CIGONDZO 39
Nungungulu i wu wonisa kuyini nkhata
A nkhata wa lisima nguvhu. Loku hi wa nga hi nawo i hava a nga wa ta hanya. Kota lezvi a nga Muvangi, Nungungulu i na ni fanelo ya ku wula lezvi a nkhata wu faneleko ku tirisiswa zvona. Zvini lezvi a wulako xungetano hi nkhata? Xana hi ngaga nkhata kutani ku wu tirisa kasi ku tiriwa mababyi? U nga zvi mahisa kuyini zviboho zva zvinene xungetano hi mhaka leyi?
1. Hi wahi mawonela ya Jehovha xungetano hi nkhata?
Jehovha i byelile vakhozeli vakwe, cikhatini ca kutsaliwa ka Bhibhiliya, aku: “A wutomi ga zvontlhe zvivangwa i nkhata wa kona.” (Levhi 17:14) Ka Jehovha, a nkhata wu yimela wutomi. Hikwalaho, kota lezvi a wutomi gi nga cinyikiwo ca Nungungulu ci basileko, a nkhata wonawu wu basile.
2. Matirisela muni ya nkhata lawa Nungungulu a betelako?
Jehovha i rangile a byela vakhozeli vakwe lezvaku va ngagi nkhata, a bandla ga wuKristu na gi nga se wumbiwa. (Lera Genesisi 9:4 na Levhi 17:10.) Andzhako ka kuva a bandla ga wuKristu gi wumbilwe, Jehovha i tlhelile a phinda a cileletelo leci ka maKristu. A hubye yi fumako yi nyikile a cileletelo ca lezvaku va “simama ku tsika . . . nkhata”. — Lera Mitiro 15:28, 29.
Zvi wula yini ku tsika nkhata? Loku a dhokodhela i wo ku byela ku u tsika byala, u wa nga ta ginwa. Kanilezvi, a ku u wa taga zvakuga zvi nga ni byala kutani u wa ta vhumela ku va ku chela hi lomu ka misiha ke? Kunene u wa nga ta vhumela! Hi kufanana, a cileletelo ca Jehovha ca ku hi tsika nkhata ci wula ku a hi faneli kunwa nkhata kutani kuga nyama ya ku kala ku xinjiwa kutani ku halatiwa nkhata. Ne a hi faneli kuga zvakuga zvi chelilweko nkhata.
Ahati a matirelwa ya mababyi lawa ma patsako ku tirisiwa ka nkhata ke? A matirela yo kari ya mababyi zva dlunyateka ku malwa ni milayo ya Nungungulu. Lezvo zvi patsa ku cheliwa nkhata ha woce kutani zvipandze-tshinya zva wona, ku nga maglobhulo yo pswhuka, maglobhulo yo basa, maplaketa ni plasma. Ka zviyimo zvo kari, a zvi dlunyateki ku a matirela yo kari ya mababyi ma lwisana ni milayo ya Nungungulu kutani ahihi. Hi cikombiso, ka matirela yo kari ya mababyi ku tirisiwa a zvipandzana zva zvitsongwani zva nkhata zvi susilweko ka zvipandze-tshinya zva nkhata. A man’wani matirela ma patsa ku tirisiwa ka nkhata wa mubabyi. A munhu ni munhu i fanele ku hlola a mawonela lawa a ti mahela ciboho ca yena n’winyi. a — Va Le Galatiya 6:5.
GONDZA ZVI ETA
Wona lezvi u nga mahisako zvona zviboho zva matirelwa ya mababyi ma patsako ku tirisiwa ka nkhata lawa u to ma vhumela.
3. Hlawula matirelwa ya mababyi lawa ma tsakisako Jehovha
U nga mahisa kuyini zviboho zva matirelwa ya mababyi zvi yelanako ni lezvi Nungungulu a wu wonisako zvona nkhata? Bisani VHIDHIO, mu gumesa mu bhula hi lisima la ku maha lezvi zvi landzelako.
-
Khongela u kombela wutlhari. — Jakobe 1:5.
-
Lavetela a matshinya ya milayo ya Bhibhiliya u wona lezvi u nga ma tirisisako zvona. — Mavingu 13:16.
-
Hlola ku matirela muni ma nga kona lomu u hanyako kona.
-
Wona ku matirelwa muni lawa u to kala ku tshuka u ma vhumela.
-
Tiyiseka ku a ciboho ca wena ci ta ku siya na u hi ni livhalo li basileko. — Mitiro 24:16. b
-
Tiva ku a ku na munhu, kani i sati kutani nuna, kutani dhota, kutani mugondzisi wa wena wa Bhibhiliya, a faneleko ku ku byela lezvi u faneleko ku maha ka timhaka ti yelanako ni livhalo. — Va Le Roma 14:12.
-
Tsala ciboho ca wena kasi a van’wani va ci tiva.
4. A Vakustumunyu va Jehovha va hlota matirelwa ya manene ya mababyi
Zva koteka a ku ingisa a nayo wa Nungungulu hi tlhela hi kuma a matirelwa ya manene nguvhu ma nga patsiko nkhata. Bisani VHIDHIO.
Lerani Titusi 3:2, mu gumesa mu bhula hi ciwutiso leci:
-
Hikuyini hi faneleko ku kombisa cichavo hi tlhela hi rula a cikhati leci hi wulawulako ni vadhokodhela?
|
A maKristu a ma vhumeli |
A muKristu i ta ti mahela ciboho ha yece |
|---|---|
|
A. Plasma |
Zvipandzana zva plasma |
|
B. Maglobhulo yo basa |
Zvipandzana zva maglobhulo yo basa |
|
C. Maplaketa |
Zvipandzana zva maplaketa |
|
D. Maglobhulo yo pswhuka |
Zvipandzana zva maglobhulo yo pswhuka |
5. Loku ku patseka zvipandzana zva nkhata
A nkhata wu na ni mune wa zvipandze-tshinya, ku nga maglobhulo yo pswhuka, maglobhulo yo basa, maplaketa ni plasma. A zvipandze lezvi zva mune zvi wumbiwa hi zvipandzana zvo tala zva zvitsongwani zvi vitaniwako ku zvipandzana zva nkhata. c A zvipandzana zvo kari zva tirisiwa ka mimuri ya ku tira mababyi kutani kasi ku tsema ku huma nkhata.
Makunu xungetano hi zvipandzana zva nkhata, a muKristu mun’we ni mun’wani i fanele ku maha ciboho cakwe ci seketelwako ka livhalo lakwe li gondzisilweko hi Bhibhiliya. Kuzvilava a vokari va nga boha ku ala a matirelwa ya mababyi ma patsako ku tirisiwa ka zvipandzana zva nkhata. Kanilezvi, a livhalo la van’wani li nga va vhumelela a ku tirisa a zvipandzana lezvo.
Laha u mahako a zviboho zva wena, ti wutise lezvi:
-
Ndzi nga mu tlhamuselisa kuyini a dhokodhela a ku hikuyini ndzi alako kutani ndzi vhumelako a matirelwa ma patsako ku tirisiwa ka zvipandzana zva nkhata?
A VOKARI VE: “A ndzi zvi zwisisi a ku hikuyini zvi nga biha a ku cheliwa nkhata, hakuva zva ponisa wutomi.”
-
U wa ta mu hlamula yini?
LEZVI HI NGA GONDZA
Jehovha i lava ku hi wona nkhata na wu hi wa lisima.
Zviwutiso zva kuvhuxeta
-
Hikuyini Jehovha a wonako nkhata kota nchumu wu basileko?
-
Hi zvi tivisa kuyini lezvaku a cileletelo ca Nungungulu ca ku hi tsika nkhata ci patsa ni ku chela nkhata?
-
U nga zvi mahisa kuyini zviboho zva zvinene xungetano hi matirelwa ya mababyi?
GONDZA ZVIN’WANI
Zvini lezvi u fanele ku ehleketa hi zvona na u nga se boha ku wa vhumela a matirelwa ma patsako ku tirisiwa ka nkhata wa wena n’winyi kutani a wu vhumeli?
“Zviwutiso zva vagondzi” (A Murindzeli wa 15 ka Outubro wa 2000)
Zvini lezvi u fanele ku ehleketa hi zvona laha u bohako ku u ta vhumela a zvipandzana zva nkhata?
“Zviwutiso zva vagondzi” (A Murindzeli wa 15 ka Junho wa 2004)
Cini ci nga kholwisa a dhokodhela wo kari lezvaku a mawonela ya Nungungulu xungetano hi nkhata ma zwala?
“Ndzi no vhumela a mawonela ya Nungungulu xungetano hi nkhata” (Khindlimuka! 8 ka Dezembro wa 2003)
Wona lezvi a madhota ma tirako ka Kometi ya ku wulawulisana ni zvipitali ma va vhunisako zvona a vamakabye.
a Wona cigondzo 35, ci nge: “Hi nga zvi mahisa kuyini a zviboho zva zvinene?”
b Wona laha ka ponto 5, ku nge: “Loku ku patseka zvipandzana zva nkhata,” ni tlhamuselo wa wu 3, wu nge: “Matirela ya mababyi ma patsako kutirisiwa ka nkhata.”
c A vadhokodhela vo kari va wona a mune wa zvipandze-tshinya zva nkhata kota zvipandzana zva zvitsongwani zva nkhata. Hikwalaho, u fanele ku tiyiseka lezvaku a dhokodhela wa wena wa zvi zwisisa ku wena a wu vhumeli ku cheliwa nkhata ha woce kutani maglobhulo yo pswhuka, maglobhulo yo basa, maplaketa ni plasma.
