Hi nga alakanyela mamani wa lirandzo a longiselako n’wanana wakwe kasi aya cikoleni. I mu hlambisa a basa, a mu boha tinguwo to basa ni to saseka. Lezvo zvi maha ku a n’wanana loye a hanya khwatsi zvi tlhela zvi maha ku a van’wani va zvi wona ku a vapswali vakwe va khatala hi yena. Hi ndlela yo fana, a Papayi wa hina wa lirandzo, Jehovha, i lava ku hi basa — hi tlhelo ga nyama ni ga mahanyela, ku nga ndlela leyi hi pimisako hi yona, hi wulawulako hi yona ni lezvi hi mahisako zvona zvilo. Loku hi basa, ku vhuneka hina hi tlhela hi nyika wudzundzo Jehovha.

1. Hi nga basisa kuyini hi tlhelo ga nyama?

Jehovha i hi byela lezvi: “Basani.” (1 Pedro 1:16) Kasi hi wuliwa vobasa, hi fanele ku basa hi tlhelo ga nyama ni ga mahanyela. Hi nga basa hi tlhelo ga nyama loku hi hlamba hi kukhandzakanya, hi hlazva tinguwo ta hina, hi basisa mimiti ya hina ni mimovha ya hina, hi tlhela hi veketela khwatsi a zvilo zva hina. Hi nga vhunetela kambe kubasiseni ka Salawu ya hina ya Mufumo. Loku hi tshama hi basile hi tlhelo ga nyama, hi dzundza Jehovha. — 2 Va Le Korinte 6:3, 4.

2. Mahanyela muni hi faneleko ku ma potsa kasi hiva vobasa?

A Bhibhiliya ga hi kuca, giku: “Ti hlazveni kunyenyezeni kontlhe ka nyama ni ka moya”. (2 Va Le Korinte 7:1) Lezvo zvi wula ku hi fanele ku ti karatela ku potsa ni wihi nchumu wu nga wa ta chakisa miri wa hina ni maalakanyo ya hina. A maalakanyo ya hina ma fanele ku tsakisa Jehovha, hikwalaho, hi maha zvontlhe hi zvi kotako kasi hi ngavi ni maalakanyo ya hava. (Lisimu 104:34) Ahandle ka lezvo, hi ti karatela ku potsa mawulawulela yo nyenyeza. — Lera Va Le Kolosi 3:8.

Zvini zvin’wani zvi nga hi chakisako hi tlhelo ga nyama ni ga mahanyela? Ku na ni zvilo zvo kari zvi nga chakisako a miri wa hina. Hikwalaho, a hi dzahi fole ni mbangi kutani man’wani madroga. Kota lezvi hi potsako a zvilo lezvi, hi simama kuva ni lihanyo linene hi tlhela hi kombisa cichavo hi cinyikiwo ca wutomi. Hi ti karatela ku tshama hi basile hi tlhelo ga mahanyela kambe hi ku potsa ku maha zvilo zvo kala kuhlazveka zvo kota ku hlakanisela zviro zva wubeleki kasi ku ti tsakisa hi tlhelo ga masango (masturbação) ni ku wona zvithombe zva masango (pornografia). (Lisimu 119:37; Va Le Efesusi 5:5) Zvi nga tshuka zvi karata a ku tsika ku maha zvilo lezvo, kanilezvi Jehovha a nga hi vhuna. — Lera Isaya 41:13.

 GONDZA ZVI ETA

3. A ku tshama hi basile hi tlhelo ga nyama zvi dzundza Jehovha

Laha hi gondzako a milayo leyi Jehovha a nga nyikile tiko ga Izrayeli, hi pola ku Jehovha i lava ku a vanhu vakwe va tshama va basile. Lerani Eksodhusi 19:10 ni 30:17-19, mu gumesa mu bhula hi zviwutiso lezvi:

• Zvini lezvi a mavhesi lawa ma hi byelako xungetano hi lezvi Jehovha a ku wonisako zvona a kubasa ka nyama?

• Zvini u nga mahako kasi u tshama na u basile?

Kasi hi tshama hi basile hi tlhelo ga nyama zvi lava cikhati ni kutikarata. Kanilezvi, hi nga zvi kota ku maha lezvo kani hi hanya kwihi, kani hi ganyile kutani hi zvisiwana. Bisani VHIDHIO, mu gumesa mu bhula hi ciwutiso ci landzelako.

• Hikuyini a vanhu lava hi va chumayelako va to mu kombisa nguvhu cichavo Jehovha loku a zvilo zva hina zvi basile?

4. Tsika mikhuwo yo biha

Loku ku hi ku wa dzaha kutani wa tirisa madroga, wa zvi tiva a ku zvi karatisa kuyini a ku tsika zvilo lezvo. Cini ci nga ku vhunako? Ehleketa hi lezvi a mukhuwo lowo wu ku khumbisako zvona. Lerani Matewu 22:37-39, mu gumesa mu bhula hi lezvi a fole ni madroga ma khumbisako zvona . . .

• a wunghana ga munhu na Jehovha.

• a ngango wa munhu loye ni van’wani va laha kusuhani.

Boha ku zvini u to maha kasi u hlula a mukhuwo lowo wo biha. a Bisani VHIDHIO.

Lerani Va Le Filipi 4:13, mu gumesa mu bhula hi ciwutiso leci:

• A ku khongela hi kukhandzakanya, ni ku gondza Bhibhiliya, ni kuva kona mitlhanganweni zvi nga mu vhunisa kuyini munhu a ku hlula mukhuwo wo biha?

 5. Hlula a maalakanyo ni mikhuwo yo biha

Lerani Va Le Kolosi 3:5, mu gumesa mu bhula hi zviwutiso lezvi:

• Hi zvi tivisa kuyini lezvaku a pornografia, ni sexting, ni masturbação a zvi basangi mahlweni ka Jehovha?

• U alakanya ku zva koteka a ku hiva ni mahanyela ma hlazvekileko kota lezvi Jehovha a zvi lavako? Hikuyini?

Wona ku u nga ma hlulisa kuyini a maalakanyo yo kala kuhlazveka. Bisani VHIDHIO.

Jesu i tirisile mufananiso wu kombako ku hi fanele ku ti yimisela ku maha zvontlhe zvi lavekako kasi hi tshama hi basile hi tlhelo ga mahanyela. Lerani Matewu 5:29, 30, mu gumesa mu bhula hi ciwutiso leci:

• Jesu i wa nga wuli lezvaku hi fanele ku ti bayisa zva civiri, kanilezvi i wo komba ku hi fanele ku maha cokari. Zvilo muni a nga mahako munhu, kasi ku potsa a maalakanyo yo kala kuhlazveka? b

Loku u kari ulwa kasi ku hlula maalakanyo yo kala kuhlazveka, Jehovha wa ku nyika lisima a kutikarata ka wena. Lerani Lisimu 103:13, 14, mu gumesa mu bhula hi ciwutiso leci:

• Loku zvi ku karatela a ku hlula mukhuwo wo kala kuhlazveka, a mutsalo lowu wu ku vhunisa kuyini a ku u nga tsiki kulwa?

 LEZVI HI NGA GONDZA

Hi tsakisa Jehovha loku hi tshama hi basile hi tlhelo ga nyama, ni ga maalakanyo, ni ga mahanyela.

Zviwutiso zva kuvhuxeta

• Hikuyini zvi nga zva lisima a ku tshama hi basile?

• U nga maha yini kasi u tshama u basile hi tlhelo ga nyama?

• U nga maha yini kasi a maalakanyo ya wena ni mahanyela ya wena ma simama ma basile?