CIGONDZO 37

Zvini lezvi a Bhibhiliya gi wulako xungetano hi ntiro ni mali?

BISA

U tshuka u karateka hi kota ya ntiro ni mali ke? Zvi nga tshuka zvi hi karatela a ku khatalela a zvilaveko zva hina lezvo na hi khozela Jehovha hi ndlela yi mu ringanako. Kanilezvi a Bhibhiliya gi nyika wusungukati ga gi nene ga ku gi nga hi vhuna.

1. Zvini lezvi a Bhibhiliya gi wulako xungetano hi ntiro?

Nungungulu i lava lezvaku hi tsaka hi ntiro wa hina. A Bhibhiliya gi wula lezvaku “ci hava ca chukwana ka munhu a ku hundza ku . . . a tsaka hi ntiro wakwe”. (Mutshawuteli 2:24) Jehovha i tira hi kutikarata. A cikhati leci hi mu pimanyisako hi ku tira hi kutikarata, hi tsakisa yena hi tlhela hi tsakawo.

A ntiro wa lisima. Kanilezvi hi nga tshuki hi tsika a ntiro wuva wa lisima nguvhu a ku hundza ku khozela Jehovha. (Johani 6:27) Loku a ku khozela Jehovha wu hi wona nchumu wa lisima nguvhu wutomini ga hina, i ta hi nyika lezvi hi zvi lavako kasi hi hanya.

2. Mawonela muni yo ringanisela hi faneleko kuva nawo hi mali?

Hambu lezvi a Bhibhiliya gi vhumelako lezvaku ‘a mali ya vhikela’, ga hi tlharihisa kambe lezvaku a mali yoce a yi nge hi mahi hi tsaka. (Mutshawuteli 7:12) Hikwalaho, hi kuciwa ku nga randzi mali, kanilezvi hi ‘tsaka hi lezvi hi nga nazvo’. (Lera Mahebheru 13:5.) Loku hi simama ku tsaka hi lezvi hi nga nazvo, hi nga ta swireka hi ku pimisa ku a hi tshuki hiva ni zvo enela kasi hi hanya, ne hi nga ta ti vangela mangava na zvi nga laveki. (Mavingu 22:7) Ahandle ka lezvo, hi ta potsa a ku wela mhangweni ya ku maha tibheja ni ku maha zvilo hi pimisako ku zvi ta hi maha hi ganya hi kuhatlisa.

3. Hi nga yi tirisisa kuyini a mali ya hina kasi ku vhuna van’wani?

Jehovha i Nungungulu wo hana. Hi nga mu pimanyisa hi ku ‘hana ni ku tshama na hi longile a ku avela van’wani lezvi hi nga nazvo’. (1 Timote 6:18) Hi nga tirisa mali ya hina hi ndlela yinene hi ku seketela bandla ni ku vhunetela lava va kiyelelwako hi zvokari, nguvhunguvhu a makholwa-kulori. A ca lisima ka Jehovha a hi ku tala ka lezvi hi nyikelako kanilezvi hi leci ci hi mahako hi nyika. Loku hi hana na zvi sukela mbilwini zvi ta hi nyika litsako hi tlhela hi tsakisa Jehovha. — Lera Mitiro 20:35.

GONDZA ZVI ETA

Wona mabhindzu ya kuva ni mawonela manene xungetano hi ntiro ni ku xalala hi lezvi hi nga nazvo.

4. Dzundza Jehovha hi matirela ya wena

A wunghana ga hina na Jehovha gi fanele ku khumba a mawonela ya hina xungetano hi ntiro. Bisani VHIDHIO, mu gumesa mu bhula hi zviwutiso zvi landzelako.

VHIDHIO: Tirela Jehovha hi muhefemulo wa wena wontlhe (4:39)

Cini ci nga ku hlamalisa ka vhidhio leyi xungetano hi mawonela ya Jasoni ni mahanyela yakwe laha ntirweni wakwe?
Zvini a nga maha kasi a veka ntiro wutshan’wini ga wona?

Lerani Va Le Kolosi 3:23, 24, mu gumesa mu bhula hi ciwutiso leci:

Hikuyini hi faneleko kuva ni mawonela ma nene xungetano hi ntiro?

A ntiro wa lisima. Kanilezvi a hi faneli ku tshuka hi tsika ntiro wuva wa lisima a ku hundza ku khozela Jehovha

5. A ku eneliswa hi lezvi hi nga nazvo zva hi vhuna

A vanhu vo tala va zama ku hlengeletela mali hi laha va zvi kotako hi kona. Kanilezvi a Bhibhiliya gi hi kuca ku maha zvilo zvo hambana ni lezvo. Lerani 1 Timote 6:6-8, mu gumesa mu bhula hi ciwutiso leci:

Zvini lezvi a Bhibhiliya gi hi kucako ku maha?

Hambu loku hi hi ni zvilo zvitsongwani nguvhu hi nga tsaka. Bisani VHIDHIO, mu gumesa mu bhula hi ciwutiso ci landzelako.

VHIDHIO: ‘Eneliswani hi lezvi mu nga nazvo’ (3:20)

Zvini zvi vhunako a mingango leyi a kuva ni litsako hambu lezvi yi nga ni mali yitsongwani?

Ahati loku hi hi ni zvotala kanilezvi hi simama ku lava zvin’wani? Jesu i hlawutele mufananiso wu kombako a mhango ya ku maha lezvo. Lerani Luka 12:15-21, mu gumesa mu bhula hi ciwutiso leci:

Zvini u nga gondza ka mufananiso wa Jesu? — Wona vhesi 15.

Lerani mu gumesa mu ringanisa a mavhesi lawa: Mavingu 10:22 na 1 Timote 6:10. Andzhako ka lezvo, bhulani hi zviwutiso lezvi:

U alakanya ku hi zvihi zvi nga zva lisima? Kuva munghana wa Jehovha kutani kuva ni mali yo tala? Hikuyini?
Zvikarato muni zvi nga humelelako loku a munhu a hlota nguvhu mali?

6. Jehovha i ta hi nyika lezvi zvi lavekako

A ku vhumala ntiro ni ku vhumala mali zvi nga ringa a kukholwa ka hina ka Jehovha. Bisani VHIDHIO kasi mu wona lezvi hi nga lwisanisako zvona ni ciringo leco ca kukholwa, mu gumesa mu bhula hi zviwutiso zvi landzelako.

VHIDHIO: Jehovha i ta hi nyika lezvi zvi lavekako (6:21)

Zvikarato muni lezvi a makabye loyi hi nga mu wona lomu ka vhidhio a nga kumana nazvo?
Zvini a nga maha kasi a hlula zvikarato lezvo?

Lerani Matewu 6:25-34, mu gumesa mu bhula hi ciwutiso leci:

Zvini lezvi Jehovha a tsumbisako ku mahela lava va mu rangisako?

A VOKARI VE: “Ndzi fanele ku tira hi kutikarata kasi ndzi hlayisa ngango wa mina. A ndzi nge zvi koti kuya mitlhanganweni ya bandla vhiki ni vhiki.”

Mutsalo muni wu ku kholwisako lezvaku a ku rangisa ku khozela Jehovha hi cona ciboho ca cinene ka zvontlhe?

LEZVI HI NGA GONDZA

A ntiro ni mali zva laveka, kanilezvi a zvi faneli ku hi colopetela ku tirela Jehovha.

Zviwutiso zva kuvhuxeta

Cini ci nga ku vhunako a kuva ni mawonela yo ringanisela xungetano hi ntiro?
A ku xalala hi lezvi u nga nazvo zvi ku vhunisa kuyini?
U nga zvi kombisa kuyini lezvaku wa zvi kholwa lezvi Jehovha a zvi tsumbisako zva ku i ta hlayisa vanhu vakwe?

Ndzi mbhetile a cigondzo leci hi dhiya:

Zama ku maha lezvi

Hlola u wona ku ka tihweti ti nga hundza ku ngava lezvaku u lovhile mitlhangano yo landzelana hi kota ya ntiro ke. Loku ku hi ku u lovhile, zama ku wona ku zvini u nga mahako kasi u chukwatisa.

Zvin’wani:

Your other goal