CiGONDZO 56
Vhuvhumisa kuzwanana lomu bandleni
Loku hi hi cikari ka makholwa-kulori, hi ti zwisa ku khwatsi hi Hosi Dhavhidha loyi a ngaku: “Hi nga wonani a kusaseka ni kutsakisa ka zvona loku a vamakabye va hanya zvin’we hi kuzwanana!” (Lisimu 133:1) A kuzwanana a kuti halahala. A mun’we ni mun’wani wa hina i fanele ku maha cokari kasi ku ku vhuvhumisa.
1. Cini ci hlamalisako cikari ka vanhu va Nungungulu?
Loku uya mitlhanganweni ya bandla ka tiko gin’wani, kuzvilava u nga ta li zwisisa a lirimi la kona kanilezvi hi tindlela tontlhe u ta tizwa na u hi kaya. Hikuyini? Hakuva misaveni yontlhe hi gondza Bhibhiliya hi ku tirisa a mabhuku yalawa ya man’we. Niku hi ti karatela ku kombisana lirandzo. Ni kwihi hi hanyako kona, hontlheni hi “vitana a vito ga Jehovha, [hi] mu khozela hi kuzwanana”. — Zefaniya 3:9, tlhamuselo wa lahasi.
2. Zvini u nga mahako kasi ku vhuvhumisa kuzwanana?
A Bhibhiliya gi wula lezvi: “Randzanani nguvhu na zvi sukela mbilwini.” (1 Pedro 1:22) U nga gi landzelisa kuyini a wusungukati legi? U nga veki kupima ka wena ntsena ka kungambheleli ka van’wani, kanilezvi hlota a matshamela yabye ya ma nene. U nga hlakani basi ni vanhu va fanako na wena ni lava va randzako lezvi wena u zvi randzako, kanilezvi zama ku tiva vamakabye va midhawuko yo hambanahambana. A cin’wani kambe, hi fanele ku ti karatela ku fuvisa a moya wa cihlawulela loku hi hi nawo. — Lera 1 Pedro 2:17. a
3. Zvini u faneleko ku maha loku u khunguvanyisene ni mukristu-kulori?
Hi bohene, kanilezvi a hi mbhelelangi. Ka zvikhati zvo kari, ha tshuka hi khunguvanyisana ni van’wani. Hikwalaho, a Mhaka ya Nungungulu yi hi byela ku “simamani . . . ku tsetselelana”, yi tlhela yiku: “A ku khwatsi hi lezvi Jehovha a nga mu tsetselela hi mbilu yontlhe, n’winawu mahani zvalezvo.” (Lera Va Le Kolosi 3:13.) Ha wonhela Jehovha a makhati yo tsandza ni ku hlaya, hambulezvo yena wa hi tsetselela. Hikwalaho, i rindzela lezvaku hinawu hi tsetselela a vamakabye va hina. Loku u pola lezvaku u khunguvanyisile wokari, sangula hi wena u maha cokari kasi ku lulamisa a cikarato leco. — Lera Matewu 5:23, 24. b
GONDZA ZVI ETA
Ehleketa hi lezvi u nga mahako kasi ku vhuvhumisa kuzwanana ni kurula lomu bandleni.
Zvini u to maha kasi ku vhuxa kurula?
4. Tsika cihlawulela
Ha zvi lava ku randza a vamakabye vontlhe. Kanilezvi zvi nga tshuka zvi hi karatela ku randza a munhu a wonekisako ku khwatsi i hambene na hina. Cini ci nga hi vhunako? Lerani Mitiro 10:34, 35, mu gumesa mu bhula hi zviwutiso lezvi:
-
Jehovha i amukela vontlhe kota Vakustumunyu vakwe. Makunu lezvo zvi fanele ku zvi khumbisa kuyini lezvi u va wonisako zvona a vanhu va midhawuko yo hambana ni lowu wa wena?
-
Cihlawulela muni ci nga kona lomu cipandzeni ca wena? Hikuyini u faneleko ku ci potsa?
Lerani 2 Va Le Korinte 6:11-13, mu gumesa mu bhula hi ciwutiso leci:
-
U alakanya ku u nga maha yini kasi u engetela ku randza a vamakabye va midhawuko yo hambana ni lowu wa wena?
5. Tsetselela hi mbilu yontlhe u tlhela u hlota kurula
Jehovha wa hi tsetselela hi mbilu yontlhe hambu lezvi ka ku a nga ta tshuka a lava ku hina hi mu tsetselela. Lerani Lisimu 86:5, mu gumesa mu bhula hi zviwutiso lezvi:
-
A kutsetselela ka Jehovha ka hombe hi ndlela muni?
-
Hikuyini u bongako hi lezvi Jehovha a ku tsetselelako?
-
Zviyimo muni zvi nga mahako ku zvi hi karateka a ku zwanana ni van’wani?
Hi nga mu pimanyisisa kuyini Jehovha hi ku simama hi bohene ni vamakabye va hina? Lerani Mavingu 19:11, mu gumesa mu bhula hi ciwutiso leci:
-
Loku a wokari a ku swira kutani ku ku khunguvanyisa, zvini u nga mahako kasi ku lulamisa cikarato leco?
Ka zvikhati zvo kari ha khunguvanyisa van’wani. Loku lezvo zvi humelela, zvini hi faneleko ku maha? Bisani VHIDHIO, mu gumesa mu bhula hi ciwutiso ci landzelako.
-
Lomu ka vhidhio, zvini lezvi a makabye wa cisati a nga maha kasi ku vhuxa kurula?
6. Hlota zvazvinene ka vamakabye va wena
Laha hi yako hi va tiva khwatsi a vamakabye va hina, hi pola a matshamela yabye ya manene ni magome yabye. Hi nga maha yini kasi hi veka kupima ka matshamela yabye ya manene? Bisani VHIDHIO, mu gumesa mu bhula hi ciwutiso ci landzelako.
-
Cini ci nga hi vhunako a ku wona a matshamela ya manene ya vamakabye va hina?
Jehovha i cuwuka a matshamela ya hina ya manene. Lerani 2 Kronekele 16:9a, mu gumesa mu bhula hi ciwutiso leci:
-
U ti zwisa kuyini hi ku tiva lezvaku Jehovha i cuwuka a matshamela ya wena ya manene?
Hambu a dhiyamante yo saseka yi na ni zvihoxwanyana, kanilezvi ya lisima. Hi ndlela yo fana, a vamakabye va hina a va mbhelangi, hambulezvo va lisima ka Jehovhah
A VOKARI VE: “Loku ndzi mu tsetselela zvi mahisa ku khwatsi lezvi a nga maha a zvi ndzi bayisi.”
-
Hikuyini hi faneleko ku tshama na hi longile ku tsetselela van’wani?
LEZVI HI NGA GONDZA
nga vhuvhumisa a kuzwanana lomu bandleni hi kuva munhu wo tsetselela ni ku randza vamakabye.
Zviwutiso zva kuvhuxeta
-
U nga ci hlulisa kuyini a cihlawulela?
-
Zvini u to maha loku u khunguvanyisene ni mukristu-kulori?
-
Hikuyini u lavako ku pimanyisa a cikombiso ca Jehovha ca ku tsetselela van’wani?
GONDZA ZVIN’WANI
Gondza u wona lezvi a wun’we wa mifananiso ya Jesu wu nga ku vhunisako zvona a ku potsa ku lamula van’wani.
Zva laveka a ku hi kombela ku tsetselelwa hambu loku hi alakanya ku a hi gohangi nchumu?
Wona lezvi a vokari va nga gondzisa zvona ku va khoma khwatsi vanʼwani na va nga kombisi cihlawulela.
Gondza u wona lezvi u nga lulamisisako zvona a mazunga na ma nga se colopetela kurula lomu bandleni.
“Lulamisa mazunga hi moya wa liranzo” (A Murindzeli, Maio wa 2016)
a A Tlhamuselo wa wu 6 wu wulawula hi lezvi a lirandzo li kucisako zvona a maKristu a ku kombisa a cichavo xungetano hi lihanyo. Hi cikombiso, wu kumbuka lezvi va potsisako zvona a ku tluleta van’wani a mababyi ma thapelako.
b A Tlhamuselo wa wu 7 wu wulawula hi ndlela ya ku lulamisa a timhaka ti yelanako ni mabhindzu ni ta nayo wa mufumo.
