CIGONDZO 43
A maKristu ma fanele ku gi wonisa kuyini byala?
Misaveni yontlhe, a vanhu va na ni mawonela yo hambanahambana xungetano hi byala. A vokari va zvi randza kunwa loku va hi zvin’we ni vanghana vabye. A van’wani va hlawula ku nganwi ne ni kutsongwani. Kanilezvi a van’wani vanwa kala va popiwa. Makunu zvini lezvi a Bhibhiliya gi wulako xungetano hi byala?
1. Xana zvi bihile a kunwa byala?
A Bhibhiliya a gi beteli a kunwa byala. A kuhambana ni lezvo, gi wula lezvaku “a vhinyo leyi yi tsakisako a mbilu ya munhu” yi maha cipandze ca zvilo zvo tala zva zvinene lezvi Nungungulu a hi nyikileko. (Lisimu 104:14, 15) A vavanuna ni vavasati vo kari vo tsumbeka va kumbukiwako lomu ka Bhibhiliya va wanwa byala. — 1 Timote 5:23.
2. Wusungukati muni legi a Bhibhiliya gi nyikako lava va hlawulako kunwa?
Jehovha wa betela a kunwa nguvhu ni wudhakwa. (Va Le Galatiya 5:21) A Bhibhiliya gi ngalo: “U nga ti tlhanganisi ni lava va nwako nguvhu vhinyo.” (Mavingu 23:20) Hikwalaho, loku hi boha kunwa, hi fanele kunwa hi kuringanisela hambu loku hi hi hoce. Hakuva a kunwa nguvhu zvi nga maha lezvaku a munhu a nga pimisi khwatsi, a nga zvi koti ku wonelela a magezu yakwe ni zvimaho zvakwe niku zvi nga veka wutomi gakwe mhangweni. Loku hi nga zvi koti a kunwa hi ndlela yo ringanisela, zvi ngava zvi nene a ku tsika kunwa.
3. Hi nga kombisisa kuyini cichavo hi zviboho zva van’wani xungetano hi byala?
A mun’we ni mun’wani i fanele ku ti mahela ciboho ha yece ca ku i tanwa byala kutani a nga tanwa. A hi faneli ku lamula lava va hlawulako a kunwa hi ndlela yo ringanisela, ne ku kurumeta van’wani lezvaku vanwa na va nga zvi lavi. (Va Le Roma 14:10) Hi hlawula ku nganwi loku lezvo zvi khunguvanyisa van’wani. (Lera Va Le Roma 14:21.) Hi lava ‘lezvi zvi to vhuna mun’wani munhu, na ku nga hi lezvi zvi to vhuna hina basi’. — Lera 1 Va Le Korinte 10:23, 24.
GONDZA ZVI ETA
Wona matshinya ya milayo ya Bhibhiliya ma to ku vhuna ku maha ciboho ca ku u tanwa kutani u nga tanwa. Wona kambe lezvi u nga mahako loku zvi ku karatela ku tsika kunwa nguvhu.
4. Ti mahele ciboho ca ku u tanwa kutani u nga tanwa
Jesu i wa gi wonisa kuyini a byala? A ku ehleketa hi cihlamaliso cakwe co sangula, zvi nga hi vhuna ku tiva hlamulo. Lerani Johani 2:1-11, mu gumesa mu bhula hi zviwutiso lezvi:
-
A cihlamaliso leci ci hi vhunisa kuyini a ku wona lezvi Jesu a gi wonisako zvona byala ni lezvi a va wonisako zvona lava va hlawulako kunwa?
-
Kota lezvi Jesu a nga kala ku wula ku zvi bihile kunwa byala, a maKristu ma fanele ku va wonisa kuyini lava va bohako kunwa?
Hambulezvo, a kuva a muKristu a tlhatlhekile kunwa byala a zvi wuli ku contlhe cikhati zvi nene a kunwa. Lerani Mavingu 22:3, mu gumesa mu bhula hi lezvi a timhaka leti ti landzelako ti nga ci khumbisako zvona a ciboho ca wena ca ku u tanwa kutani ahihi loku ku hi ku:
-
U ta fambisa movha kutani ku tira hi muchini.
-
U na ni nyimba.
-
A dhokodhela i ku byelile lezvaku u nganwi byala.
-
A wu zvi koti kunwa u pima.
-
A nayo wa lomu u hanyako kona wa betela kunwa byala.
-
U na ni wokari a bohileko ku nganwi hi kota ya lezvi cikhatini ci hundzileko zvi nga mu karatela a kunwa hi kuringanisela.
Xana u fanele ku veka byala ka mubuzo wa muchadho kutani ka zvimaho zvin’wani? Kasi ku wona lezvi zvi nga ku vhunako ku maha ciboho, bisani VHIDHIO.
Lerani Va Le Roma 13:13 na 1 Va Le Korinte 10:31, 32. Andzhako ka ku lera mutsalo wun’we ni wun’wani, bhulani hi ciwutiso leci:
-
A ku tirisa a tshinya legi ga nayo zvi nga ku vhunisa kuyini a ku maha ciboho ci to tsakisa Jehovha?
A muKristu mun’we ni mun’wani i fanele ku ti mahela ciboho ha yece ca ku i tanwa byala kutani a nga tanwa. Hambu loku ku hi ku ka zvikhati zvo kari wanwa byala, ka zvin’wani zvikhati a nga boha ku nganwi
5. Boha ku u tanwa mpimo muni
Loku u maha ciboho ca kunwa byala, alakanya lezvi: Jehovha a nga beteli a kunwa byala kanilezvi i betela a kunwa nguvhu. Hikuyini? Lerani Hoseya 4:11, 18, mu gumesa mu bhula hi ciwutiso leci:
-
Zvini zvi nga humelelako loku a munhu anwa nguvhu byala?
Cini ci nga hi vhunako a ku nganwi nguvhu byala? Hi fanele ku ringanisela kutani ku tiva a lipimo la hina. Lerani Mavingu 11:2, mu gumesa mu bhula hi ciwutiso leci:
-
Hikuyini zvi nga zvi nene a ku ti gemela mpimo wa byala legi hi tonwa?
6. Civhuno ka loyi a nwako nguvhu
Wona lezvi zvi vhunileko a wanuna wo kari a ku nyima kunwa nguvhu byala. Bisani VHIDHIO, mu gumesa mu bhula hi zviwutiso zvi landzelako.
-
Zvini lezvi Dmitry a nga kari maha loku a nwile byala?
-
Xana i tekele ku zvi kota ku tsika kunwa byala ka khati go sangula?
-
I zvi kotisile ku yini ku tsika kunwa nguvhu byala?
Lerani 1 Va Le Korinte 6:10, 11, mu gumesa mu bhula hi zviwutiso lezvi:
-
Xana a kunwa byala zvi na ni mhango ya ku kota kwihi?
-
Zvini zvi kombako lezvaku a munhu wa kunwa nguvhu byala a nga cica?
Lerani Matewu 5:30, mu gumesa mu bhula hi ciwutiso leci:
-
A cikhati leci Jesu a nga tirisa a mufananiso wa ku ti tsema canja, i wa lava ku wula lezvaku zvi nga lava ku hi ti tsona zvokari kasi ku tsakisa Jehovha. Zvini u nga mahako loku zvi ku karatela ku tsika kunwa nguvhu byala? a
Lerani 1 Va Le Korinte 15:33, mu gumesa mu bhula hi ciwutiso leci:
-
Loku u hi ni vanghana va nwako nguvhu byala, zvi nga ku khumbisa kuyini?
A WOKARI A NGA HA WUTISA KU: “Zvi bihile a kunwa byala ke?”
-
U wa ta mu hlamulisa kuyini?
LEZVI HI NGA GONDZA
Jehovha i hi nyikile byala kasi hi ti buza hi gona, kanilezvi wa betela a kunwa nguvhu byala ni wudhakwa.
Zviwutiso zva kuvhuxeta
-
Zvini lezvi a Bhibhiliya gi wulako xungetano hi byala?
-
Hi tihi a timhango ta kunwa nguvhu byala?
-
Hi nga kombisisa kuyini cichavo hi zviboho lezvi a van’wani va mahako xungetano hi byala?
GONDZA ZVIN’WANI
A vaswa va nga zvi mahisa kuyini zviboho zva zvi nene xungetano hi byala?
Wona lezvi u nga mahako kasi u zvi kota ku tsika kunwa nguvhu byala.
“Ngha uva ni mawonela ma nene hi byala” (A Murindzeli wa 1 ka Janeiro wa 2010)
A muKristu i fanele ku gumulisa tikopo?
“Zviwutiso zva vagondzi” (A Murindzeli wa 15 ka Fevereiro wa 2007)
Lera a matimu ma nge: “Ndzi wa hi civilelo,” kasi ku wona lezvi a wanuna wo kari a nga zvi tsikisa zvona kunwa nguvhu byala.
“A Bhibhiliya ga cica wutomi ga vanhu” (A Murindzeli wa 1 ka Maio wa 2012)
a Lava va ti karatelako ku tsika kunwa nguvhu byala, va nga lava ku vhuniwa hi vadhokodhela. A vadhokodhela vo tala va wula lezvaku lava va nwako nguvhu byala zvi lava ku vaya hi ku gi tsika hi kumbhelela.
