CIGONDZO 38
Ci nyike lisima a cinyikiwo ca wutomi
Ku na ni zvilo zvo tala zvo tsakisa lezvi hi nga ti buzako hi zvona hi kota ya lezvi hi hanyako. Hambu loku hi kumana ni zvikarato, ku na ni zvilo zvo kari hi nga ti buzako hi zvona. Hi nga kombisa kuyini lezvaku ha ci nyika lisima a cinyikiwo ca wutomi? Kona hi cihi a cigelo ca lisima ca kuva hi maha lezvo?
1. Hikuyini hi faneleko ku gi nyika lisima a wutomi?
Hi fanele ku gi nyika lisima a wutomi hakuva cinyikiwo ci tako hi ka Jehovha, a Papayi wa hina wa lirandzo. Hi yena “cibuka ca wutomi” — a nga vanga zvilo zvontlhe zvi hanyako. (Lisimu 36:9) “Hi yena a nyikako wutomi ka vanhu vontlhe ni kuhefemula ni zvilo zvontlhe.” (Mitiro 17:25, 28) Jehovha i hi nyika lezvi hi zvi lavako kasi hi simama ku hanya. Kanilezvi a nga nyimi laho. I tlhela a hi nyika lezvi zvi lavekako kasi hi ti buza hi wutomi. — Lera Mitiro 14:17.
2. Hi nga mu kombisa kuyini Jehovha lezvaku ha ci nyika lisima a cinyikiwo ca wutomi?
Kusukela ka cikhati leci a mamani wa wena a nga xura nyimba ya wena, Jehovha i no sangula ku ku khatalela. Dhavhidha, a mun’we wa vakhozeli va Nungungulu, i byelile Jehovha, aku: “A matihlo ya wena ma ndzi wonile na ndza ha sangula ku wumbiwa.” (Lisimu 139:16) Jehovha wa gi nyika nguvhu lisima a wutomi ga wena. (Lera Matewu 10:29-31.) Zva mu bayisa nguvhu loku a wokari a ku halahala a daya mun’wani kutani ku ti daya. a (Eksodhusi 20:13) Jehovha wa bayiseka kambe loku hi maha zvilo zvi nga lavekiko lezvi zvi vekako wutomi ga hina mhangweni kutani loku hi nga mahi cokari kasi ku vhikela wutomi ga van’wani. Laha hi vhikelako a wutomi ga hina hi tlhela hi kombisa cichavo hi wutomi ga van’wani hi komba lezvaku ha ci nyika lisima a cinyikiwo co hlawuleka ca wutomi.
GONDZA ZVI ETA
Wona tindlela to kari u nga kombisako hi tona ku wa ci nyika lisima a cinyikiwo ca wutomi.
3. Khatalela a lihanyo la wena
Kota lezvi hi tsumbisileko Jehovha a ku contlhe cikhati hi ta maha lezvi a zvi lavako, hi tirisa wutomi ga hina gontlhe kasi ku mu tirela. Lezvo zvi fana ni ku nyikela mimiri ya hina kota muphahlo ka Nungungulu. Lerani Va Le Roma 12:1, 2, mu gumesa mu bhula hi zviwutiso lezvi:
-
Cini ci faneleko ku ku kuca ku khatalela a lihanyo la wena?
-
Hi tihi a tindlela to kari ta ku maha lezvo?
4. U nga veki wutomi ga wena ni ga van’wani mhangweni
A Bhibhiliya gi hi kuca a ku potsa zvilo zvi nga ni mhango. Bisani VHIDHIO kasi u wona zvokari u nga mahako kasi ku ti vhikela.
Lerani Mavingu 22:3, mu gumesa mu bhula hi lezvi wena ni van’wani mu nga mahako kasi mu ti vhikela . . .
-
laha kaya.
-
le ntirweni.
-
loku u kari u hlakana.
-
loku u fambisa movha kutani loku u khiletiwile.
5. Kombisa cichavo hi wutomi ga n’wanana a kalako a nga se pswaliwa
Dhavhidha i tlhamusele lezvaku Jehovha wa khatala hi zvontlhe zvi humelelako a cikhati leci a n’wanana a kulako lomu khwirini ga mamani wakwe. Lerani Lisimu 139:13-17, mu gumesa mu bhula hi ciwutiso leci:
-
Hi kuya hi mawonela ya Jehovha, xana a wutomi ga munhu gi sangula a cikhati leci a mamani a xurako nyimba kutani a cikhati leci a munhu a pswaliwako?
A milayo leyi Jehovha a nga nyikile a vaIzrayeli cikhatini ci hundzileko, yi wa vhikela a vamamani ni vanana va kalako va nga se pswaliwa. Lerani Eksodhusi 21:22, 23, mu gumesa mu bhula hi zviwutiso lezvi:
-
Jehovha i wa mu wonisa kuyini a munhu loyi a nga phazama a daya n’wanana wo kala a nga se pswaliwa?
-
Jehovha i ti zwisa kuyini loku a munhu a daya n’wanana wo kala a nga se pswaliwa ha womu? b
-
U ma wonisa kuyini a mawonela ya Jehovha hi mhaka leyi?
Hambu a wasati loyi a gi nyikako lisima a wutomi a nga tshuka a alakanya ku a nga na ndlela yin’wani loku ku nga hi ku bhoxa nyimba. Lerani Isaya 41:10, mu gumesa mu bhula hi zviwutiso lezvi:
-
Loku a wasati a kurumetiwa ku bhoxa nyimba, i fanele ku kombela civhuno ka mani? Hikuyini?
A VOKARI VE: “A wasati hi yena a nga ni fanelo ya ku hlawula ku bhoxa kutani ku nga bhoxi nyimba, hakuva i miri wakwe.”
-
Cini ci ku kholwisako ku Jehovha wa gi nyika lisima a wutomi ga mamani ni ga n’wanana a kalako a nga se pswaliwa?
LEZVI HI NGA GONDZA
A Bhibhiliya gi hi gondzisa ku randza, ku kombisa cichavo, ni ku vhikela a wutomi, ku nga cinyikiwo leci Jehovha a hi nyikileko. Lezvo zvi patsa a wutomi ga hina ni ga van’wani.
Zviwutiso zva kuvhuxeta
-
Hikuyini a wutomi ga vanhu gi nga ga lisima ka Jehovha?
-
Jehovha i ti zwisa kuyini loku a wokari a daya munhu ha womu?
-
Hikuyini u ci nyikako lisima a cinyikiwo ca wutomi?
GONDZA ZVIN’WANI
Hi nga mu bongisa kuyini Jehovha hi kota ya cinyikiwo ca wutomi?
Kuma hlamulo ya ciwutiso leci ci nge: Xana Jehovha a nga mu tsetselela a wasati loyi a bhoxileko nyimba?
“A Bhibhiliya gi yini xungetano hi ku bhoxa nyimba?” (Ndzima yi nga ka jw.org)
Gondza u tiva lezvi a mawonela ya Nungungulu xungetano hi wutomi ma faneleko ku khumbisa zvona lezvi hi hlawulako ku hlakana hi zvona.
Wona lezvi a Bhibhiliya gi nga mu vhunisako zvona munhu loku a alakanya ku ti sunga.
a Jehovha wa khatala nguvhu hi lava va pandzekileko timbilu. (Lisimu 34:18) Wa ku zwisisa a kubayisa loku va ku zwako loku ku nga va mahako va lava ku ti sunga, niku wa zvi lava ku va vhuna. Kasi ku wona lezvi Jehovha a mu vhunisako zvona munhu a ku hlula a maalakanyo ya ku lava ku ti sunga, lera a ndzima yi nge: “Ndzi lava kufa — Xana a Bhibhiliya gi nga ndzi vhuna loku ndzi hi ni maalakanyo ya ku lava ku ti daya?” yi nga ka cipandze Gondza zvin’wani ka cigondzo leci.
b A vavasati lava va tshukileko va bhoxa nyimba a va faneli ku tizwa nandzu wa hombe — Jehovha a nga va tsetselela. Kasi ku tiva zvin’wani xungetano hi mhaka leyi, wona a ndzima yi nge: “A Bhibhiliya gi yini xungetano hi ku bhoxa nyimba?” yi nga ka cipandze Gondza zvin’wani ka cigondzo leci.
