Lava va ha hi ku chadhako va xuva ku a litsako leli va li zwako ka siku ga muchadho li simama kala kupindzuka. Lezvo hakunene zvi nga koteka. A maKristu lawa ma nga ni malembe na ma chadhile, lawa ma kululako ma n’watseka kasi ku tirisa a wusungukati ga Bhibhiliya, ma zvi tiva lezvaku lezvo zva koteka.

1. Wusungukati muni legi a Bhibhiliya gi nyikako nuna?

Jehovha i yimisile a nuna kasi ava hloko ya ngango. (Lera Va Le Efesusi 5:23.) Jehovha i rindzela ku a nuna a maha zviboho lezvi zvi to vhuna a ngango. A Bhibhiliya gi byela nuna, giku: “Simama ku randza sati wa wena.” (Va Le Efesusi 5:25) Zvi lava ku wula yini lezvo? A nuna a nga ni lirandzo i mu khoma khwatsi a sati wakwe, kani va voce le kaya kutani va lomu ka vanhu. I zama ku mu vhikela ka timhango, ni ku ti karatela ku mu tsakisa a tlhela a mu nyika lezvi a zvi lavako. (1 Timote 5:8) A ca lisima ka zvontlhe, i vhuna sati wakwe a kuva ni wunghana go tiya na Jehovha. (Matewu 4:4) Hi cikombiso, a nga khongela a tlhela a lera Bhibhiliya ni sati wakwe. Loku a nuna a khatalela a sati wakwe hi lirandzo, i tiyisa a wunghana gakwe na Jehovha. — Lera 1 Pedro 3:7.

2. Wusungukati muni legi a Bhibhiliya gi nyikako sati?

A Mhaka ya Nungungulu yi wula ku “a sati i fanele kuva ni cichavo co eta hi nuna wakwe”. (Va Le Efesusi 5:33) A nga zvi mahisa kuyini lezvo? A nga nyika lisima a matshamela ya manene ya nuna wakwe ni ku zvi nyika lisima lezvi a nuna wakwe a ti karatisako zvona kasi ku hlayisa yena ni vana vabye. A nga mu kombisa cichavo kambe hi ku seketela a zviboho lezvi a mahako ni ku wulawula naye hi ndlela yinene a tlhela a wulawula khwatsi hi yena, hambu loku a nga khozeli Jehovha.

3. A nuna ni sati va nga gi tiyisisa kuyini a wukati gabye?

Xungetano hi lava va chadhileko, a Bhibhiliya gi wula lezvi: “Lava vambiri va tava nyama yin’we.” (Matewu 19:5) Lezvo zvi wula ku a nuna ni sati va fanele ku kulula va n’watseka kasi a lirandzo labye li nga hunguleki. Va maha lezvo hi ku ti nyika cikhati ca ku tshama zvin’we, ni ku bhula hi ndlela yo tlhatlheka ni ya lirandzo hi lezvi va zvi pimisako ni lezvi va ti zwisako zvona hi mun’we ni mun’wani. Ahandle ka Jehovha, a va tsiki mun’wani munhu kutani nchumu wuva wa lisima nguvhu kabye a ku hundza munghana wabye wa wukati. Va ti wonela nguvhu kasi va nga naveli munhu mun’wani.

 GONDZA ZVI ETA

4. A nuna i fanele ku randza sati wakwe ni ku mu hlayisa

5. A sati i fanele ku randza nuna wakwe ni ku mu kombisa cichavo

A Bhibhiliya gi kuca sati lezvaku a mu kombisa cichavo a nuna wakwe, hambu loku a nga khozeli Jehovha. Lerani 1 Pedro 3:1, 2, mu gumesa mu bhula hi zviwutiso lezvi:

• Loku a nuna wa wena a nga khozeli Jehovha, a zvi kanakanisi lezvaku wena wa zvi lava ku a mu khozela. U alakanya ku cini ci nga vhunako: ku tshamela ku mu chumayela kutani kuva ni mahanyela manene u tlhela u mu kombisa cichavo? Hikuyini?

A nuna ni sati va nga maha zviboho zva zvinene zvin’we. Hambulezvo, ka zvikhati zvin’wani, a sati a nga tshuka a nga nyimi ni mawonela ya nuna. Lisine ku a sati a nga wula a mawonela yakwe  hi ndlela yo rula ni ya cichavo, kanilezvi i fanele ku alakanya lezvaku Jehovha i nyikile a nuna a ntiro wa ku maha zviboho lezvi zvi to vhuna ngango. I fanele ku seketela a zviboho zva nuna wakwe. Loku a maha lezvo, a ngango wontlhe wu ta tsaka. Lerani 1 Pedro 3:3-5, mu gumesa mu bhula hi ciwutiso leci:

• Jehovha i ti zwisa kuyini loku a sati a mu kombisa cichavo a nuna wakwe?

6. Mu nga zvi kota ku hlula zvikarato wukatini ga n’wina

 LEZVI HI NGA GONDZA

A nuna ni sati va nga tsaka loku va randzana, va kombisana cichavo va tlhela va tirisa matshinya ya milayo ya Bhibhiliya.

Zviwutiso zva kuvhuxeta

• Zvini lezvi a nuna a nga mahako kasi a ngango wu tsaka?

• Zvini lezvi a sati a nga mahako kasi a ngango wu tsaka?

• Loku u chadhile, hi gihi a tshinya ga nayo gi nga tiyisako wukati ga wena?