CIGONDZO 54

Himani a “nandza go tsumbeka ni go tlhariha” niku hi wihi a ntiro wa gona?

BISA

Jesu hi yena a hloko ya bandla ga wuKristu. (Va Le Efesusi 5:23) Nyamutlha, kota hosi le tilweni, Jesu i rangela a valandzeli vakwe laha misaveni hi ku tirisa a “nandza go tsumbeka ni go tlhariha”. (Lera Matewu 24:45.) Hi Jesu ha yece a yimisileko a nandza lego ni ku gi nyika a fanelo ya ku maha a zviboho zvo kari. Hambulezvo, a nandza lego gi fanele ku simama ku ingisa Kristu gi tlhela gi tirela a vamakabye va Kristu. Himani a nandza go tsumbeka ni go tlhariha, kona gi hi khatalelisa kuyini?

1. Himani a “nandza go tsumbeka ni go tlhariha”?

Contlhe cikhati, Jehovha i tirisa wanuna kutani ntlawa wa vavanuna kasi ku va nyika zvileletelo a vanhu vakwe. (Malaki 2:7; Mahebheru 1:1) Andzhako ka kufa ka Jesu, a vapostoli ni madhota le Jerusalema hi vona va nga rangela. Hi ndlela yo fana, nyamutlha, a ntlawa wutsongwani wa madhota hi wona wu rangelako. A ntlawa lowo wu vitaniwa ku i Hubye yi Fumako ya Vakustumunyu va Jehovha. Wu hi nyika zvakuga zva moya wu tlhela wu rangela a ntiro wa ku chumayela misaveni yontlhe. A ntlawa lowo i “nandza go tsumbeka ni go tlhariha legi [Jesu] a gi yimisileko”. (Matewu 24:45a) Zvontlhe a zviro zva Hubye yi Fumako maKristu ma totilweko hi moya wo basa, lawa ma nga ni kutsumba ka ku fuma na Kristu Mufun’weni wakwe wa le tilweni loku a wutomi gabye ga laha misaveni gi mbhela.

2. I zvakuga muni zva moya lezvi a nandza go tsumbeka ni go tlhariha gi hi nyikako?

Jesu i wulile ku a nandza lego go tlhariha ni go tsumbeka gi wa ta “phamela [a maKristu-kuloni] zvakuga hi cikhati ca kona”. (Matewu 24:45b) A ku fana ni lezvi a zvakuga lezvi hi gako zvi tiyisako miri wa hina wu hanya khwatsi, a zvakuga zva moya — a gondziselelo yi tako hi ka Mhaka ya Nungungulu — zvi hi nyika ntamu hi wu lavako kasi hi simama hi tsumbekile ka Jehovha ni ku maha a ntiro lowu Jesu a hi nyikileko. (1 Timote 4:6) Hi kuma a zvakuga lezvo zva moya mitlhanganweni ya bandla, ni mitlhanganweni ya cipandze, ni migotsovanyanweni, a ku patsa ni ka mabhuku ma seketelwako ka Bhibhiliya ni ka tivhidhio ti hi vhunako a ku zwisisa a kurandza ka Nungungulu ni ku tiyisa a wunghana ga hina na yena.

GONDZA ZVI ETA

Gondza u wona ku hikuyini hi gi lavako a “nandza go tsumbeka ni go tlhariha”, ku nga Hubye yi Fumako.

A Hubye yi Fumako yi nyikela a zvakuga zva moya, ni zvileletelo, ni civhuno ka Vakustumunyu va Jehovha misaveni yontlhe

3. A vanhu va Jehovha va fanele ku tira zvin’we

Na yi rangelwa hi Jesu, a Hubye yi Fumako yi xaxameta a ntiro wa Vakustumunyu va Jehovha kasi wu mahiwa khwatsi. Ni kale, Jesu i wa rangela a maKristu yo sangula hi ndlela yo fana. Bisani VHIDHIO.

VHIDHIO: Jehovha wa xaxameta vanhu vakwe (6:18)

Lerani 1 Va Le Korinte 14:33, 40, mu gumesa mu bhula hi ciwutiso leci:

A mavhesi lawa ma zvi kombisisa kuyini ku Jehovha i lava ku a Vakustumunyu vakwe va tira zvin’we?

4. A nandza go tsumbeka ni go tlhariha gi rangela a ntiro wa kuchumayela

A kuchumayela wu wa hi wona a ntiro wa lisima nguvhu wu nga mahiwa hi maKristu yo sangula. Lerani Mitiro 8:14, 25, mu gumesa mu bhula hi zviwutiso lezvi:

Cikari ka maKristu yo sangula, himani a nga rangela a ntiro wa kuchumayela?
Pedro na Johani va zvi amukelisile kuyini a zvileletelo zva vapostoli-kulobye?

A kuchumayela hi wona ntiro wa lisima nguvhu lowu a Hubye yi Fumako yi wu rangelako. Bisani VHIDHIO.

VHIDHIO: Hi yisa kupima ka ntiro wo chumayela (1:24)

Jesu i dlunyatisile a lisima la ntiro wa kuchumayela. Lerani Marku 13:10, mu gumesa mu bhula hi zviwutiso lezvi:

Hikuyini a ntiro wa kuchumayela wu nga wa lisima nguvhu ka Hubye yi Fumako?
Hikuyini hi lavako a “nandza go tsumbeka ni go tlhariha” kasi ku rangela a ntiro lowu wa misava yontlhe?

5. A nandza go tsumbeka ni go tlhariha ga hi nyika zvileletelo

A Hubye yi Fumako yi nyika zvileletelo ka maKristu misaveni yontlhe. Yi bohisa kuyini ku hi zvihi zvileletelo yi faneleko ku nyikela? Wona lezvi a hubye yi fumako ya maKristu yo sangula yi nga zvi mahisa zvona. Lerani Mitiro 15:1, 2, mu gumesa mu bhula hi zviwutiso lezvi:

I mhaka muni leyi a maKristu yo sangula ma nga kala ma nga zwanani ka yona?
Pawule na Bharnabhasi ni van’wani va yi yisile kwihi a mhaka leyo kasi va ya kombela civhuno?

Lerani Mitiro 15:12-18, 23-29, mu gumesa mu bhula hi ciwutiso leci:

Na yi nga se maha a ciboho, zvini lezvi a hubye yi fumako yo sangula yi nga maha kasi yi kuma wurangeli ga Jehovha mhakeni leyi? — Wona mavhesi 12, 15, ni 28.

Lerani Mitiro 15:30, 31 ni 16:4, 5, mu gumesa mu bhula hi zviwutiso lezvi:

Zvini lezvi a maKristu yo sangula ma nga maha laha ma nga nyikiwa a cileletelo ca hubye yi fumako?
Jehovha i va katekisisile kuyini hi lezvi va nga ingisa?

Lerani 2 Timote 3:16 na Jakobe 1:5, mu gumesa mu bhula hi ciwutiso leci:

A Hubye yi Fumako yi gi hlota kwihi a wurangeli a cikhati yi mahako zviboho nyamutlha?

A VOKARI VE: “Loku u ingisa a Hubye yi Fumako, wo landzela vanhu basi.”

Wa kholwa ku Jesu hi yena a rangelako a Hubye yi Fumako? Hikuyini?

LEZVI HI NGA GONDZA

A Hubye yi Fumako i “nandza go tsumbeka ni go tlhariha” gi yimisilweko hi Kristu. Yi nyika zvileletelo ni zvakuga zva moya ka maKristu misaveni yontlhe.