CIGONDZO 44
Xana a mibuzo yontlhe ya mu tsakisa Nungungulu?
Jehovha i lava lezvaku hi ti buza hi wutomi hi tlhela hi maha mibuzo ka zvikhati zvo kari. Kanilezvi, xana a mibuzo yontlhe ni mibuzo ya tiferiyadho ya mu tsakisa Nungungulu? Hi nga kombisa kuyini a lirandzo la hina hi Jehovha ka mhaka leyi?
1. Hikuyini a mibuzo ya ku tala yi kalako yi nga mu tsakisi Jehovha?
Kuzvilava zvi nga ku hlamalisa a ku tiva lezvaku a mibuzo yo tala yi yelana ni tigondzo ti nga seketelwiko hi Bhibhiliya kutani yi sukela ka wukhongeli ga mawunwa. A mibuzo leyo kuzvilava yi yelana ni wudhimoni kutani yi seketelwa ka maalakanyo ya lezvaku a muhefemulo a wufi. A mibuzo yo kari yi sukela ka masalamuso ni tinjombo. (Isaya 65:11) Jehovha i tlharihisa a malandza yakwe, aku: ‘Ti hambaniseni navo . . . tsikani ku henya cilo co kala kuhlazveka.’ — 2 Va Le Korinte 6:17. a
2. Jehovha i ti zwisa kuyini hi mibuzo leyi yi nyikako vanhu a wudzundzo go hundzeleta?
Jehovha i hi tlharihisa lezvaku hi nga weli ntlhan’wini wa ku ‘tsumba vanhu’. (Lera Jeremiya 17:5.) A mibuzo yo kari ya tiferiyadho yi mahelwa ku dzundza a tihosi kutani masochwa. A tiferiyadho tin’wani ti dzundza bhandera ga tiko kutani ku tsakela a siku ga ku tlhatlheka ka tiko. (1 Johani 5:21) Kanilezvi a yin’wani yi dzundza mapartidho ya politika. U alakanya ku Jehovha i wa ta ti zwisa kuyini loku hi wo patseka ka mibuzo ya tiferiyadho leyi yi nyikako wudzundzo ka vanhu kutani ka tihlengeletano, nguvhunguvhu leti ti vhuvhumisako a mawonela ma nga yelaniko ni kungo gakwe?
3. Zvilo muni zvi nga mahako ku a mubuzo wo kari wu nga amukeleki?
A Bhibhiliya ga betela a ‘kupopiwa, ni mibuzo ya vhilinganya, ni mabyala’. (1 Pedro 4:3) Ka mibuzo yo kari, a vanhu a va ti khomi niku va maha zvilo zvo kala kuhlazveka. Kasi hi simama kuva vanghana va Jehovha, hi fanele ku potsa a zvilo lezvo zvi nga basangiko.
GONDZA ZVI ETA
Wona lezvi u nga mu tsakisisako zvona Jehovha hi ku maha zviboho zva zvinene xungetano hi ku patseka kutani ku nga patseki ka mibuzo ya tiferiyadho.
4. Potsa mibuzo yi nga tsakisiko Jehovha
Lerani Va Le Efesusi 5:10, mu gumesa mu bhula hi zviwutiso lezvi:
-
Zvini hi faneleko ku zvi tiva na hi nga se boha kuya ka mubuzo wo kari?
-
Mibuzo muni ya tiferiyadho yi tolovelako ku mahiwa lomu u hanyako kona?
-
U alakanya ku a mibuzo leyo ya tiferiyadho ya mu tsakisa Jehovha?
Hi cikombiso, u tshuka u ti wutisa ku Nungungulu i yi wonisa kuyini a mibuzo ya ku tsakela siku ga kupswaliwa? A Bhibhiliya a gi wulawuli hi malandza ya Jehovha ma nga maha mubuzo wa ku tsakela siku ga kupswaliwa. Kanilezvi gi kumbuka mibuzo yimbiri ya ku tsakela siku ga ku pswaliwa yi mahilweko hi vanhu va nga khozeliko Jehovha. Lerani Genesisi 40:20-22 na Matewu 14:6-10. Hi kulandzela, bhulani hi zviwutiso lezvi:
-
Zvilo muni zva kufana zvi mahekileko ka mibuzo leyi ya yimbiri ya ku tsakela masiku ya kupswaliwa?
-
Hi kuya hi matimu lawa ya Bhibhiliya, u alakanya ku Jehovha i yi wonisa kuyini a mibuzo ya ku tsakela masiku ya kupswaliwa?
Hambulezvo, u nga ha ti wutisa ku: ‘A ku Jehovha wa karateka hakunene loku ndzi maha mibuzo ya ku tsakela masiku ya kupswaliwa kutani tiferiyadho tin’wani ti nga yelaniko ni lezvi a Bhibhiliya gi gondzisako?’ Lerani Eksodhusi 32:1-8. Andzhako ka lezvo, bisani VHIDHIO mu gumesa mu bhula hi zviwutiso zvi landzelako
-
Hikuyini zvi nga zva lisima a ku ti karatela ku tiva lezvi zvi tsakisako Jehovha?
-
Hi nga zvi mahisa kuyini lezvo?
Hi nga zvi tivisa kuyini ku a mubuzo wo kari a wu mu tsakisi Nungungulu?
-
A mubuzo lowu wu seketelwa ka gondzo ya mawunwa? Zama ku tiva ku wu sukela kwihi.
-
A mubuzo lowu wu nyika wudzundzo go hundzeleta ka vanhu, ka partidho ya politika kutani ka bhandera ga tiko? Hi dzundza Jehovha a ku hundza zvilo zvontlhe niku hi tsumba ku hi yena a to fuvisa a zvikarato zva tiko.
-
A mikhuwo ni lezvi va zvi mahako ka mibuzo leyo a zvi lwisani ni lezvi a Bhibhiliya gi wulako? Hi fanele ku simama kuva ni mahanyela yo hlazveka.
5. Vhuna van’wani a ku zwisisa ciboho ca wena
Zvi nga karata ku ala loku a van’wani va ku kurumeta kuya ka mubuzo wu nga tsakisiko Jehovha. Va tlhamusele a ciboho ca wena hi lihlazva-mbilu, lezvo na u kombisa cichavo. Kasi u wona cikombiso ca lezvi u nga zvi mahisako zvona, bisani VHIDHIO.
Lerani Matewu 7:12, mu gumesa mu bhula hi zviwutiso lezvi:
-
Hi kuya hi vhesi legi, xana u fanele ku kurumeta maxaka ya wena ma nga khozeliko Jehovha lezvaku ma nga mahi a mubuzo wo kari?
-
Zvini u nga mahako kasi ku tiyisekisa a vangango wa wena lezvaku hambu lezvi u nga patsekiko ka mibuzo yo kari wa va randza niku wa khatala hi vona?
6. Jehovha i lava ku hi tsaka
Jehovha i lava lezvaku hi tshama hi hlakana ni maxaka ya hina ni vanghana hina. Lerani Mutshawuteli 8:15, mu gumesa mu bhula hi ciwutiso leci:
-
A vhesi legi gi zvi kombisa kuyini lezvaku Jehovha i lava ku hi tsaka?
Jehovha i lava lezvaku a vanhu vakwe va hlakana va tlhela va ti buza hi zvikhati zvi nene na va hi zvin’we. Bisani VHIDHIO kasi u wona lezvi zvi mahekisako zvona lezvo ka migotsovanyano ya hina ya matiko manyingi.
Lerani Va Le Galatiya 6:10, mu gumesa mu bhula hi zviwutiso lezvi:
-
Xana hi fanele ku patseka ka mibuzo ya tiferiyadho leyi a vanhu va mahako, kasi hi va ‘mahela zvazvinene’ van’wani?
-
Zvini zvi nga wa ta ku nyika litsako la hombe: “Ku tizwa na u kurumeteka ku nyika munhu prezenti hi kota ya feriyadho yo kari kutani ku mu nyika hi ku zvi randza?”
-
A Vakustumunyu vo tala va Jehovha, ka zvikhati zvo kari va va mahela zvifestana a vana vabye va tlhela va va nyika maprezenti na va nga rindzeli a siku go kari go hlawuleka kasi ku maha lezvo. Loku u hi ni vana, zvilo muni zvo hlawuleka u nga va mahelako?
A VOKARI VE: “A zvizi zvi lava ku hi tiva ku a mubuzo wo kari wu tumbulukele kwihi. A ca lisima ku tshama hi hlakana ni maxaka ni vanghana.”
-
U wa ta va hlamulisa kuyini?
LEZVI HI NGA GONDZA
Jehovha i lava lezvaku hi tshama hi hlakana ni maxaka ya hina ni vanghana. Kanilezvi a nga zvi lavi lezvaku hi patseka ka mibuzo yi nga mu tsakisiko.
Zviwutiso zva kuvhuxeta
-
Zviwutiso muni zvi nga hi vhunako ku tiva ku a mubuzo wo kari a wu mu tsakisi Jehovha?
-
Hi nga ma tlhamuselisa kuyini a maxaka ya hina ni vanghana a ku hikuyini hi kalako hi nga patseki ka mibuzo yo kari?
-
U zvi tivisa kuyini lezvaku Jehovha i lava ku hi tsaka hi tlhela hi hlakana?
GONDZA ZVIN’WANI
Wona a mibuzo yo kari ya tiferiyadho leyi a maKristu ma kalako ma nga patseki ka yona.
Wona mune wa zvigelo zvi hi mahako hi kholwa lezvaku a ku maha mubuzo wa ku tsakela siku ga kupswaliwa a zvi mu tsakisi Nungungulu.
Wona lezvi a vanana va randzako Jehovha va nga mu tsakisisako zvona cikhatini ca makhisimuso.
A maKristu ya timiliyoni ma bohile ku ngagi khisimuso. Ma ti zwisa kuyini hi ciboho leci ma mahileko?
“Va kumile nchumu wa wunene nguvhu” (A Murindzeli wa 1 ka Dezembro wa 2012)
a Wona Tlhamuselo wa wu 5 kasi u tiva lezvi u nga mahako ka zviyimo zvo kari ka mibuzo yo kari.
