lezvi hi nga mu tsakisisako zvona Jehovha loku a nga nyikangi a cileletelo co kongoma xungetano hi lezvi hi faneleko ku maha ka mhaka yo kari.
“Contlhe cikhati u lava nayo wa Bhibhiliya?” (A Murindzeli wa 1 ka Dezembro wa 2003)
